اقتوبە قالاسىنىڭ تۇرعىنى تاۋىپ العان جەكە كۋالىك ارقىلى بانكتەن نەسيە راسىمدەگەن. قۇجاتتى تاپقان ەر ادام نەسيەگە تەحنيكالاردى جەدەل ساتىپ، تۇسكەن اقشانى بۋكمەكەرلىك ورتالىقتا ويىنعا سالىپ، ۇتىلىپ قالعان. وتىرىگى اشىلعان كەزدە ول رەسەيدە بوي تاسالاپ ءجۇرىپتى-مىس.

اقتوبە قالاسىنداعى ورتالىق داڭعىلدا ورنالاسقان سپورت كەشەنىنىڭ ماڭىنان وزگە ادامنىڭ ءتولقۇجاتىن تاۋىپ العان ارسەن ي. ەسىمدى ازامات  تۇرمىستىق تەحنيكالار ساتاتىن دۇكەنگە بارىپ، ەكى كومپيۋتەرلىك ويىن، دجويستيك، سمارت-ساعات، فيتنەس-براسلەت، ۇيالى تەلەفون، ويىن كونسۋلىن نەسيەگە راسىمدەگەن.

ءبىرىنشى جولى باتپان قۇيرىققا كەز بولعان ارسەنگە تەك 985 مىڭ تەڭگە كولەمىندە نەسيە تاعايىندالىپتى. ال اراعا اپتا سالىپ، باسقا دۇكەنگە بارعان ول تاعى دا تابىلعان ءتولقۇجات ارقىلى 335 مىڭ تەڭگە تۇراتىن ۇيالى تەلەفون جانە نوۋتبۋك الادى.

نەسيەگە الىنعان زاتتاردى جارنامالىق سايتتاردا ساتىپ، ودان تۇسكەن اقشانى بۋكمەكەرلىك ورتالىقتا ۇتىلعان ارسەن رەسەيگە بارىپ بوي تاسالايدى. اراعا كوپ ۋاقىت سالماي، كۇدىكتى ارسەن سوت الدىندا جاۋاپ بەردى.

ونىڭ ايتۋىنشا، ول تابىلعان ءتولقۇجاتتاعى ازاماتپەن قاتتى ۇقساس بولىپتى. بۋكمەكەرلىك كونتوردا ۇتىلىپ قالعان ول رەسەيدە جۇمىس ىستەپ، سودان تاپقان تابىسىمەن قارىزىن جاپپاق بولعانىن ايتادى.

سوت شەشىمى بويىنشا ارسەن ي. «الاياقتىعى» ءۇشىن ايىپتالىپ، ەكى جىلعا باس بوستاندىعىنان ايىرىلدى. سونداي-اق، سوت قىلمىسكەر ازاماتتى ەكى بانككە 2 ميلليون تەڭگە كولەمىندەگى وتەماقى تولەۋگە مىندەتتەدى.