اقش-تىڭ زەينەتكەر سەرجانتى ريچارد "ماك" ماككيني ينديانا شتاتىنداعى مانسي يسلام ورتالىعىنىڭ پرەزيدەنتى بولىپ قىزمەت اتقارادى. قازىرگى تاڭدا ول يسلام ءدىنىن ناسيحاتتاۋعا بار كۇشىن سالىپ ءجۇر دەپ جازادى Qamshy.kz اقپارات اگەنتتىگى azan.ru سايتىنىڭ دەرەگىن نەگىزگە الىپ.  

الايدا وسىدان 8 جىل بۇرىن جاعداي مۇلدەم باسقاشا بولدى. سول جىلدارى ماككيني يسلام ءدىنىن جەك كورگەنى سونشالىق، مەشىتتى جارىپ  جىبەرگىسى كەلگەن. 

"كوپتەگەن ادامدارعا 8 جىل بۇرىنعى وقيعانى ايتسام سەنبەيدى. سول جىلدارى يسلام دىنىنە دەگەن جەككورىنىش سەزىمى كۇننەن كۇنگە ۇلعايا ءتۇستى. الايدا جەككورىنىش سەزىمى ارقىلى مەن يسلام دىنىنە كەلدىم. سەبەبى سول ارقىلى مەنىڭ يسلامعا دەگەن قىزىعۋشىلىعىم ارتتى"، - دەيدى 49 جاستاعى ماككاني. 

كوپتەگەن جىلدار بويى ماككاني تاياۋ شىعىستاعى قىزمەت ەتتى. الايدا ارنايى وپەراسيالارعا قاتىسپادى. 

"سول كەزدەرى مەن ەشكىمگە ايتقىم كەلمەيتىن نارسەلەردى كوردىم. وعان دەيىن مەندە يسلامعا دەگەن جەككورىنىش سەزىمى بولماعان ەدى. ءبىراق كوپتەگەن جايتتارعا كۋا بولعان سوڭ مەن يسلامنىڭ حاس جاۋىنا اينالدىم. تاياۋ شىعىستاعى كورگەن وقيعالار وسىعان سەبەپ بولدى"، - دەيدى زەينەتكەر سەرجانت. 

اراعا ءبىراز ۋاقىت سالىپ ول ءوز ەلىنە ورالادى. سول كەزدە ماككاني مەشىتتى جارۋعا جوسپار قۇرادى. ءتىپتى،  تەراكتى جاساعانى ءۇشىن تۇرمەگە وتىرۋى مۇمكىن ەكەنىن دە بىلگەن. الايدا بۇل ونى توقتاتا المادى. ءتىپتى ءولىم جازاسى دا بۇل جوسپارىنا كەدەرگى بولماعان. ماككانيدىڭ بۇل جوسپارى تۋرالى ونىڭ ايەلى ءبىلىپ قويىپ، كۇيەۋى ءۇشىن قاتتى قورقادى. كەيىننەن فبر ءبىلىپ قويادى. ماككانيدى تەرگەۋگە العانىمەن، ناقتى دالەلدى تابا الماعاندىقتان، ونى بوساتقان. 

كەيىن ول كوكەيىندە جۇرگەن بىرنەشە سۇراقتاردىڭ جاۋابىن الۋ ءۇشىن مەشىتكە بارادى. مەشىتتەگى مۇسىلماندار ونى جاقسى قارسى الىپ، جىلى قابىلدايدى. العاشقى ۋاقىتتا ماككاني قاتتى قوبالجيدى. ءبىر توپ مۇسىلماندارمەن ءبىر بولمەدە وتىرۋ ول ءۇشىن قيىنعا سوققان. ءبىراق ماككانيگە مۇسىلماندارمەن اڭگىمەلەسۋ قاتتى ۇناي باستايدى. ءتىپتى مەشىتتە ساعاتتاپ وتىرۋدى ادەتكە اينالدىرىپتى. اراعا كوپ ۋاقىت سالماي مۇسىلماندىقتى قابىلداۋعا شەشىم قابىلدايدى. 

بىرنەشە ۋاقىتتان كەيىن ماككاني جەرگىلىكتى مۇسىلمان ستۋدەنتتەر اسسوسياسياسىنىڭ پرەزيدەنتى بولىپ تاعايىندالدى. ال 2014 جىلى ونى يسلام ورتالىعىنىڭ پرەزيدەنتى بولدى. 

ال ءقازىر ريچارد ماككيني ۋمار سايد ەسىمىمەن تانىمال. ونىڭ يسلام ورتالىعىنداعى پرەزيدەنتتىك وكىلەتتىلىگى بيىل اياقتالعانىمەن، يسلامعا قىزمەت ەتۋدى جالعاستىرادى. ال ونىڭ تاڭعاجايىپ وقيعاسى مۇسىلماندارعا دا، باسقا مۇسىلمان ەمەس ادامدارعا دا شابىت سىيلايتىنى انىق. 

اۋدارعان: اسەل بولات قىزى