"عاسىر ۇستازى" 13 مىڭ، "الاش ۇستازى" 10، "ۇلت ۇستازى" 5 مىڭ تەڭگە. الەۋمەتتىك جەلىدە وسىنداي جارنامالاردان كوز سۇرىنەدى. ساندارعا سەنسەك، وسىنشا اياۋلى اتاقتى ساتىپ العان 2 مىڭعا جۋىق ۇستاز بار ەكەن. دەگەنمەن كەز كەلگەن قازاقتان ۇلت ۇستازى كىم دەپ سۇراساڭىز، مۇدىرمەستەن احمەت بايتۇرسىن ۇلى دەيدى. سەبەبى بۇنداي اتاقتى حالىق ءوزى بەردى. ال وسىنداي قاستەرلى اتاقتى مەدال ەتىپ، تاعىپ جۇرگەندەر كىمدەر؟ ونى ساۋدا سالعانداردىڭ ءىسى قانشالىقتى زاڭدى؟ بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىن نەگىزگە الا وتىرىپ حابارلايدى.

بۇگىندە ەلىمىزدە مەدال ساۋداسى ۇيرەنشىكتى دۇنيەگە اينالعانداي. وعان ءتىپتى ءمان بەرمەيتىندە بولدىق. "قازاقستاننىڭ قۇرمەتتى ازاماتى"، "قايراتكەر ايەل"  تاعىسىن تاعى. ءبىراق بۇل جولعىسى كوپتىڭ شامىنا تيگەنى ءسوزسىز.  عاسىر ۇستازى  13 مىڭ، الاش ۇستازى  10 مىڭ تەڭگە. مۇنى كورگەن جەلى قولدانۋشىلارى وسىنشا اياۋلى اتتى تيىن-تەبەنگە ساتقان جەكەمەنشىك كومپانيانى جەردەن الىپ جەرگە سالۋدا.  

اياتجان احمەتجان، قوعام بەلسىندىسى:  "ولار دا وزدەرىن اقتاپ الاتىن جولدار تابادى. سەبەبى گازەتكە ماقالا بەرۋىڭ كەرەك، جۋرنالدارعا ماقالا بەرۋىڭ كەرەك، ۇزدىك شىعارماشىلىق كونكۋرسىنا قاتىسۋىڭ كەرەك. ەندى ول جەردە بەلگىلى ءبىر دەڭگەيدە ادىلەتتى شىعار وزدەرى ءۇشىن، ءيا ءمۇعالىم وعان ەڭبەكتەنىپ، ماقالا جازاتىن شىعار. ءبىراق ءبىر ماقالا مەن ءبىر اشىق ساباقپەن عاسىر ۇستازىن انىقتاپ تاستايتىن بولسا، وندا كوز مايىمىزدى كۇنى- ءتۇنى سارقىپ، كىتاپ جازىپ، بالا وقىتىپ نە ىستەپ ءجۇرمىز؟ ماقالا جازىپ جاتايىق."

ساندارعا سەنسەك، تەك بۇگىننىڭ وزىندە ەلىمىز بويىنشا 600 الاش ۇستازى، 925 ۇلت ۇستازى مەن 425 عاسىر ۇستازى بار ەكەن. سوندا ارزان اتاققا كىمدەر قۇمار؟

ەربول ىرگەباي، قوعام بەلسەندىسى: "بىرنەشە جىل بويى جۇمىس ىستەپ، زەينەت جاسىنا جەتىپ، ءبىراق ەشتەڭەگە ىلىنبەدى. سودان كەيىن «اي، وسىنى الايىق" دەيتىن شىعار كەيبىرەۋلەر ەندى شىنىندا دا، زاتىندا. ءوزى سول شەنقۇمارلاۋ، اتاققۇمار ادامدار بولادى". وردەندەر  مۇعالىمدەردىڭ كونفەرەنسيالارىندا، ءتۇرلى الەۋمەتتىك جەلىدەگى چاتتاردا  ۇسىنىلىپ، اشىقتان-اشىق ساۋدالانادى ەكەن. ويتكەنى  زاڭ بويىنشا، مۇنداي ماراپاتتى ساتىپ جۇرگەن قوعامدىق ۇيىمدارعا  جازا جوق كورىنەدى.

