مەملەكەت باسشىلارى قازاقستانداعى وزبەكتەر مەن وزبەكستانداعى قازاقتاردىڭ ەتنيكالىق، تىلدىك جانە حالىقتىق مادەنيەتتى نىعايتۋعا ۋاعدالاستى.

قازاقستان پرەزيدەنتى قاسىم-جومارت توقايەۆ پەن وزبەكستان كوشباسشىسى شاۆكات ميرزيەيەۆ شەكارانى دەماركاسيالاۋ ۇدەرىسى ءساتتى جۇزەگە اسىپ جاتقانىن ايتتى. كەزدەسۋ بارىسىندا ءبىرقاتار اڭگىمەلەر ايتىلىپ، توقايەۆ وزبەكستان ليدەرىن قازاقستانعا شاقىردى.

"مەملەكەت باسشىلارى قازاق-وزبەك شەكاراسىنىڭ دەماركاسيالاۋ بارىسىن تالقىلاپ، جىبەرىلۋ پۋنكتىن ناقتىلاپ، شەكارا بويىندا ورنالاسقان ەلدى-مەكەندەردىڭ ءومىرى تۋرالى ءسوز ەتىستى. سونداي-اق، ەكونوميكالىق بايلانىستار مەن گۋمانيتارلىق اراقاتىناستى نىعايتۋ ءۇشىن ەكىجاقتى بارىس-كەلىس مولشەرىن كوبەيتۋگە ۋادەلەستى"، - دەپ كورسەتىلگەن اقوردا سايتىندا.

قوس كوشباسشى ەكى ەل اراسىنداعى كەلىسىمدىك-قۇقىقتىق بازانى كەڭەيتۋ جونىندەگى نيەتتەرىن ورتاعا سالدى. سونىمەن قاتار، 2020 جىلعا دەيىن ەكىجاقتى ساۋدا كولەمىن 5 ميلليارد دوللارعا دەيىن ارتتىرۋدى كوزدەيتىندەرىن جەتكىزدى. سونداي-اق، قورعانىس جانە اسكەري-تەحنيكالىق اۋقىمدا، كوسموستىق زەرتتەۋ باعىتىندا تىزە قوسىپ جۇمىس جاساۋ تۋرالى تالقىلاندى.

ەسكە سالا كەتەيىك، قازاقستان پرەزيدەنتى قاسىم-جومارت توقايەۆ ۇستىمىزدەگى جىلدىڭ 14-15 ساۋىرىندە وزبەكستانعا مەملەكەتتىك ساپارمەن بارعان. كەڭەيتىلگەن وتىرىستا كورشىلەس ەلدەر اراسىنداعى ىنتىماقتاستىق، ەكونوميكالىق بايلانىس جانە تاعى دا باسقا ماسەلەلەر ءسوز بولدى.