تۇركياداعى ءتۇرلى قاۋىمداستىق وكىلدەرى نۇرسۇلتان نازاربايەۆتىڭ قىزمەتتەن كەتۋىن قانداستاردىڭ قالاي قابىلداعانىن جەتكىزدى دەپ حابارلايدى Qamshy.kz اقپارات اگەنتتىگى ♦sputniknews.kz سايتىنا سىلتەمە جاساپ.
تۇركيا Salihli قازاق قاۋىمداستىعى، قازاق-تۇرىك قورى جانە قازاق-تۇرىك ءبىلىم جانە زەرتتەۋ قاۋىمداستىعىنىڭ رەسمي وكىلدەرى شۇكىر ءالى ەرەن، فازىل توپلى جانە شابان سەركان دينچتۇرك تۇركياداعى قازاقتاردىڭ ەل پرەزيدەنتىنىڭ قىزمەتىنەن كەتۋ تۋرالى شەشىمىنە قامىعىپ وتىرعانىن جەتكىزدى. دەسە دە، بۇل شەشىمدى نۇرسۇلتان ءابىش ۇلى نازاربايەۆتىڭ حالىق پەن ەلدىڭ كەلەشەگى ءۇشىن قابىلداعانىنا سەنىمدى ەكەنىن ايتىپ ءوتتى.
"قۇرمەتتى قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى! دارا دا دانا تۇلعا ەلباسىمىز، اتاجۇرتىمىز ءسىزدىڭ كوشباسشىلىعىڭىزدىڭ ارقاسىندا تاۋەلسىزدىگىن العان ساتتەن باستاپ كۇننەن-كۇنگە كۇشەيىپ، دامىپ كەلەدى. ارينە، مۇنىڭ بارلىعى ءسىزدىڭ كورەگەن ساياساتىڭىزدىڭ، حالقى مەن وتانىن بارىنەن قىمبات تا جوعارى تۇتقان مەملەكەت قايراتكەرى رەتىندە بۇكىل تالانت پەن كۇشىڭىزدى سارقي جۇمساۋىڭىزدىڭ ارقاسىندا ىسكە استى.
قازاقستان رەسپۋبليكاسى كوپ ۇلتتى مەملەكەت بولعانىنا قاراماستان، ءسىزدىڭ تەڭگەرىمدى ساياساتىڭىزدىڭ ارقاسىندا ەلدە بەيبىتشىلىك پەن كەلىسىم ورناپ، حالىقتىڭ ىنتىماعى جاراسىپ وتىر. الەۋمەتتىك-ەكونوميكالىق جاعىنان دامىپ، ەلىمىز قازىرگى تاڭدا ەۋرازيانىڭ جارقىن جۇلدىزىنا اينالدى. ءتىپتى تاياۋ شىعىس ەلدەرى اراسىنداعى كەلىسپەۋشىلىكتى رەتتەۋدە سەنىمدى ەل بولىپ وتىر"، - دەپ جازىلعان جەدەلحاتتا.
سونداي-اق، تۇركياداعى قانداستار قازاق ەلىنىڭ تەك ءوز ايماعىندا ەمەس، بۇكىل الەمدە بەيبىتشىلىك پەن بيلىكتىڭ سيمۆولىنا اينالىپ وتىرعانىنا توقتالدى. نۇرسۇلتان ءابىش ۇلى نازاربايەۆ ەل باسقارعان جىلدارى دۇنيەنىڭ تۇكپىر-تۇكپىرىندەگى ءار قازاق "مەن قازاقپىن" دەگەن ءسوزدى ماقتانىشپەن، قايمىقپاي ايتا العان ۋاقىت بولعانىن جەتكىزدى.
"ءسىزدىڭ وسىنداي جارقىن بولاشاققا باستاعان ويلارىڭىز ەۋروپا مەن تۇركياداعى قازاقتارعا باعىت بەرىپ، جول كورسەتىپ، ءجون سىلتەۋشى بولدى جانە ءارى قاراي دا بولا بەرەدى.
