سەيسەنبى، 26 ناۋرىزدا جاڭاوزەن قالالىق تەرگەۋ سوتى قالاداعى جۇمىسسىز جاستاردىڭ ماسەلەسىن كوتەرىپ جۇرگەن بەلسەندى ەرجان ەلشىبايەۆتى ەكى اي قاماۋعا الۋ تۋرالى شەشىم شىعاردى دەپ حابارلايدى Qamshy.kz اقپارات اگەنتتىگى ازاتتىق راديوسىنا سىلتەمە جاساي وتىرىپ.

ەرجان ەلشىبايەۆ "بۇزاقىلىق" (قىلمىستىق كودەكستىڭ 293-بابىنىڭ 3-تارماعى) بويىنشا قوزعالعان قىلمىستىق ءىس بويىنشا كۇدىككە ءىلىنىپ وتىر. ونى تەرگەۋ ورگاندارى "2017 جىلى قالادا بولعان توبەلەس كەزىندە ءبىر ادامنىڭ كوزىن جارالاعان" دەپ ايىپتاعان.

ونىڭ ادۆوكاتى كەنجە مۇڭايتپاس ۇلىنىڭ ايتۋىنشا، سەيسەنبى كۇنگى سوتقا ۋاقىتشا تەرگەۋ يزولياتورىندا وتىرعان ەرجان ەلشىبايەۆ ونلاين ارقىلى قاتىسقان. سوتتا "دالەل" رەتىندە كورسەتىلگەن ۆيدەودا ەلشىبايەۆقا ۇقساس بىرەۋدىڭ توبەلەسىپ جاتقانى بايقالعان. ءبىراق ەلشىبايەۆ تاعىلعان ايىپپەن كەلىسپەگەن.

ادۆوكات كەنجە مۇڭايتپاس ۇلى بۇل جايتتى ەرجان ەلشىبايەۆتىڭ سوڭعى كەزدەگى بەلسەندىلىگىمەن بايلانىستىرادى. ول ءبىر ايدان بەرى اكىمدىك الدىنا جينالىپ جۇرگەن جاستاردىڭ ماسەلەسىن كوتەرىپ، بيلىكتەن جۇمىس بەرۋدى تالاپ ەتىپ كەلگەن.

- 2017 جىلدان بەرى جانە ءقازىر دە ەشكىم بۇل جاعدايعا بايلانىستى شاعىمدانباعان. شاماسى، ەرجاننىڭ بەلسەندىلىگىنە بايلانىستى بولۋى مۇمكىن دەپ ويلايمىن. بۇل ايىپپەن ەلشىبايەۆ تا، مەن دە كەلىسپەيمىن. اپەللياسيالىق شاعىم تۇسىرەمىز، ءۇش كۇن ۋاقىت بار، - دەدى كەنجە مۇڭايتپاس ۇلى.

31 جاستاعى ەرجان ەلشىبايەۆتى پوليسيا 24 ناۋرىز كۇنى ۇيىنەن ۇستاپ الىپ كەتكەن. بەلسەندى بۇعان دەيىن دە پوليسيا قىسىمىنا شاعىمدانعان.

اقپان مەن ناۋرىز ايلارىندا جاڭاوزەن جاستارى قالاداعى جۇمىسپەن قامتۋ جانە الەۋمەتتىك ءبولىم عيماراتىنىڭ (بۇرىنعى "نەكە سارايى") الدىنا جينالىپ، بىرنەشە اپتا بويى بيلىكتەن مۇناي سالاسىندا جۇمىس تاۋىپ بەرۋلەرىن سۇراعان.  تۇرعىندار نارازىلىعىنان سوڭ ىزىنشە ولارعا قىسىم جاسالىپ جاتقانى تۋرالى اقپارات پايدا بولعان. ءبىراق پوليسيا بۇل اقپاراتتى جوققا شىعارعان ەدى. 

جاڭاوزەندە جۇمىسسىزدار اكىمدىككە تالاپپەن تاعى دا كەلدى (11 ناۋرىز 2019 جىل).

ۇسىنعان: فاريزا جومارت قىزى