جاس ءانشى ءابدىجاپپار ءالقوجا جۋىردا «ءومىر مەن ونەر» باعدارلاماسىنا بەرگەن سۇحباتىنداعى قوجالار جايىندا ايتقان سوزدەرى ءۇشىن حالىقتان كەشىرىم سۇرادى دەپ جازادى Qamshy.kz اقپارات اگەنتتىگى. ءانشىنىڭ كەشىرىم سۇراعان ۆيدەوسىن جۋرناليست ءاليا قۇدايبەرگەنوۆا Facebook-تەگى پاراقشاسىندا جاريالادى. 

«ونەر مەن ءومىر» باعدارلاماسىنان كەيىن مەن تۋرالى ءتۇرلى سىني پىكىرلەر ايتىلا باستادى. نەگىزى ول باعدارلامادا ماعان «قوجا تەك قوجادان قىز الادى دەۋشى ەدى. ول ءۇردىس ءقازىر بۇزىلدى ما؟» دەگەن سۇراق قويىلعان بولاتىن. مەن وندا قوجالاردىڭ ارعى جاعىن ايتا كەلىپ، قازاقپەن بىتە قايناسىپ، قازاقتىڭ ورتاسىندا قازاق بولا جۇرگەنىن ايتقىم كەلگەن. مەن ەشقاشان «ارابپىن» دەپ كەۋدەمدى كوتەرگەن ەمەسپىن. مەن – قازاقپىن.

جاڭىلمايتىن جاق، سۇرىنبەيتىن تۇياق بولمايدى. جاڭىلعان تۇستارىم بار. مەنى ءابدىجاپپار ەتىپ كوتەرگەن حالقىم. الايدا ىرىتكى سالاتىن جاندار دا بار. مەن ەندى عانا ءوسىپ كەلە جاتقان جاستارىڭىزدىڭ ءبىرىمىن. سوزدەن قاتەلەسسەم، كەشىرىم سۇرايمىن. ەشقانداي ارام ويىم جوق!» - دەگەن ءانشى «ءتىرى جۇرسەم، قازاقى جاقسى كورەتىنىمدى ءالى تالاي دالەلدەرمىن» دەپ ءسوزىن قورىتىندىلادى.

♦"ءابدىجاپپار ءالقوجا، حالىق الدىندا كەشىرىم سۇرا..." - زاڭگەر

ايتا كەتەيىك، بىرنەشە كۇن بۇرىن ءانشى ءابدىجاپپار ءالقوجا "31" ارنانىڭ "ءومىر مەن ونەر" باعدارلاماسىندا قوجالار جايلى ەل اراسىندا ايتىلا بەرمەيتىن جايتتاردى اتاپ بەرگەن بولاتىن. ءانشىنىڭ "قوجالار قازاقتان قىز الىپ، قان بۇزىلدى" دەگەن ءسوز حالىق اراسىندا داۋعا ۇلاسىپ، ءالقوجانىڭ ساحنادان كەتۋىن دە تالاپ ەتكەندەر بولدى. 

ۇسىنعان: گۇلىم جاقان