"جەتىنشى ارناداعى" ءلايلا سۇلتان قىزى جۇرگىزەتىن "ءوز ويىم" توك-شوۋىنىڭ ءبىر تاقىرىبى "قىزدىق پەردە قىزىقتىرا ما؟" -  دەگەن ماسەلەگە ارنالعان بولاتىن. توك-شوۋ قىزدىڭ "ءوز قىزدىعىمدى ساتامىن" —  دەگەن جازباسىنا بايلانىستى بولعان ەدى. بۇل جاعداي كوپتىڭ اشۋىنا ءتيىپ، كوپشىلىك اتالعان باعدارلامانىڭ جابىلۋىن تالاپ ەتۋدە دەپ حابارلايدى Qamshy.kz اقپارات اگەنتتىگى.

ايگۇل ورىنبەك، زاڭگەر: ەل بولام دەسەڭ، ءلايلاڭدى تۇزە!

ۇلتىمىزدىڭ قۇرمەتتى قايراتكەرى ءلايلا سۇلتان قىزى، قازاق قىزدارىنىڭ پاكتىگىن قالاي ساتىپ جاتقاندىعىن اشىق كورسەتىپتى. ءلايلا حانىم سول پاكتىكتى ساتىپ الاتىن، ۇلكەن لاۋازىمدا وتىراتىن شەنەۋنىكتەردى دە اشىق كورسەتسەڭىزشى! سۇرانىس جوعارى بولعان سوڭ، پاكتىك ساتىلىمعا شىعىپ جاتىر ەكەن. سول پاكتىكتى ساتىپ الاتىن اعالاردى نەگە كورسەتپەيسىز؟ الدە ولارعا شاماڭىز جەتپەيدى مە؟! جالپى ۇلتتى جويۋ ساياساتى باياعىدان باستالىپ كەتكەن! اقپارات ءمينيسترى ابايەۆ قايدا قاراپ وتىر؟- دەپ جازىپ اۋرە بولماي اق قويايىن. بىزدە ەكران بەتىندە تەك بيلىككە عانا ءسوز ايتپاساڭ بولدى، قالعان بارىنە رۇقسات! ۇلتىڭدى ساتاسىڭ با؟ پاكىتىگىڭدى ساتاسىڭ با؟ ءتىپتى تىرجالاڭاش شەشىنىپ، ءسۇيىسىپ جاتاسىڭ با؟ ولارعا ءبارىبىر. "ويباي، ماسقارا جازساڭىزشى، ايتساڭىزشى"- دەپ جاتقاندارعا ايتارىم. مينيستر ابايەۆقا "قالاۋلىم " باعدارلاماسى جايلى تىكەلەي ايتتىم دا،جازدىم دا! نە وزگەردى؟ وزگەرگەن تۇكتە جوق! ولاردىڭ حالىققا قول قويعانى بار. حالىقتى وسىنداي ارزان شوۋلارمەن توپاستاندىرۋ !

قاتتى ايتسام كەشىرىڭىزدەر! باسپەن ەمەس، بۇتپەن جۇرەتىندەردىڭ زامانى بۇل! بۇتپەن جۇرەتىندەردىڭ اڭگىمەسى، سول بۇتتىڭ اينالاسىنان شىقپايدى! بۇتپەن اينالىسىپ جۇرگەن ازاماتشالارعا قايراتكەر دەگەن اتاق بەرىلىپ جاتسا، كوشەدەگى جەزوكشەلىكپەن اينالىسىپ جۇرگەن قىزدارعا كوشە قايراتكەرلەرى اتاعىن بەرەيىك! "ءوز ويىم"- دەپ لاعا بەرمەي ۇلتتىڭ يدەولوگياسىنا كوڭىل بولەتىن ۋاقىت جەتتى! قاسىم-جومارت توقايەۆ مىرزا ءبىرىنشى ەكران بەتىن تازالاۋدى سۇرايمىن!

دانا نۇرجىگىت، جۋرناليست: مىنا پاكتىكتى كورىپ وتىرىپ،تازالىقتىڭ قۇنىن تۇسىرگەن كورىنىسكە ويىم ورالا بەردى.  مەن "پاكتىگىمدى ساۋداعا سالامىن" دەگەن تاقىرىپتا باعدارلاما جاساپ، كەيىپكەرگە اقشا تولەپ،"حابار جاسادىم" دەسەم، قۇداي قارتتىق بەرىپ جاتسا،بولاشاقتا بالامنىڭ بەتىنە قاراي الماس ەدىم.  ءناجىستى لوقسىماي،جىميىپ قويىپ،ەزىپ وتىرىپ، ابىرويدى رەيتينگتەن تومەن قويۋ ءۇشىن ەت ءولىپ كەتۋ كەرەك.