احمەتجان بەيسەنبەكوۆ، زاڭگەر: "الاش ۇستازى"، "عاسىر ۇستازى" دەگەن ناگرادالارعا تىيىم سالىنباعان. سوندىقتان دا ءتۇرلى قوعامدىق ۇيىمدار، بەلگىلى ءبىر وداقتار، اسسوسياسيالاردىڭ وسىنداي ناگرادالار تاعايىنداۋعا مۇمكىندىگى بار"

ال 20 جىلدان استام ۇستازدىق ەتىپ كەلە جاتقان دامەش ومىربەك قىزى مۇعالىمدەردى مەملەكەت باعالاماعاننان كەيىن، كاسىپكەرلەر مەدال ساتۋدى بيزنەسكە اينالدىرعان دەگەن پىكىردە. 

دامەش ومىربەك قىزى، ۇستاز: "ءبىزدىڭ قازاقتا باتا بار "اتقان تاڭنىڭ ارايىنا بولەندە، ەڭبەگىڭمەن ەلەن" دەيدى. ەڭبەگىمەن ەلەنىپ وتىرسا، ول ونداي شاراعا بارماس ەدى، ونداي جولعا تۇسپەس ەدى. ءبىراق ول تۇبىندە دۇرىس ەمەس. ول ەندى ۇستازدىڭ قيىن جاعدايىن وسال جاعىن ءبىلىپ، بيزنەسمەندەردىڭ ىستەپ وتىرعان جاعدايى".

ال، ءبىلىم جانە عىلىم ءمينيستىرى كۇلاش ءشامشيدينوۆا  مۇعالىمدەردىڭ ەرەڭ ەڭبەگى ءۇشىن  مەملەكەت تاراپىنان بەرىلەتىن 2 عانا ناگرادا بار، دەيدى. 

كۇلاش ءشامشيدينوۆا، ق ر ءبىلىم جانە عىلىم ءمينيسترى:  "مينيسترلىك تاراپىنان بەرىلەتىن ناگرادالاردى بىلەسىزدەر، ول "ءبىلىم بەرۋ ءىسىنىڭ ۇزدىگى" جانە "التىنسارين توسبەلگىسى". باسقا ەشقانداي اتاقتارعا ءبىزدىڭ قاتىسىمىز جوق". ال پەدوگوگ سايات يبرايەۆ قوعامدىق ۇيىمدار تۇرماق، مەملەكەتتىڭ ءوزى مۇعالىمدەرگە بەرەتىن ناگرادالار قۇنىن الدەقاشان جوعالتقانىن ايتادى. ءتىپتى ەش پايداسى جوق تەمىر-تەرسەككە اينالعان دەپ اشىنىپ وتىر. 

سايات يبرايەۆ، پەداگوگ: "مۇعالىمدەردىڭ اراسىنداعى الىنىپ جاتقان مەملەكەتتىك مەدالداردىڭ قۇنى جوق. وعان اقشا تولەنبەيدى. مىسالى پەداگوگ ىبىراي التىنسارين اتىنداعى مەدال الدى ما، وعان سىزگە جالاقىڭىزعا ەشتەڭە قوسىلمايدى".

ورنىمەن بەرگەن اتاق تا، سىيلىق تا ادامنىڭ مەرەيىن وسىرەرى حاق. ءبىراق ءبىز تىلدەسكەن جانداردىڭ بارلىعى  ونىڭ ءوز ولشەمى بولۋ كەرەك دەگەن پىكىردە. سوندىقتان بۇل ماسەلە زاڭ اياسىندا رەتتەلۋى كەرەك. ايتپەسە، ەلىمىزدە اتاقسىز ادام قالمايتىن سەكىلدى.

ۇسىنعان: فاريزا جومارت قىزى