Qamshy.kz اقپارات اگەنتتىگى الماتىداعى kaizen ورتالىعىنىڭ جۇمىسى جايلى كوپ سەريالى ماقالالار بەرۋدى قولعا الدى. اتالمىش ورتالىقتىڭ باستى ميسسياسى – كايدزەن تۇسىنىگىنىڭ كەڭىرەك تارالىپ، قولدانىسقا ەنۋىنە سەپتىك ەتۋ.
جاپونيالىق جۇيەمەن جۇمىس جاساپ، تاسىن ورگە دومالاتىپ وتىرعان ءوندىرىس ورىندارىنىڭ ءبىرى – «الماتى جەلدەتكىش زاۋىتى» ەكەنىن ەستىگەلى بەرى كوزبەن كورىپ، قولمەن ۇستاۋعا دەگەن قۇلشىنىس ارتتى.
كايدزەن جۇيەسىنە دەگەن قىزىعۋشىلىق الماتى ماڭىنداعى قويانقۇسقا قاراي قۇستاي ۇشىرعان-دى. تاكسيلەتىپ جەتىپ، ەڭسەلى كوك قاقپادان وتكەن كەزدە-اق ءبىرىزدى ءتارتىپتىڭ، جولعا قويىلعان جۇيەنىڭ ءيىسى كەلەدى.
الدىمىزدان كۇتىپ العان زاۋىتتىڭ ساتۋ ءبولىمىنىڭ باسشىسى يسمايلوۆ بەرىك ىشكە باستادى. مۇنتازداي تازا كەڭسە، كىرەبەرىستەگى ماڭىزدى قۇجاتتار مەن العىس حاتتاردىڭ، سەرتيفيكاتتاردىڭ كورىنىسى جۇيەنىڭ ناتيجەلىلىگىن تاعى ءبىر دالەلدەپ ۇلگەردى.
ءبىزدىڭ ماقسات – وندىرىستەگى كايدزەن جۇيەسىنىڭ قانشالىقتى جۇمىس جاسايتىنىن، جۇمىس ۇدەرىسىن كورۋ، جاڭاشىلدىقپەن تانىسۋ.
زاۋىت باسشىسى نۇرعالي قاناتۇلىمەن جۇزدەسىپ، از-كەم اڭگىمەگە كەزەك بەردىك. «الماتى جەلدەتكىش زاۋىتى» ج ش س باسشىسى نارىق جايىمەن، جالپى كايدزەن جۇيەسىنىڭ تارتىپتەرىمەن، ەكسپورت ماسەلەسىمەن، قىزمەتكەرلەردى باعالاۋ جۇيەسىمەن تانىستىردى.
كوزگە تۇسكەن تاعى ءبىر ەرەكشەلىك – زاۋىت باسشىسىنىڭ الدىنداعى جۇمىس ۇستەلىندە جەلدەتكىش تۋرالى جۋرنالدار، بروشبرالار، اسىرەسە جەلدەتكىشتىڭ بىرنەشە بولشەكتەرىنىڭ جاتۋى. بۇل ىسكەر ادامنىڭ نەگىزگى قاسيەتتەرىنىڭ ءبىرى بولۋى شارت دەپ ءبىر تۇيدىك.
جوعارىدا ايتىلعان ماسەلەلەر بويىنشا ءسال كەيىنىرەك سايت بەتىندە سۇحبات جارىق كورەدى.
زاۋىتتى تانىستىرۋعا ساتۋ ءبولىمىنىڭ مەنەدجەرى رەنات سامادجييەۆ باستادى. كىشىگىرىم دالىزدەن وتكەننەن كەيىن-اق اتشاپتىرىم ءوندىرىس وشاعى كورىندى. ىشىندە ساپىرىلىسقان قيمىل جوق. ءبىر-بىر نۇكتەدە ءوز ىستەرىنە شۇقشيعان كاسكالى قىزمەتكەرلەر.
ءارى قاراي ءاربىر ءبولىمدى جەكە-جەكە تانىستىرالىق
اسحانا جايى
اس ىشىلەتىن ورىن كەڭ ورنالاسقان. تۇسكى اس ۋاقىتىندا زاۋىت قىزمەتكەرلەرىنە ارنايى ۋاقىت بەرىلەدى. بەلگىلەنگەن ۋاقىت ىشىندە جۇمىسشىلار 50 پايىزدىق جەڭىلدىكپەن قالاعان تاعامىمەن اۋقاتتانۋىنا مۇمكىندىك بار.
