قىرعىز ەلىندە شۋ شىقتى - ەگىز بالانى دۇنيەگە اكەلگەن وتباسى پروكۋراتۋراعا شاعىمداندى دەپ حابارلايدى Qamshy.kz اقپارات اگەنتتىگى sputniknews.kz  سايتىنا سىلتەمە جاساپ.

قىرعىزستاندا 24 جاستاعى گۇلزينا ءابدىماجيتوۆا وش وبلىستىق پەرزەنتحاناسىندا ەگىز بالانى امان-ەسەن دۇنيەگە اكەلدى. الايدا ەكىقابات كەزىندە ۋلترادىبىستىق زەرتتەۋ ونىڭ ۇشەم تۋاتىنىن كورسەتكەن.

گۇلزينانىڭ 26 جاستاعى كۇيەۋى ىنتىماق بازارباي وش وبلىستىق پروكۋراتۋراسىنا دارىگەرلەردىڭ ۇستىنەن شاعىم تۇسىرگەن.

وتباسى وتا كەزىندە بىرنارسە بولۋى مۇمكىن، ونى دارىگەرلەر جاسىرىپ وتىر دەپ كۇماندانادى.

ۋدز بويىنشا ۇشەم بولۋى ءتيىس

ەكىقابات ايەلگە 9 ءساۋىر كۇنى كەسار تىلىگى جاسالعان. وتادان سوڭ وز-وزىنە كەلگەن ايەلدىڭ قولىنا دارىگەرلەر ەكى قىزدى ۇستاتىپ، ەگىز تۋدىڭ دەپ قۇتتىقتاعان.

2018 جىلدىڭ قىركۇيەگىندە جۇكتىلىكتىڭ ەكى ايلىق كەزىندە گۇلزينا دجالال-ابادتا ۋدز-گە تۇسەدى. زەرتتەۋ ونىڭ جاتىرىندا ءۇش ەمبريون بارىن كورسەتكەن.

ودان سوڭ 2 ساۋىردە اۋرۋىنا بايلانىستى ەكىقابات كەلىنشەك وش وبلىستىق پەرزەنتحاناسىنا جاتقىزىلىپ، ول ارادا دا ۋدز-گە تۇسەدى. ول كەزدە دە ۇشەم كۇتىپ جۇرگەنىن دارىگەرلەر وعان جەتكىزگەن.

"9 ساۋىردە تۇندە تولعاعىم باستالدى. دارىگەرلەر ءبىر بالانىڭ كولدەنەڭ جاتىپ العانىن ايتىپ، كەسار تىلىگىن جاسايتىنىن ايتتى. مەن ءوزىمنىڭ تۋا الاتىنىما سەنگەنمىن. ءبىراق دارىگەرلەردىڭ ءسوزىن قۇپ كورىپ، سوڭىندا وتاعا كەلىستىم"، - دەيدى گۇلزينا.

كەلىنشەك بالا تۋعان كەزىندە ەنەسىن قاسىنا الماقشى بولىپ جوسپارلاعان ەكەن. الايدا وتا باستالعاندا دارىگەرلەر ايەلدى ىشكە كىرگىزبەي قويعان.

"ماعان ناركوز بەردى. سودان ەكى قىزىمدى تۋعان سوڭ تالىقسىپ كەتتىم. ودان سوڭ نە بولعانىن بىلمەيمىن. ال ەسىمدى جيعاندا قولىما ەكى قىزىمدى بەردى. مەن نە ىستەرىمدى بىلمەي، ساسىپ قالدىم"، - دەيدى جاس انا.

ەگىز قىز تۋعان انانى 16 ساۋىردە پەرزەنتحانادان شىعارادى.

ءۇشىنشى بالا قايدا كەتتى – دارىگەرلەردىڭ پىكىرى

پەرزەنتحانانىڭ باس دارىگەرى گۇلبارا كەنجەبايەۆا جاتىرداعى ۇرىقتىڭ و باستا ەكەۋ بولعان دەپ سانايدى. ال "ءۇشىنشى" بالا ۋدز-دە قاتە كورسەتىلگەن. ىشتە ەكى بالا بولعاندىقتان دۇرىس كورىنبەۋى مۇمكىن دەيدى ول. 

"مەن ول ايەلدى بوساندىرعان جوقپىن. مەنىڭ بىلەتىنىم، ەكى قىزدى امان-ەسەن دۇنيەگە اكەلگەن. بىرەۋىنىڭ سالماعى 2 كەلى 520 گرامم، ەكىنشىسىنىكى – 2 كەلى 440 گرامم.  نەگىزى، ۋدز جاتىرداعى ۇرىق سانىن جۇكتىلىكتىڭ 12 اپتاسىنا دەيىن انىق كورسەتەدى.  ال ءابدىماجيتوۆا اپپاراتقا كەش تۇسكەن، جۇكتىلىگىنىڭ 18 اپتاسىنان سوڭ. مۇنداي جاعدايدا ءۋدز-دىڭ شاتاسۋى ابدەن مۇمكىن "، - دەدى كەنجەبايەۆا.

باس دارىگەر وتا كەزىندە ايەلدىڭ جاتىرىندا ءۇشىنشى بالانىڭ بولماعانىن 9 مەديسينا قىزمەتكەرى راستاپ بەرە الاتىنىن ايتادى.

"ايەلدىڭ ەگىز قىز تۋعانىن راستاپ بەرەتىن كۋاگەرلەرىمىز دە بار. كەسار تىلىگى ادىسىمەن وتا جاسالعاندا ەكى اكۋشەر-گينەكولوگ، ءۇش اكۋشەر، ەكى انەستەزيولوگ، مەدبيكە، سانيتار قاتىسادى، ياعني جالپى سانى  9 ادام"، - دەيدى كەنجەبايەۆا.

سونداي-اق ول وتاعا ايەلدىڭ ەنەسىن نەگە كىرگىزبەگەنىن دە ءتۇسىندىردى.

"ءتارتىپ بويىنشا وتا جاسالاتىن زالعا بوگدە ادامدار كىرگىزىلمەيدى. ەگەر ول ءوزى بوسانعان بولسا، وندا وعان ەشكىم كەدەرگى بولماس ەدى"، - دەيدى باس دارىگەر.

ەندى دارىگەرلەر ىشكى تەكسەرىس جۇرگىزىپ جاتىر. ولار بەس ۋدز ناتيجەسى بويىنشا دا نەگە بەس بالا كورسەتىلگەنىن انىقتاماق.

ۇسىنعان: ماقپال سەمباي