ديماش قۇدايبەرگەن قىتايلىق تەلەباعدارلامالاردىڭ بىرىنە سۇحبات بەردى دەپ جازادى Qamshy.kz اقپارات اگەنتتىگى. جاس ءانشى ءوزىنىڭ تالانتىن جوعارى باعالاۋعا ءتيىس ەمەستىگىن، ءانشىنىڭ تالانتىنا كورەرمەندەر باعا بەرۋ كەرەكتىگىن ايتتى.
سۇحبات كەزىندە قىتايلىق تەلەجۇرگىزۋشى "ءوزىڭىزدىڭ مۋزىكالىق تالانتىڭىز بارىن قاشان ءتۇسىندىڭىز؟" دەگەن سۇراق قويادى. اتالمىش سۇراققا ديماش بىلاي جاۋاپ بەردى:
— مەن مەكتەپ تابالدىرىعىن اتتاعان كۇننەن باستاپ مۋزىكامەن اينالىسا باستادىم. جاقىندا 25-كە تولامىن. ءقازىر ەرەكشە تالانتىم بار دەپ ماقتانا المايمىن. اناۋ ايتقانداي داۋىسىم بار دەپ تە ايتپاي-اق قويايىن. حالىق ءوز باعاسىن بەرەر، ايتپەسە ىڭعايسىز. مەنىڭ ەڭ ۇلكەن جەتىستىگىم — ساحناعا شىعىپ ءوزىمنىڭ كىشىگىرىم، از-ماز ونەرىممەن حالىقتى قۋانتۋ.
— قانداي مۋزىكا جانرىن جاقسى كورەسىز؟
— ەندى مۋزىكا تاقىرىبىنا كەلگەندە قاتىپ قالعان قاعيدا جوق. مەن ءار باعىتتى، ءار جانردى جاقسى كورەمىن. بارىنشا ءتۇرلى باعىتتاعى اندەردى ورىنداۋعا تىرىسىپ ءجۇرمىن.
— كىشكەنتاي كەزىڭىزدە كىمدى ۇلگى تۇتتىڭىز؟
— مايكل دجەكسون، سەلين ديون، لۋچاننو پاۆاروتتي، اندرەا باچەللي. بۇلاردى ءبولىپ جارا المايمىن.
— ءسىز قاي قىتايلىق انشىلەرمەن بىرىگىپ جۇمىس ىستەگەندى ۇناتاسىز؟
— قىتايدا ءوزىم ءسۇيىپ تىڭدايتىن انشىلەر وتە كوپ. مىسالى "لەون" توبى. ولار مەنىڭ دوستارىم. كاسىبي مۋزىكالىق تۇرعىدان قاراعاندا ولاردىڭ دەڭگەيى وتە جوعارى. ءار ءتۇرلى اسپاپتا ويناي الاتىندارىمەن مەنى باۋراپ الدى. سونداي-اق تيا رەي دەگەن ءانشى بار. قازاقتا سەن تۇر مەن اتايىن دەپ ايتاتىنداي انشىلەردىڭ ءبىرى. مەن عانا ەمەس كورەرمەندەر دە كوز جەتكىزگەن بولار. تەرري لين ەسىمدى ءانشىنى تەك ءانشى رەتىندە عانا ەمەس رۋحاني تۇرعىدان وتە باي ادام دەپ ەسەپتەيمىن.
— باتىس اندەرىن تىڭدايسىز با؟
— ءيا ارينە تىڭدايمىن. كوپتەگەن اندەر ۇنايدى. مىسالى "پاپپاراسيا" دەگەن ءان بار.
— جۇڭگو اندەرى مەن باتىس اندەرىنىڭ ەرەكشەلىگى نەدە دەپ ويلايسىز؟
— مەن امەريكالىق شوۋعا قاتىستىم. ءار ەلدىڭ مادەنيەتى ءارتۇرلى ەكەنىن 100 پايىز سەنىممەن ايتا الامىن. ەڭ الدىمەن مۋزىكاسى دا بىر-بىرىنە ۇقسامايدى. ءارى كورەرمەندەردىڭ تالعامى دا ەرەكشە. ءبىر ەلدە ورىنداعان تانىمال ءانىڭ باسقا ەلدە تانىمال بولا المايدى. سەبەبى تالعامعا كەلمەيدى. ءار ەلدىڭ وزىندىك تالعامى مەن مادەنيەتى بار. مىسالى مەن وسى ەلدە (قىتايدا — رەد.) ورىنداعان العاشقى اۆتورلىق ءانىم "Battle of Memmories" بولدى. بۇل ءان ساۋندترەك بولدى جانە بىرنەشە مۋزىكالىق پرەمياعا يە بولدى. ەندى بۇل ءاندى مەن باسقا ەلدە ورىندايتىن بولسام، كەيبىر ەلگە ۇناۋى مۇمكىن، ال كەيبىرى ءتىپتى ءمان بەرمەۋى دە مۇمكىن.