سونىمەن قاتار، تاۋلىگىنە وندىرىستە جۇمىس جاسايتىن بارشا قىزمەتكەرلەرگە تەگىن ايران بەرىلەدى. بۇل ءۇردىس ازاماتتاردىڭ مەتاللدىڭ، توكتىڭ، بوياۋدىۆڭ اينالاسىندا ەڭبەك ەتەتىنىن ەسكەرىلە وتىرىپ قالىپتاسقان.
كيىم اۋىستىرۋ بولمەسى
بۇل بولمەدە قابىرعا جاعالاي ارنايى شكافتار قويىلعان. جانە قاجەتتىلىك تۋىنداعان ۋاقىتتا ولار لاس كيىمدەرىن جاڭاسىنا اۋىستىرا الادى. اۋىستىرۋ جيىلىگى 3 كۇن. قىزمەتكەردىڭ تەگى جازىلعان ارنايى ۇياشىققا كىر فورما تاستالىپ، جاڭاسىنا اۋىستىرىلادى.
بۇل – مەكەمەنىڭ قىزمەتكەرگە دەگەن قۇرمەتى.
زاۋىتتاعى ۇدەرىستەر
ءوندىرىس وشاعىنا كىرەبەرىستە تۇرىپ كاسكا كيىپ الدىق. رەنات ءارى قاراي تانىستىرا باستادى.
سارى سىزىقتار سىرى
شارشى تارىزدەس ورنالاسقان ۇلكەن ءوندىرىس وشاعىنىڭ تاس ەدەنىندە ءارتۇرلى باعىتتارعا قاراي سوزىلعان سارى سىزىقتار قىزىعۋشىلىعىمىزدى قىتىقتادى.
كوزىمىزدەن سۇراق بايقاعان بولۋ كەرەك، رەنات ىلە-شالا تۇسىندىرە باستادى. ايتالىق، سارى سىزىقتاردىڭ ورتاسى عانا كەز-كەلگەن ادامنىڭ جۇرۋىنە رۇقسات بەرەدى. سارى سىزىقتان وڭعا نەمەسە سولعا قاراي شىعۋ ءۇشىن قاۋىپسىزدىكتى قامتاماسىز ەتەتىن ارنايى كيىمدەر مەن كوزىلدىرىكتى، كاسكانى كيۋ كەرەك.
سارى سىزىقتان كەدەرگىسىز ءوتۋ «باقىتى» سول ايماقتىڭ ماماندارىنا عانا بۇيىرعان.
قىزىل سىزىقتار قۇپياسى
ەكىنشى كوزگە تۇسكەن ەرەكشەلىك – ءاربىر جۇمىس ۇستەلىنىڭ، تەحنيكالاردىڭ ورىنى قىزىل سىزىقتارمەن بەلگىلەنگەن. ودان تىسقارى جىلجۋعا رۇقسات جوق. سونداي-اق، ءار جۇمىس ۇستەلى ءار مامانعا تيەسىلى. مىسالى، دانەكەرلەۋشى بولەك ورىندا، وپەراتور بولەك ورىندا دەگەندەي.
ءاربىر جۇمىسشىنىڭ الدىنداعى قابىرعادا نەمەسە ونىڭ جۇمىس ۇستەلىندە ارەكەتتەردىڭ سۋرەت ارقىلى، جازۋ ارقىلى كورسەتىلگەن ستاندارتتارى، تارتىپتەرى، تالاپتارى تۇر. ارتىق-كەم جاساۋدىڭ قاجەتى شامالى. كوزىڭمەن قاعيدالاردى ءبىر شولىپ ءوت تە، جۇمىسىڭدى جالعاستىرا بەر.
5س قاعيداسى
وقىرمانعا تۇسىنىكتى بولۋ ءۇشىن كايدزەن جۇيەسىنىڭ «الماتى جەلدەتكىش زاۋىتىنىڭ» قولدانىسىندا بار 5س قاعيداسى تۋرالى ءسوز قوزعاي كەتەلىك. مىسالداردى تەمىر جونۋشىنىڭ تاقتاسىنان كەلتىرەيىك.
