جۇكتى ايەلدەرگە بەرىلەدى دەگەن 425 مىڭ تەڭگەنى الۋدىڭ ءوز تالاپتارى بار. دەنساۋلىق ساقتاۋ مينيسترلىگىندەگىلەر بۇل قاراجات بارلىق جۇكتى ايەلدىڭ قولىنا ۇستاتىلمايتىنىن مالىمدەدى دەپ جازادى Qamshy.kz اقپارات اگەنتتىگى ەۆرازيا ارناسىنىڭ دەرەگىن نەگىزگە الىپ. 

سوڭعى كەزدەرى كوپتىڭ كوڭىلىن ەلەڭدەتكەن جاڭا باستاما قاشان جۇزەگە اسىرىلادى؟ قوماقتى قاراجات الۋعا اسىققان بولاشاق انالار نەنى ءبىلۋى ءتيىس؟ 

مامانداردىڭ دەرەگىنشە، ەلىمىزدە جۇكتى بولاتىن ايەلدەردىڭ 30 پايىزىنىڭ عانا دەنساۋلىعىندا كىنارات جوق.  ال قالعاندارى ءتۇرلى پاتولوگيامەن اۋرۋحاناعا جاتىپ، ەم-دوم قابىلداۋعا ءماجبۇر ەكەن. ويتكەنى، كوبىسىندە اۋىر ەكستراگەنيتالدى جانە دە وزگە ينفەكسيالار انىقتالعان ەكەن.

«وكىنىشكە قاراي، قىز-كەلىنشەكتەردىڭ 80-70 پايىزىنا جۋىعى جۇكتىلىكتى جوسپارلامايدى. سالدارىنان ءتۇرلى دەرتكە شالدىعادى،  ودان بولەك ىشتەگى ءسابي جەتىلمەي قالىپ، تۇسىك جاساتۋعا تۋرا كەلەدى. سوندىقتان دا جۇكتىلىكتى الدىن الا جوسپارلاعان ءجون. اياعى اۋىر ايەلدەردەن وزگە دە اۋىر سىرقاتتار كەزدەسىپ جاتادى»، — دەيدى گينەكولوگ جۇلدىز تايتەلييەۆا.

گينەكولوگتار جۇكتى ايەلدەردىڭ شامامەن 50 پايىزعا جۋىعى دەر كەزىندە تىركەۋگە تۇرمايتىنىن ايتادى. ودان بولەك، كەيدە اي-كۇنى جاقىنداعاندا كەلەتىن ارۋلار جەتەرلىك. ال مۇنداي نەمقۇرايلىق بولاشاق ءسابيدى ءتۇرلى دەرتتەن الدىن الۋ مۇمكىندىگىن شەكتەيدى دەيدى. سوندىقتان دا مينيسترلىك ايەلدەردى اكىمشىلىك جاۋاپقا تارتۋ ماسەلەسىن دە قاراستىرۋدا.

«بۇل ۇسىنىستىڭ نەگىزگى ماقساتى — انا مەن بالانىڭ دەنساۋلىعىن جاقسارتۋ. بۇگىندە ۋاقىتىلى تىركەۋگە تۇرمايتىن جۇكتى كەلىنشەكتەر كوپ. اتاپ ايتساق، ولاردى دەر كەزىندە ەسەپكە تۇرۋعا ىنتالاندىرعىمىز كەلەدى. سونداي-اق، دارىگەرگە قارالمايتىن، ەكپەدەن باس تارتاتىندار ءۇشىن اكىمشىلىك جاۋاپكەرشىلىك ەنگىزۋدى ۇسىندىق»، — دەدى ق ر دەنساۋلىق ساقتاۋ ءمينيسترى ەلجان ءبىرتانوۆ

ءمادينا نۇرلان جۇكتلىكتىڭ 8-9 اپتاسىندا ەمحاناعا بارىپ تىركەۋگە تۇرعان. ونىڭ ايتۋىنشا، كەز-كەلگەن بولاشاق انا جۇكتىلىككە اسا مۇقيات بولعانى ابزال. سوندىقتان دا مينيستر  ۇسىنعان ءبىر رەتتىك تولەمدى ويلاپعاننان گورى،  ايەلدەر ءوز  دەنساۋلىقتارىنا الاڭداعان ءجون دەپ ەسەپتەيدى.

«جالپى بۇل سۇراق كوپتەگەن قىز-كەلىنشەكتەردى ويلاندىرۋدا. سەبەبى بۇل قاراجاتقا كىم قول جەتكىزەدى دەگەن سۇراق تۋىندايدى. 425 مىڭ تەڭگەنى مەنىڭ ويىمشا، ءوزىنىڭ ومىرىنە، ىشىندەگى بالاسىنا ۇلكەن جاۋاپكەرشىلىكپەن قارايتىن اناعا بەرۋ كەرەك دەپ ويلايمىن»، — دەدى تۇرعىن ءمادينا نۇرلان.

وسىلايشا، مينيسترلىك جۇكتى قىز-كەلىنشەكتەردىڭ دەنساۋلىعىنا قاتىستى جاۋاپكەرشىلىگىن ارتپاق. ياعني، ءبىر رەتتىك جاردەماقى ەنگىزبەك. شارت بويىنشا اياعى اۋىر ايەل جۇكتىلىگىنىڭ 3 ايىنا دەيىن جەرگىلىكتى ەمحاناعا تىركەلۋى ءتيىس. ودان قالسا، ۋاقىتىلى دارىگەرگە قارالىپ، اناليزدەرىن  وتكىزۋى قاجەت. سوندا عانا ءبىر رەتتىك كومەكتەن ءۇمىتتى بولا الادى.

وسىلايشا جۇكتى كەلىنشەكتەردى ىنتالاندىرۋ ءۇشىن 425 مىڭ تەڭگەدەن تولەۋ كەرەك دەگەن قۇجات پارلامەنتكە ماۋسىم ايىندا عانا جەتپەك. ازىرگە بۇل ۇسىنىس تەك قوعام تالقىسىنا سالىنادى. ءبىر رەتتىك كومەكتىڭ قالاي تولەنەتىنى دە بەلگىسىز. سوندىقتان دا بولاشاق انالارعا قوماقتى قارجىدان دامەتۋ ازىرگە ەرتەرەك. شەشىم دەپۋتاتتاردىڭ قولىندا.

ۇسىنعان: اسەل بولات قىزى