— "I am singer" بايقاۋىنان نە الا الدىڭىز؟
— بۇل جوبا مەنىڭ مانسابىمنىڭ قالىپتاسۋىنا ۇلكەن سەپتىگىن تيگىزدى. مىسالى قىتايداعى قانشاما كورەرمەندەر مەنى وزدەرى ءۇشىن جاڭالىق رەتىندە اشىپ الدى. سونداي-اق شەت مەملەكەتتەردە ءوز تىڭدارماندارىم پايدا بولدى. بۇل ءبىر جاعىنان الىپ قاراعاندا ب ا ق. سونداي-اق مەنىڭ ۇستازدارىم وتە كەرەمەت كىسىلەر بولدى. ءارى كىشىگىرىم دارىنىمىز دا بار شىعار. اللانىڭ قالاۋىمەن وسىنداي ناتيجەسىن بەرىپ جاتىر.
— جاقىندا عانا اتىشۋلى "بوگەمسكايا راپسوديا" اتتى ءفيلمنىڭ پرەمەراسى ءوتتى. اتالمىش ءفيلمدى كوردىڭىز بە؟
— مەن Queen توبىنىڭ بۇرىننان كەلە جاتقان تىڭدارمانىمىن. ال بۇل ءفيلمدى كورگەن كەزدە مەن ەكى ويلى بولىپ قالدىم. مۋزىكانت رەتىندە مەن بۇل فيلمنەن فرەددي مەركيۋريدىڭ ءومىرىن كوبىرەك كورگىم كەلدى. مىسالى ول مايكل دجەكسونمەن كەزدەستى. ولار كەزدەسكەن كەزدە تۋىندىنى دۇنيەگە اكەلۋ ماقساتىندا ءبىراز اڭگىمەلەسكەن بولاتىن. سونداي ساتتەرى فيلمگە ەنبەي قالعان.
— وسى جىلى ءسىز I am singer بايقاۋىندا Queen توبىنىڭ 3 ءانىن ورىنداعان ەدىڭىز. ءوزىڭىز ورىنداعان وسى اندەردىڭ ماعىناسىن قالاي تۇسىنەسىز؟
— بۇل كەرەمەت اسەر بولدى. وسى اندەردى ورىندايتىنىمىزدى بىلگەن كەزدە مەن قاتتى قۋاندىم. ويتكەنى بۇل — كلاسسيكا بولىپ كەتكەن تۋىندىلار. مىسالى قازىرگى تاڭدا "Show must go on" سەكىلدى كۇردەلى ءاندى تانىمال قىلۋ قيىن. سەلين گيوننىڭ "تيتانيك" دەگەن ءانى دە بار. وسىنداي اندەردى حيت قىلۋ الدەقايدا اۋىر. ءبىراق ءبىر ەرەكشەلىگى مۇنداي اندەر ۇزاق جىلدار بويى حيت بولىپ قالادى. سول "تيتانيك" انىمەن سەلين ديون ءالى كۇنگە دەيىن كورەرمەندەرگە لىق تولى ستاديون جيناپ ءجۇر. ءسىز ايتقان "بوگەمسكايا راپسوديا" اتتى ءان قۇرىلىمى جاعىنان وتە كۇردەلى ءان. ءبىراق سول ءان ءالى كۇنگە دەيىن كورەرمەندەردىڭ قۇلاعىنىڭ قۇرىشىن قاندىرىپ ءجۇر. مۇنداي اندەر حيت بولسا تىڭدارماندار بۇل اندەردى ەشقاشان ۇمىتپايدى. كاسىبي تۇردەگى جەڭىل اندەر حيت بولعان كۇننىڭ وزىندە دە تەز ۇمىتىلادى.
— ءوزىڭىزدىڭ العاشقى ءان جيناعىڭىز تۋرالى ايتىپ بەرسەڭىز.
— بۇل ءان جيناقتى مەن بەلگىلى ءبىر باعىت بويىنشا، بەلگىلى ءبىر ستيلدە بولسىن دەگەن نيەتتە جازبادىم. بۇل مەنىڭ ەڭ العاشقى ءان جيناعىم. مەنىڭ شىعارماشىلىعىمداعى ەڭ ماڭىزدى ساتتەردىڭ ءبىرى. اتالمىش ءان جيناقتىڭ باسىم كوپشىلىگى نەوكلاسسيكا باعىتىنداعى اندەر جانە قازاقتىڭ حالىق اندەرى دە بار. بارىنشا ساپالى جيناق شىعارۋعا تىرىستىم. الىس جاقىن ەلدەردەگى كومپوزيتورلارمەن قويان-قولتىق ارالاسىپ، بىرگە جۇمىس ىستەدىك. سولاردىڭ قاتارىندا رەسەيلىك يگور كرۋتوي دا بار. تىڭداپ باعاسىن بەرىڭىزدەر. كورەرمەندەردىڭ كوڭىلىنەن شىعىپ جاتسا، بۇل مەن ءۇشىن ۇلكەن جەڭىس بولار ەدى.
ۇسىنعان: اسەل بولات قىزى
پىكىر قالدىرۋ