1س – «ىرىكتە، كەرەكسىزىنەن ارىل»
«كەرەكسىزىن قىزىلمەن بەلگىلە - لاقتىر!
قالدىرعانىڭدى ءتيىمدى پايدالان!»
استا-توك شىعىنعا جول جوق ەكەنىن ەسكەرتەدى.
2س – «جۇمىس ورىنىن جاسا!»
«جولداس، ۇجىمىڭدى ۇيالتپا،
ورىنىن بەلگىلەپ، ورىنىنا قوي!»
بۇل تىركەستەر قىزمەتكەردىڭ ەسىنە بىرىزدىلىكتى، جيناقىلىقتى ساقتاۋدى سالادى.
3س – جۇمىس ورىنىڭدى تازا ۇستا!»
«باسقالارعا ۇلگى كورسەت ىسىڭمەن،
جۇمىس ورىنىن تازا ۇستا، ارتىق قوقىس تۇسىرمە!»
ايتا كەتۋ كەرەك، زاۋىت ءتارتىبى بويىنشا ءاربىر جۇمىسشى ءوزىنىڭ بەلگىلەنگەن ايماقتاعى جۇمىس ورىنىن ۋاقىت اياقتالعاندا جيناپ قويۋى ءتيىس.
4س – «قالىپقا كەلتىر!»
«جۇمىس ورىنى – جاشىك ەمەس كەرەكسىزدى سالاتىن،
ءتارتىپ بولۋ كەرەك زاتتى وڭاي تاۋىپ الاتىن».
ءاربىر قۇرالدىڭ اتاۋى جازىلعان ارنايى ورىنى بار. بەي-بەرەكەت جيناستىرۋعا جول جوق.
5س - «جەتىلدىر!»
«تەمىر جونۋشى بولساڭ دا، باسقارۋشى بولساڭ دا، جۇمىس ورىنىڭدى جەتىلدىر!»
بۇل ءوز قىزمەتىڭە دەگەن ماحابباتىڭ بولسىن دەگەندى مەڭزەيدى.
شيكىزاتتان ونىمگە دەيىن
1-قادام
«الماتى جەلدەتكىش زاۋىتىنىڭ» قىزمەتكەرلەرى كۇنىنە 16 جەلدەتكىش جاسايدى. ولار كولەمى جاعىنان، اتقاراتىن فۋنكسياسى جاعىنان الۋان ءتۇرلى. ولار الدىن-الا بەرىلگەن تاپسىرىس بويىنشا جوسپارلى تۇردە جاسالادى.
ەڭ الدىمەن، اليۋمينيي پانەلدەر قويمادان شىعارىلىپ، گەرمانيادان جانە قىتايدان اكەلىنگەن جونۋ جانە لازەرلى كەسۋ اپپاراتتارىنا جونەلتىلەدى. نەمىستىڭ «Trumatic 500» قۇرىلعىسى پانەلدى تەگىستەپ، وعان ورنىقتى بولۋى ءۇشىن كىشكەنتاي كەرتىكتەر سالادى.
ال «TruLaser 1030» قۇرىلعىسى اليۋمينيي پانەلدەردى قاجەتتى فورماعا ساي كەسەدى. ەڭ باستى ارتىقشىلىعى – كەسىلگەن ورىنداردىڭ تەگىس شىعۋى.
قوس اپپارات تا كومپيۋتەر ارقىلى، ارنايى باعدارلامالار كومەگىمەن جۇمىس جاسايدى. قۇرىلعىلار جانىندا وپەراتورلار قاداعالاپ تۇرادى.
2-قادام
ءار ءتۇرلى بولشەكتەر شاڭ-توزاڭىنان ارىلىپ جۋىلادى دا، ارنايى بوياۋ اپپاراتىنا جەتكىزىلەدى. بويالعان بولشەكتەر قۇراستىرۋ الاڭىنا جەتكىزىلەدى. سول جەردە جەلدەتكىشتىڭ جالپى ءپىشىنى قالىپتاسپاق.
3-قادام
ءارى قاراي كەسىلگەن پانەلدەر قۇراستىرىلىپ، جەلدەتكىشتىڭ سىرتقى نوبايىن شىعارادى. ال ونىمەن ءبىر ۋاقىتتا جەلدەتكىشتىڭ قوزعالتقىشتارى جينالىپ جاتادى.
