الماتىدا بۇگىن تاڭەرتەڭ جىلۋ قۇبىرى جارىلىپ،  4 ادام زارداپ شەگىپ، 7 پاتەر جانە 8 كولىك ءبۇلىندى دەپ حابارلايدى Qamshy.kz اقپارات اگەنتتىگى "الماتى جىلۋ جەلىلەرى" ءجشس-نىڭ باسپا ءسوز قىزمەتىنە سىلتەمە جاساپ.

اپات پۋشكين جانە تولە بي كوشەلەرىنىڭ قيلىسىندا تاڭعى ساعات 04:14 كەزىندە بولعان.

"جىلۋ قۇبىرى جارىلىپ، 4 ادام كۇيىپ قالدى. ولار بىردەن اۋرۋحاناعا جەتكىزىلدى. ودان بولەك كوپقاباتتى تۇرعىن ءۇي كەشەنىنىڭ 7 پاتەرى، سول ماڭعا قويىلعان 8 كولىك ءبۇلىندى. ادامداردىڭ دەنساۋلىعىنا جانە مۇلىككە كەلتىرىلگەن شىعىن كولەمى انىقتالا سالىسىمەن، ەلىمىزدەگى زاڭناماعا سايكەس كومپانيا وتەماقى تولەيتىن بولادى"، - دەيدى كومپانياداعىلار.

الماتى جىلۋ جەلىسى زارداپ شەگۋشىلەردىڭ شىعىنى ناقتىلانا سالىسىمەن، ونى تولەۋگە دايىن ەكەندىكتەرىن دە ايتتى.

ولار جىلۋ قۇبىرىن جوندەپ، ونى قايتا ىسكە قوسۋ ءۇشىن ءبىر كۇن كەتەتىنىن ايتتى.

باسپا ءسوز قىزمەتى مالىمدەگەندەي، توتەنشە جاعدايعا جىلۋ قۇبىرىنىڭ ابدەن ەسكىرۋى سەبەپ بولعان. ول ارادا جاتقان ديامەترى جارتى مەترلىك قۇبىرلار 1993 جىلى سالىنعان ەكەن.

ۇسىنعان: ماقپال سەمباي