وزبەك باسشىسى شاۆكات ميرزيەيەۆ تاعى دا جۇرت نازارىندا!
بۇ جولى كورشى ەل پرەزيدەنتى شەنەۋنىكتەرگە وزىنە قوشەمەت كورسەتىپ، قولپاشتاپ وتىرۋعا تىيىم سالدى.
ءارى بۇل ونىڭ ماقتاۋ مەن ماداقتى سۋقانى سۇيمەيتىندىگىن بىلدىرگەن العاشقى ارەكەتى ەمەس!
داۋدىڭ باسى وسىدان بىرنەشە اي بۇرىن وزبەك ءانشىسى ديلفۋزا يسمويلوۆانىڭ پرەزيدەنتكە ارناعان بەينەكليپىنەن باستالعان ەدى.ول وندا شاۆكات ميرزيەيەۆتى الەمنىڭ سۇلتانىنا تەڭەيدى. الايدا، ءانشىنىڭ بۇل ارەكەتى وزىنە ۇناعانىمەن، پرەزيدەنتكە جاقپاي قالعان كورىنەدى. ويتكەنى بۇل بەينەكليپتەن كەيىن مەملەكەت باسشىسىنا ماقتاۋ مەن ماداق ايتقان بۇلبۇلداردىڭ بۇدان بىلاي ليسەنزيالارى تارتىپ الىناتىندىعى ايتىلدى.
«ميرزيەيەۆتىڭ بۇل مالىمدەمەسى جالپى وسى وزبەكستاننىڭ جاڭا پرەزيدەنتىنىڭ بيلىككە كەلگەننەن باستاپ جۇرگىزىپ كەلە جاتقان جاڭا ءبىر ساياسي ەكونوميكالىق كۋرسىنان حابار بەرەدى. سەبەبى بيلىككە كەلگەن كۇننەن باستاپ شاۆكات ميرزيەيەۆ كەلەسىدەي لوزۋنگتى ۇسىنعان بولاتىن. مەملەكەتتىك ورگاندار، حالىق مەملەكەتتىك ورگاندارعا جۇمىس جاساماۋ كەرەك، مەملەكەتتىك ورگاندار حالىققا جۇمىس جاساۋ كەرەك دەگەن. جانە وسى باعىتتا كوپتەگەن مالىمدەمەلەر جاسالدى»، - ق ر تۇڭعىش پرەزيدەنتى قورى جانىنداعى اەسي ساراپشىسى جۇمابەك سارابەكوۆ.
ەسەسىنە، ماقتاۋدىڭ كوكەسىن ءقازىر مەملەكەتتىك قىزمەت ىستەرى جانە جەمقورلىققا قارسى ءىس-قيمىل اگەنتتىگى ەستىپ جاتىر! جىگىتتەر پاراقورلىقپەن كۇرەسۋدىڭ ءتيىمدى تەتىگىن تاپقان كورىنەدى.
"وسىنداي جاڭا جوبانى ويلاپ تابۋداعى باستى ماقساتىمىز تۇرمىستىق جەمقورلىقتى تۇبەگەيلى جويۋ. ءقازىر وسىنداي لوگوتيپتەر ارقىلى جۇمىسىن جۇزەگە اسىراتىن جوبالىق كەڭسە بۇكىل رەسپۋبليكا بويىنشا ىسكە قوسىلدى. جۇمىسىن ىستەپ جاتىر. جوبانىڭ اۋماقتى قىزمەتىن قامتاماسىز ەتۋ ءۇشىن ءبىزدىڭ اگەنتتىك جەكە برەند رەتىندە قالىپتاستىرۋعا شەشىم قابىلدادى"، - دەدى ق ر مەملەكەتتىك قىزمەت ىستەرى جانە جەمقورلىقا قارسى ءىس-قيمىل ءتوراعاسىنىڭ كەڭەسشىسى نۇرلان جاقسىمبەتوۆ.
دەسە دە، حابارلىندىرۋلاردى ەمودجيلارمەن جازۋ ارقىلى جەمقورلىقتى ازايتامىز دەگەن ولاردىڭ بۇل پايىمىنا وزدەرىنەن باسقا ەشكىم سەنبەيتىن سياقتى.
«بىلمەيمىن ەندى. سمايليكتى تۇسىنەتىن ادام بار، تۇسىنبەيتىن ادام بار. بىزدەرگە قالاي ول؟»
«بارلىق ادامدار تۇسىنبەيدى. مىسالى، قارت ادامدار تۇسىنبەۋى مۇمكىن دە».
«بۇل سمايليكتەردى قويۋ ارقىلى جەمقورلىقتى جەڭۋ مۇمكىن ەمەس دەپ ەسەپتەيمىن ءبىرىنشى كەزەكتە. سەبەبى كوررۋپسيانى جەڭۋدىڭ جولى مۇلدەم باسقا. كوررۋپسيانىڭ دۇرىس ەمەس ەكەنىن جەتكىزۋ جولدارىنىڭ ىشىندە جاستارعا ارنالىپ تاڭدالىپ جاتسا ەندى بۇل قانداي ماماندارمەن كەلىسىلگەن ەندى ول پسيحولوگتارمەن كەلىسىلىپ الىندى ما؟ ءبىراق بۇل جاڭاشىلدىقتىڭ قازىرگى زاماننىڭ تالابى دەپ قابىلداعان شىعار دەپ ويلايمىن»، - دەيدى الەۋمەتتانۋشى سايات بايمۇراتوۆ.
ۇسىنعان: گۇلىم جاقان
پىكىر قالدىرۋ