ەلوردا اۋەجايى اس ىشۋدە تالعامپاز جولاۋشىلارعا ايىرىقشا كوڭىل بولۋدە. قازىرگى كەزدە ءدامدى اس ءىشۋدى قالايتىندارعا ارنالعان بىرنەشە مەيرامحانا، كافەلەر مەن اسحانالار بار. كوفە ءدامىن ۇناتاتىن قوناقتار ءۇشىن "Marrone Rosso" ەسىگىن ايقارا اشتى.

نۇرسۇلتان نازاربايەۆ حالىقارالىق اۋەجايى باسقارما ءتوراعاسى رادىلبەك ءاديمولدا قوعامدىق تاماقتانۋ ورىندارى اشىلعان كەزدە جولاۋشىلاردىڭ بارلىق ساناتتارىنىڭ قاجەتتىلىكتەرىن ەسكەرۋ كەرەك ەكەنىن اتاپ ايتتى.

«حالىقارالىق تاجىريبەگە سۇيەنسەك، اۋەجايدا جولاۋشىلار رەستوراندار مەن كافەلەرگە ۇشاردان بۇرىن بارادى. ارينە، ۇشۋ قاتاڭ تۇردە رەتتەلەدى جانە تاماقتانۋعا ۋاقىت از قالادى. سوندىقتان، مەيرامحانالار نەمەسە كافەلەر جولاۋشىلارعا تەز جانە ساپالى قىزمەت كورسەتۋى كەرەك. وسى سەبەپتى Marrone Rosso سياقتى ساپا ستاندارتتارىنا يە برەندتەردى شاقىرامىز»، - دەدى.

رادىلبەك ءاديمولدا سونداي-اق، حالىقارالىق اۋەجاي تەرمينالىندا بىرنەشە قوعامدىق تاماقتانۋ ورنى بار ەكەنىن جانە ولاردىڭ باعا ساياساتى استانالىق مەكەمەلەردەن ايتارلىقتاي ايىرماشىلىعى جوق ەكەنىن اتاپ ءوتتى. جاڭا كوفەحانانىڭ ءمازىرى يتاليالىق، شىعىس ەلدەرى جانە ەۋروپا اسحانالارى تاعامدارىنان تۇرادى. جولاۋشىلارعا ىڭعايلى بولۋى ءۇشىن تاۋلىك بويى جۇمىس ىستەيدى.

«Marrone Rosso جاي عانا كوفەحانا ەمەس، بىزدە مەيرامحانا جابدىقتارى بار – تاڭعى اس، تۇسكى اس جانە كەشكى استى دا ۇسىنامىز. ءارى ءبىز 24 ساعات جۇمىس ىستەيمىز. ۇشاقتار تاۋلىك بويى ۇشادى، ال حالىقارالىق رەيستەردىڭ كوبى ءتۇن كەزىندە  بولعاندىقتان، ءبىز قوناقتاردىڭ ءۇمىتىن اقتاۋعا تىرىسامىز. وسىندا جولاۋشىلار اعىمى ۇلكەن، سوندىقتان ۋاقىت ءتارتىبىن ساقتاۋ كەرەك. بۇل دا اۋەجاي كوفەحاناسىنىڭ ايرىقشا ەرەكشەلىگى»،- دەدى اشىلۋى كەزىندە اكسيونەر مەدەت تولەگەنوۆ.

جاڭا تاماقتانۋ ورىنى حالىقارالىق تەرمينالدىڭ ءۇشىنشى قاباتىندا ورنالاسقان جانە 70 ادامعا ارنالعان. ەسكە سالا كەتەيىك، Aroma Group / Marrone Rosso عالامدىق جەلىسىنىڭ يزرايل، اقش، كانادا، ۋكراينا جانە قازاقستان ءتارىزدى ەلدەردە 150 كوفەحاناسى بار.