ارمان سقابىل ۇلى: كوپشىلىكتىڭ، كورەرمەننىڭ، ارىپتەستەردىڭ پىكىرىنە پىسقىرمايتىنىڭدى بىلەمىن، ءلايلا سۇلتان قىزى! ءبىراق، قازاقستان رەسپۋبليكاسى ب ا ق تۋرالى زاڭىنىڭ 13 بابىنا سايكەس «...تەلەراديوباعدارلامالاردا پورنوگرافيالىق جانە ارنايى سەكسۋالدى-ەروتيكالىق تاقىرىپتى» ناسيحاتتاعانىڭىز ءۇشىن باعدارلاماڭىز جابىلىپ، قۇرىلتايشىلارىڭىز جاۋاپقا تارتىلاتىنىن نەگە بىلمەيسىز؟ ال، قىلمىستىق كودەكستىڭ 309 بابىنا سايكەس «جەڭگەتايلىق» جاساعانى ءۇشىن بەس جىلعا دەيىن باس بوستاندىعىنان ايىرادى. ءسىز شىنىمەن كەرەمەت جۋرناليست بولساڭىز ەفيردە سول سەكسۋالدى-ەروتيكالىق تاقىرىپتى قوزعاپ، ابىرويىن ساتاتىن قىزدى جارنامالاعان كەزدە وسىنى ويلاۋىڭىز كەرەك ەدى. بۇل ماسەلەگە اقپارات جانە قوعامدىق كەلىسىم مينيسترلىگى جاۋاپ بەرەدى دەپ ۇمىتتەنەمىن.

نۇربولحان شاراپوۆ: ۇلتتىق يدەولوگيانى قۇرتاتىن وسىنداي باعدارلامالاردى ەفيردەن الۋ كەرەك. قانشا دەگەنمەن دەموكراتيا بولسا دا، ءبىز قازاقپىز، نامىسىن تاپتاتپاعان ۇلى ەلدىڭ ۇرپاعىمىز. قازاق حالقى ءاۋ باستان قىزعا قىرىق ۇيدەن تيىم دەگەن. قىز ەلدىڭ ايناسى دەپ ەرەكشە كوڭىل بولگەن. قىزدىڭ ابىرويى قاشاندا جوعارى تۇرعان. سوندىقتان ءبىز ابىرويىن ساتاتىن ادامداردى ەمەس، ابىرويىن قورعايتىن ادامداردى تاربيەلەۋ كەرەكپىز. بالكىم ءسىز بۇل باعدارلامانى بىلمەيتىندە شىعارسىز. بىلمەسەڭىز سىزگە كورۋگە كەڭەس بەرەمىن. ابىرويىن ساتۋ دەگەن نە سۇمدىق؟ سونى جاريالاۋ كىمگە كەرەك؟ ەرتەڭ وسىنى كورگەن قانشاما ءجاسوسپىرىم مىناۋ جاقسى دۇنيە ەكەن دەپ سونداي قادامعا بارۋى بەك مۇمكىن عوي. ءوزىڭىز ايتىڭىزشى قوعامنىڭ دامۋى ءۇشىن وسى بىزگە كەرەك پا؟ بۇعان بولگەن اقشاعا تاربيەلىك ءمانى بار باعدارلاما تۇسىرسە سول پايدالى ەمەس پا ەدى؟ ءوز ويىم دەپ ويىنا كەلگەنىن جاساپ، اۋزىنا كەلگەنىن ايتا بەرسە بۇدان ۇلتقا نە پايدا؟

"ارىڭدى ساتقانشا بازاردا بالىق ساتع پيستە سات. نيەتىڭ تازا بولسا، ناعىز جولداسىڭ بولادى. سەن ايتىپ وتقان 2 ميلليون بولسىن ميلليارد بولسىن ارىننان كىمبات ەمەس. بەتتي اشىپ بۋلاي بولمايدى، ايتارعا ءسوز جوق" - دەيدى الەۋمەتتىك جەلى قولدانۋشىسى.

تاعى ءبىر الەۋمەتتىك جەلى قولدانۋشىسى: نەگە وسى باعدارلاما تەك وسى ءتيپتى اڭگىمەلەردى قوزعايدى؟جىنىستىق قاتىناس، شىرىن،قىزدىق، ءشوپ سالۋ ،تاعىسىن تاعى .وسىنىڭ اينالاسىنداعى اڭگىمەلەر - دەيدى.

قوعامنىڭ ايتار ويى وسى. ورىمدەي قىزدىڭ قىزدىعىن ساتىپ، پايدا تاپپاق بولعانى ءبىر بولەك، ونى جارنامالاپ وتىرعان "ءوز ويىم" باعدارلاماسىنا حالىقتىڭ وكپەسى قارا قازانداي. بۇل ماسەلەنىڭ سوڭى نەمەن اياتالار ەكەن، "ءوز ويىم" جابىلادى ما؟ كۇتەيىك.

ۇسىنعان: فاريزا جومارت قىزى