بەلسەندى جاقسىباي بازىلبايەۆ 9 ماۋسىمدا وتەتىن قازاقستانداعى كەزەكتەن تىس پرەزيدەنت سايلاۋىنا قاتىساتىنىن ايتتى. بۇل تۋرالى ول 19 ساۋىردە الماتىدا وتكەن باسپا ءسوز جيىنىندا مالىمدەدى، دەپ جازادى Qamshy.kz اقپارات اگەنتتىگى ازاتتىق راديوسىنىڭ دەرەگىنە سۇيەنىپ.

ول سايلاۋعا "قازاقستانداعى ورىس قاۋىمداستىعى" قوعامدىق ۇيىمىنىڭ اتىنان تۇسپەك.

"قازاقستانداعى ورىس قاۋىمداستىعى" بازىلبايەۆتىڭ ۇيىم اتىنان سايلاۋعا ءتۇسۋ نيەتىن "جيىن بارىسىندا بىلگەن". جيىنعا كەلگەن ۇيىم وكىلى "بۇل ءوتىنىشتى ەندى عانا ەستىگەندەرىن، ءبىر اپتا ىشىندە اقىلداسىپ، شەشىم قابىلدايتىندارىن" ايتتى.

جيىن كەزىندە بازىلبايەۆ سايلاۋالدى باعدارلاماسىمەن تانىستىردى.

- قورعانىس قابىلەتىن نىعايتۋدان باستايمىن. ەۋروپا وداعى مەن شانحاي ىنتىماقتاستىق ۇيىمىن قولدايمىن. ەۋرازيالىق وداق اياسىندا رەسەيگە قورعانىس كواليسياسىن قۇرۋدى ۇسىنامىن، - دەدى ول.

بازىلبايەۆتىڭ ەكى بەتتىك سايلاۋالدى باعدارلاماسىندا زەينەتكەرلەردى كوممۋنالدىق تولەمنەن بوساتۋ، كوپ بالالى انالارعا تەگىن باسپانا بەرۋ، وقۋ مەن مەديسينانى تولىقتاي تەگىن ەتۋ جانە ءار قالادا زاۋىت-فابريكا سالۋ جوسپارى بار.

67 جاستاعى جاقسىباي بازىلبايەۆ بۇعان دەيىن ءتورت رەت – 1998، 2005، 2011 جانە 2015 جىلدارى وتكەن قازاقستان پرەزيدەنتى سايلاۋىنا ءوزىن-وزى ۇسىنعانىمەن، ساياسي باسەكەنىڭ سوڭعى كەزەڭىنە جەتپەي، ءوز ەركىمەن شىعىپ كەتكەن.

1998 جىلعى پرەزيدەنت سايلاۋىندا بازىلبايەۆ باسەكەلەسى نۇرسۇلتان نازاربايەۆتىڭ پايداسىنا سايلاۋدان شىعاتىنىن مالىمدەگەن. 19 ساۋىردەگى باسپا ءسوز ءماسليحاتىندا ازاتتىق بازىلبايەۆتان "وسى جولى سايلاۋدا الدەبىر كانديداتتىڭ پايداسى ءۇشىن سايلاۋدان شىعىپ قالمايسىز با؟" دەگەن سۇرادى.

– شىقپايمىن. زاڭدا قوزعالىس نە پارتيا اتىنان تۇسسەڭ، سەن شەشپەيسىڭ، سەنى كىم، قاي پارتيا ۇسىنادى – سولار شەشەدى. سوندىقتان مەنى ۇسىنسا، تۇسەمىن، تاۋەكەل، - دەپ جاۋاپ بەردى ول.

قازاقستان پرەزيدەنتى قاسىم-جومارت توقايەۆ 9 ساۋىردە قازاقستانداعى كەزەكتەن تىس پرەزيدەنت سايلاۋى 2019 جىلدىڭ 9 ماۋسىمىندا وتەتىن ايتقان.

قازاقستان پرەزيدەنتىگىنە ۇمىتكەرلەردى جاريالاۋ 10 ساۋىردە باستالدى. كانديداتتاردى ۇسىنۋ 28 ءساۋىر 18.00-گە دەيىن جالعاسادى. ۇمىتكەرلەر 11 مامىرعا دەيىن تىركەلەدى. سايلاۋالدى ۇگىت-ناسيحات تىركەۋ اياقتالا سالا باستالىپ، سايلاۋ كۇنى اياقتالادى.

ۇسىنعان: نازەركە لابيحان