تۇركيا مەن ەۋروپا قازاقتارىنىڭ بۇگىنگى جانە كەلەشەك ۇرپاقتارى ءۇشىن قازاقتان جارقىن بولاشاقتىڭ ءۇمىت كوزى بولدى. اتاجۇرتىمىزدىڭ كوك بايراعىن كوك اسپاندا ەركىن جەلبىرەتكەن، كۇش-قۋاتى مىقتى، عۇمىرىڭىزدىڭ ۇزاق بولۋىن اللا تاعالادان تىلەيمىز"، - دەپ جازىلعان تۇركياداعى قانداستار جولداعان جەدەلحاتتا.
مۇنىمەن قاتار، تۇركيا ەلىندەگى قازاقتار قازاقستان رەسپۋبليكاسىنىڭ قازىرگى پرەزيدەنتى قاسىم-جومارت كەمەلۇلىن قۇتتىقتاپ، جاڭا قىزمەتتە تابىس تىلەدى.
"اتالارىمىزدىڭ كىندىك قانى تامعان جەردىڭ تاۋەلسىز، الەمگە تانىمال، قۋاتتى جانە بەدەلدى مەملەكەت بولۋى ءبىزدى ءارقاشان قۋانتادى. سونداي-اق، وسىنداي دارەجەگە جەتكەن ەلىمىزدى شەتتە جۇرگەن ءبىز ءارقاشان ماقتان تۇتامىز. ءسىزدىڭ تاجىريبەلى، بەدەلدى ساياساتكەر جانە مەملەكەت قايراتكەرى رەتىندە ەلباسى نۇرسۇلتان نازاربايەۆ سياقتى حالقىنىڭ، ەلىنىڭ قامىن ويلايتىن، مەملەكەتىمىزدىڭ ەكونوميكالىق، ساياسي جانە الەۋمەتتىك تۇرعىدان مىقتى ەل بولۋى ءۇشىن ەڭبەك ەتىپ، ونەگەلى ىستەر اتقارۋعا بار كۇشىڭىزدى سالاتىنىڭىزعا شىن جۇرەكتەن سەنەمىز"، - دەلىنگەن جەدەلحاتتا.
ءارى قاراي جىراقتا جۇرگەن قانداستار ەلوردا اتاۋىن وزگەرتۋ تۋرالى شەشىمنىڭ تۇڭعىش پرەزيدەنتكە دەگەن شەكسىز قۇرمەت ەكەنىن ايتىپ ءوتتى. بۇدان وزگە قازاقستاننىڭ ءار سالادا دامىپ، العا جىلجىپ، جاڭا جەتىستىكتەرگە جەتۋى ءۇشىن ءارقاشان ءوز ۇلەسىن قوسۋعا دايىن ەكەنىن جەتكىزدى.
"بۇگىنگە دەيىن اتقارعان قىزمەتتەرىڭىز جانە ەلگە سىڭىرگەن ەڭبەكتەرىڭىز ارقىلى قازاق حالقىنىڭ سۇيىسپەنشىلىگىنە بولەنگەن سىزگە اللا تاعالادان عۇمىرىڭىزدىڭ ۇزاق بولۋىن، دەنىڭىزدىڭ ساۋلىعىن، وسى جاۋاپتى قىزمەتتە تابىستى جانە ابىرويلى بولۋىڭىزدى تىلەيمىز. قازاق ەلىنىڭ كوك بايراعى اشىق اسپان استىندا ماڭگىلىك جەلبىرەي بەرۋىنە تىلەكتەسپىز"، - دەيدى تۇركياداعى قازاقتار.
نۇرسۇلتان نازاربايەۆ 2019 جىلدىڭ 19 ناۋرىزىندا پرەزيدەنت رەتىندە وكىلەتتىگىن توقتاتتى. دەسە دە، ول قازاقستاننىڭ تۇڭعىش پرەزيدەنتى – ەلباسى (ۇلت كوشباسشىسى) مارتەبەسىنە، بۇعان قوسا ەلەۋلى وكىلەتتىگى بار قاۋىپسىزدىك كەڭەسىن ءومىر بويى باسقارۋ قۇقىعىنا يە. سونىمەن قاتار، "نۇر وتان" پارتياسىنىڭ ءتوراعاسى، كونستيتۋسيالىق كەڭەستىڭ مۇشەسى.
ۇسىنعان: ماقپال سەمباي
