29 ناۋرىزدا، وبلىس اكىمىنىڭ توراعالىعىمەن سىبايلاس جەمقورلىققا قارسى كۇرەس جونىندەگى وبلىستىق كوميسسيانىڭ وتىرىسى ءوتتى دەپ حابارلايدى Qamshy.kz اقپارات اگەنتتىگى.

مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل بويىنشا اتىراۋ وبلىستىق دەپارتامەنتىنىڭ باسشىسى توقتامىس جۇماعۇلوۆ سىبايلاس جەمقورلىق بۇزۋشىلىقتارى دەرەكتەرىن ازايتۋ باعىتىندا اتقارىلعان جۇمىستار تۋرالى ايتتى.

- وتكەن جىلى وبلىستا 132 سىبايلاس جەمقورلىق دەرەگى تىركەلدى. نەگىزىنەن تۇرعىن ۇي-كوممۋنالدىق، جەر قاتىناستارى سالالارىندا. بۇل فاكتورلارعا ىقپال ەتەتىن بىرنەشە سەبەپتەر بار، سونىڭ ىشىندە مەملەكەتتىك قىزمەتشىلەردىڭ وزدەرىنىڭ بىلىمدەرى، دايىندىق دەڭگەيى، - دەپ اتاپ ءوتتى ت.جۇماعۇلوۆ.

اتىراۋ وبلىسىنىڭ اكىمى نۇرلان نوعايەۆ قاراماعىنداعىلاردى ءوز مىندەتتەرىن ورىنداۋعا جاۋاپكەرشىلىكپەن قاراۋعا شاقىردى.

- مەملەكەتتىك قىزمەتشىلەرگە قويىلاتىن تالاپ جوعارى. ءار مەملەكەتتىك قىزمەتشى وزىنە جۇكتەلگەن مىندەتتى ورىنداۋعا جاۋاپكەرشىلىكپەن قاراۋى كەرەك. قازاقستان پرەزيدەنتى جاقىندا وبلىس اكىمدەرىمەن كەزدەسۋىندە وسىعان جەتە ءمان بەردى. پرەزيدەنت الەۋمەتتىك جەلىلەردە بەلسەندىلىك تانىتىپ، جۇرگىزىلىپ جاتقان مەملەكەتتىك ساياساتتى ءتۇسىندىرۋدى، حالىقپەن كەرى بايلانىس ورناتۋدى باقىلاۋدا ۇستاۋدى تاپسىردى، - دەدى نۇرلان نوعايەۆ.

قازاقستان پرەزيدەنتى اكىمدەرگە تۇرعىندارمەن بايلانىستىڭ جاڭا كەزەڭىنە وتۋدە جەدەل ارەكەت ەتۋدى تاپسىردى. ايماق باسشىلارىنىڭ ازاماتتارمەن جەكە بايلانىس ورناتۋى ماڭىزدى.

- بيلىكتىڭ بۇل ارەكەتتەرىنىڭ ءبارى سىبايلاس جەمقورلىقتى ازايتۋعا باعىتتالادى. كوپ ماسەلەنى ونلاين رەجيمدە شەشۋگە بولادى. بارلىق باسقارما باسشىلارىنا، اۋدان اكىمدەرىنە اشىق بولۋدى، جينالىستا ايتىلعان ماسەلەلەرگە نازار اۋدارۋدى تاپسىرامىن، - دەدى ايماق باسشىسى.

بۇگىندە حالىقتىڭ 80%-ى مەملەكەتتىك قىزمەتتەردى ەلەكتروندى تۇردە الادى. بۇل اتقارۋشىلارمەن تىكەلەي بايلانىس تاۋەكەلدەرىن تومەندەتەدى. جەر تەلىمىن الۋ كەزەگىنە تۇرۋ، بالاباقشا كەزەگى سەكىلدى قىزمەتتەر اتىراۋ وبلىسىنىڭ گەوپورتالى ارقىلى جۇزەگە اسادى. ايماق باسشىسى باسقا باعىتتار بويىنشا دا جۇمىستاردى جەدەلدەتۋدى تاپسىردى. وبلىستىڭ ءار تۇرعىنى ءوز ماسەلەلەرىنە جەدەل، ناقتى جاۋاپ الۋلارى ءتيىس.

- ءقازىر الەۋمەتتىك جەلىلەر ارقىلى ماسەلەلەر شەشىلىپ جاتىر. Telegram جەلىسىندەگى «اتىراۋ وبلىستىق اكىمدىگى» قوسىمشاسىنا تۇرعىنداردان ساۋالدار كوپ تۇسەدى. تۇرعىن ۇي-كوممۋنالدىق شارۋاشىلىعى، جەر تەلىمدەرىن، باسپانا ءبولۋ سالارىندا. تۇرعىنداردىڭ ساۋالدارىنا جەدەل جاۋاپ بەرۋ ارقىلى كوپ ماسەلەلەردى شەشەمىز ، - دەيدى نۇرلان نوعايەۆ. – بۇل الدىڭعى كەزەكتە شەشىلۋى ءتيىس باعىتتاردى كورسەتەدى. بارلىق باسشىلارعا ءوز قىزمەتتەرىنە ىشكى تالداۋ جۇرگىزۋ كەرەكتىگىن ەسكەرتەمىن. Telegram-دا ءار اۋداننىڭ چات-كانالى اشىلدى. ءقازىر ازاماتتارمەن قالاي جۇمىس ىستەپ جاتقاندارىڭىزعا قاراپ وتىرمىز، كەيبىر اۋدانداردا تەك قولايلى ساۋالدارعا جاۋاپ بەرۋ كەزدەسۋدە. بۇلاي بولمايدى. ەسكەرتۋدى قاپەرگە الماعان باسشىلارعا شارا قولدانىلادى.

اتىراۋ وبلىسى اكىمدىگىنىڭ باسپا ءسوز قىزمەتىنىڭ حابارلاۋىنشا، بارلىق اۋدان اكىمدەرىنىڭ چات-كانالدارى بويىنشا تالداۋ جۇرگىزىلەدى، سونىڭ نەگىزىندە ءار اۋداننىڭ اشىقتىق رەيتينگى جاسالادى.

ۇسىنعان: گۇلىم جاقان