ودان ءارى سىرتقى قالىپ پەن قوزعالتقىش بىرىكتىرىلىپ، بۇراندالارمەن بەكىتىلەدى.
4-قادام
قۇراستىرىلعان جەلدەتكىشتى ارنايى تەكسەرىس الاڭىندا توكقا قوسىپ، سىناقتان وتكىزەدى. ەگەر ەشقانداي اقاۋ شىقپاسا، باقىلاۋشى جارامدى دەپ تاڭبا قويادى.
تاپسىرىستار نومەرلەنىپ وتىراتىندىقتان، ءونىم قاپتالعان سوڭ باقىلاۋشى ونىڭ سىرتىنا تاپسىرىس نومەرىن جازادى.
5-قادام
تەكسەرۋدەن ءساتتى وتكەن جەلدەتكىشتەر قاپتاۋ، وراۋ الاڭىنا جىبەرىلەدى. سول جەردە ءونىمنىڭ قاۋىپسىزدىگىن قامتاماسىز ەتەتىن زاتتار ارقىلى جەلدەتكىش قاپتالادى. سودان كەيىن استىنا اعاش تۇرعى قويىلعان دايىن ءونىم ارنايى ورىنعا جەتكىزىلەدى.
مىنە، وسى جەردەن ارنايى نومەرلەرى بويىنشا تاپسىرىس بەرۋشىلەر جەلدەتكىشىن الىپ جونەلە بەرمەك.
قاراپايىم قىزمەتكەرلەر ۇلىبريتانيادا
كايدزەن جۇيەسىنىڭ ءبىر تالابى – شەكسىز دامۋ ۇدەرىسىندە بولۋ. وسى تالاپتى ورىنداۋ ماقساتىندا «الماتى جەلدەتكىش زاۋىتىنىڭ» دانەكەرلەۋشى ماماندارى ۇلىبريتانيادا شەبەرلىكتەرىن شىڭداپ قايتقان.
ولار ءقازىر شەتەلدىكتەردىڭ ۇزدىك تاجىريبەلەرىن وزدەرىنىڭ جۇمىس ىستەۋ تاسىلدەرىنە كىرىكتىرىپ، ەڭبەك ونىمدىلىگىن ارتتىرعان.
بۇدان بولەك، بارلىق ماماندارعا وزدەرىنىڭ باعىتى بويىنشا كۆاليفيكاسيانى ارتتىرۋ كۋرستارى، ترەنينگتەرى وتكىزىلىپ تۇرادى.
قىزمەتكەر ۇسىنىسى ءۇشىن اقشا الادى
زاۋىتتا قىزمەتكەرلەرمەن كەرى بايلانىس تاقتاسى بار. جۇمىس بارىسىنداعى كەيبىر ۇدەرىستەردى جەڭىلدەتۋ ءۇشىن قىزمەتكەردەن تىكەلەي باسشىلىققا ۇسىنىستار جاسالىنادى.
ءتيىمدى ۇسىنىس جاساعان قىزمەتكەرگە باسشىلىق تاراپىنان بونۋس رەتىندە قاراجات ەسەپتەلەدى.
جۇمىس جاسا دا، شەكسىز جالاقى ال
كايدزەن جۇيەسى قىزمەتكەر مۇمكىنشىلىگىن شەكتەمەيدى. قىزمەتكەر بارىنشا ءونىمدى جۇمىس جاساسا، نەگىزگى جالاقىسىنا قوسىمشا رەتىندە سونشا اقشا تابادى.
بۇل ءۇردىس «الماتى جەلدەتكىش زاۋىتىندا» دا جولعا قويىلعان. زاۋىتتىڭ قاراپايىم جۇمىسشىسى مەن باس ديرەكتورى ارالاس-قۇرالاس جۇرگەن جەردە بەرەكەنىڭ بولارى انىق.
كايدزەن كومەگىمەن كاسىبىن 40 پايىزعا ۇلعايتقان نۇرعالي قاناتۇلىمەن سۇحبات جاقىن ارادا سايت بەتىنەن جارىق كورەدى. «الماتى جەلدەتكىش زاۋىتىنىڭ» قىزمەتكەرلەردى باعالاۋ، ونىمدىلىكتى ارتتىرۋ، جۇمىسشىلارمەن ءتىل تابىسۋ سىندى تاقىرىپتار سۇحباتتا قاۋزالادى.
پىكىر قالدىرۋ