"پاركتەن شىقپاس بۇرىن قوعامدىق كولىكتەردى مىندەتتى تۇردە تەكسەرەمىز. ەگەر اقاۋ تابىلسا، جولاۋشىلارعا قىزمەت كورسەتۋگە جىبەرىلمەيدى. اۆتوبۋستى جوندەۋگە جىبەرەمىز. سونداي-اق، جۇرگىزۋشىلەر مەديسينالىق تەكسەرىستەن وتپەسە، جۇمىسقا شىعا المايدى"، - دەيدى №1 اۆتوبۋس پاركىنىڭ قىزمەتكەرى حاسەن مۇحامەدجانوۆ.

مەديسينالىق جانە تەحنيكالىق سىناقتان سۇرىنبەي وتكەن جۇرگىزۋشى ەلوردالىق جولاۋشىلارعا قىزمەت كورسەتۋگە كىرىسەدى.

№1 اۆتوبۋس پاركىنىڭ 61ء-شى باعىتىنىڭ جۇرگىزۋشىسى نۇرجان تۇرلىباي جول اپاتىنا جۇرگىزۋشىنىڭ دەنساۋلىعى سەبەپ بولدى دەپ پايىمدايدى.

"ۆيدەونى كوردىك. اۆتوبۋستىڭ تەجەگىشى دۇرىس ىستەمەي قالدى دەپ ايتا المايمىن. ءتىپتى، تەجەگىش ىستەمەي قالعان كۇننىڭ وزىندە اۆتوبۋس جۇرگىزۋشىسى جانىن امان ساقتاپ قالۋ ءۇشىن كولىكتى وڭعا نەمەسكە سولعا بۇرۋشى ەدى. ادامدار بارلىعىن كورىپ تۇردى عوي. مەنىڭ ويىمشا، اۆتوبۋس جۇرگىزۋشىسىنە بىردەڭە بولعان. جايدان جاي، جوعارى جىلدامدىقپەن اۆتوبۋسقا سوعىلمايدى عوي"، - دەدى ول

سونىمەن قاتار اۆتوبۋس پاركىنىڭ قىزمەتكەرى جۇرگىزۋشىلەردىڭ جالاقىسى كوتەرىلگەنىن، ءارى ۇيقىسى قانىپ جۇرەتىنىن اتاپ ءوتتى.

"جۇمىسقا تاڭعى 4:30-دا تۇرامىن. ءبىزدى اۆتوپارككە قىزمەتتىك كولىك الىپ كەلەدى. تاڭعى 6-دان تۇنگى 11-گە دەيىن مارشرۋتتا جۇمىس ىستەيمىز. وسى جۇمىستا جۇرگەنىمە 10 جىل بولدى. سوندىقتان ورگانيزم ۇيرەنگەن. مۇنداعى جۇرگىزۋشىلەردىڭ جالاقىسى 250 مىڭ تەڭگە"، - دەدى نۇرجان تۇرلىباي.

قالاداعى №36 باعداردا جۇمىس ىستەيتىن اۆتوبۋس جۇرگىزۋشىسى قاھارمان يمانبايەۆ قازا تاپقان جۇرگىزۋشىنىڭ وتە تاجىريبەلى ەكەنىن اتاپ ءوتتى.

"الەۋمەتتىك جەلىدەگى ۆيدەونى كوردىم. اۆتوبۋستا تەحنيكالىق اقاۋ بولۋى مۇمكىن ەمەس. سەبەبى، ونى ماماندار پاركتەن تەكسەرىپ شىعارادى. مەنىڭ ويىمشا، جۇرگىزۋشىنىڭ جۇرەگى توقتاپ قالدى ما، ايتەۋىر بىرنارسەنىڭ دەنساۋلىعىنا اسەر ەتكەنى انىق. ايتپەسە، كاسىبي دەڭگەيى جوعارى، تاجىريبەسى مول جۇرگىزۋشى عوي. ول مۇندايعا جول بەرمەس ەدى. جولداعى جاعدايدى الدىن الا ءبىلىپ وتىرادى عوي"، - دەيدى №1 اۆتوبۋس پاركىنىڭ قىزمەتكەرى.

سونىمەن قاتار ول "اۆتوبۋس جۇرگىزۋشىلەرىنىڭ ۇيقىسى قانباي جۇمىسقا شىعادى" دەگەنگە ءوز پىكىرىن ءبىلدىردى.

"بۇگىن تاڭعى 5-تە تۇردىم، كەشكى 9:30-عا دەيىن اۆتوبۋس جۇرگىزەمىن. جانىمدا كومەكشىم بولسا، جۇمىس اۋىر ەمەس. ءبىراق ول بولماعان كەزدە 2-3 كۇن جۇمىس ىستەيمىن. اۆتوبۋس جۇرگىزگەنىمە 10 جىل بولدى. ەگەر شارشايتىن بولسام، باسشىلىقتان دەمالىس سۇرايمىن. بۇگىن 6 ساعات ۇيىقتادىم"، - دەيدى قاھارمان يمانبايەۆ.

№1 اۆتوبۋس پاركىنىڭ №18 مارشۋرت جۇرگىزۋشىسى جولدانعار ماعزۇموۆ جولدا وتە سابىرلى بولۋ قاجەت ەكەنىن ايتتى. اۆتوبۋس جۇرگىزگەنىنە 18 جىل بولعان جۇرگىزۋشىنىڭ پىكىرىنشە، بۇل جول اپاتىنىڭ الدىن الۋعا سەپتىگىن تيگىزەدى.

"ءبىزدىڭ جۇمىستا وتە سابىرلى بولۋ كەرەك، ءارى ەشتەڭەگە رەنجىمەگەن ابزال. سونداي-اق دەنساۋلىعىڭدى دا كۇتىپ جۇرگەن ءجون. قايعىلى وقيعانىڭ ۆيدەوسىن بارلىعى كوردى. جول اپاتىنىڭ نەدەن بولعانىن ءبىر اللا بىلەدى"، - دەپ تۇيىندەدى ءسوزىن تاجىريبەلى جۇرگىزۋشى.

"استانا LRT" كومپانياسىنىڭ مالىمەتىنە سايكەس، قالادا بۇگىندە 8 اۆتوبۋس پاركى بار ەكەن. وندا جالپى 1694 اۆتوبۋس جۇرگىزۋشىسى جۇمىس ىستەيدى.

ايتا كەتسەك، كەشە نۇر-سۇلتان قالاسىندا 3 اۆتوبۋس، جەدەل جاردەم كولىگى جانە جەڭىل كولىك جانتۇرشىگەرلىك اپاتقا ۇشىرادى. سالدارىنان 53 جاستاعى اۆتوبۋس جۇرگىزۋشىسى مەن 26 جاستاعى جولاۋشى قىز قازا تاۋىپ، 27 ادام زارداپ شەكتى.

ۇسىنعان: اسەل بولات قىزى