ورازا دەسە، ەشقاشان اۋىز بەكىتىپ كورمەگەن ادام ءبىر اي اشتىقتا ءجۇرۋدى ويلاعاننان-اق سالى سۋعا كەتىپ، «ۇستاي المايمىن، قيىن عوي، قالاي ۇستايمىن» دەگەن وي تۋىنداۋى مۇمكىن. دىندە زورلىق جوق. اللا ادامعا كوتەرە المايتىن سىناق بەرمەيدى. بۇعان ءدىني تۇرعىدا ەمەس، ومىرلىك قاجەتتىلىك دەپ قاراپ، عىلىمي تۇرعىدا دالەلگە سۇيەنىپ، كايدزەن ادىسىمەن بايلانىستىرا وتىرا دايىندالىپ كورسەڭىز، بالكىم، كوزقاراسىڭىز وزگەرەر.
«كايدزەن» ءادىسى جاپونيادا پايدا بولعان. ول «كاي» – وزگەرىس جانە «دزەن» – دانالىق دەگەن ەكى سوزدەن قۇرالعان. ءادىستىڭ اۆتورى - ماسااكي يماي. ونىڭ ويىنشا كايدزەن ءادىسىنىڭ كاسىپتە دە، جەكە ومىردە دە پايداسى مول.
Qamshy.kz اقپارات اگەنتتىگى الماتىداعى kaizen ورتالىعىنىڭ جۇمىسى جايلى كوپ سەريالى ماقالالار بەرۋدى قولعا الدى. اتالمىش ورتالىقتىڭ باستى ميسسياسى – كايدزەن تۇسىنىگىنىڭ كەڭىرەك تارالىپ، قولدانىسقا ەنۋىنە سەپتىك ەتۋ.
ورازا مەن كايدزەننىڭ بايلانىسى قانداي دەيتىن شىعارسىز؟ ياعني بىردەن وتىز كۇن ورازانى ۇستاي الاتىنىڭىزعا سەنىمسىز بولساڭىز، تومەندەگى ادىستەردى پايدالانىپ، ورازاعا كايدزەن ادىسىمەن بىرتىندەپ دايىندالىڭىز.
- بەيمەزگىل تاماقتانۋدى دوعارۋ
تاڭعى، تۇسكى، كەشكى اس ۋاقىتىنان بولەك كۇنىنە قانشاما رەت قوسىمشا تىسكەباسار جەيسىز؟ جۇمىستاعى ادام بولساڭىز، ءبىراز شەكتەۋ بار. ال جۇمىسسىز، ءۇي تىرلىگىندە بولساڭىز، ءسال قيىنداۋ. ەندەشە، ءبىرىنشى كەزەكتە ورىنسىز تاماقتانۋدان تىيىلۋعا ارەكەتتەنىڭىز. بۇل – ادەت. ادەتتەن ارىلۋ قيىن. ءبىراق ءبارى وزىڭىزگە ايلانىستى. تاماقتى تەك ۋاقىتىلى جەۋگە تىرىسىڭىز. بىردەن تىيىلا المايسىز. دەگەنمەن، تاڭعى اس پەن تۇسكى اس اراسىندا ەشنارسە جەمەيمىن دەپ وزىڭىزگە ءسوز بەرىڭىز دە، سونى ورىنداڭىز. ءسويتىپ، جالعاستىرا بەرىڭىز.
- ءناپىل ورازا ۇستاۋ
سۇننەت امالداردىڭ ءبىرى – اپتانىڭ دۇيسەنبى، بەيسەنبى جانە ايدىڭ 15، 16، 17، كۇندەرى ۇستالعان ورازا، ياعني ءناپىل ورازا. ءناپىل دەگەن ۇستاساڭ ساۋاپ، ۇستاماساڭ، كۇنا ەمەس. وسى اتالعان كۇندەرى ورازا ۇستاپ جۇرگەن بولساڭىز، كەرەمەت بولۋدىڭ ءسال-اق الدىندا تۇرسىز. دەمەك، اعزاڭىز دا، ساناڭىز دا وتىز كۇندىك ورازاعا دايىندالىپ ءجۇر، ول سىناقتان دا سۇرىنبەي وتە الاسىز دەگەن ءسوز. ال، ەگەر ءومىرى ءبىر رەت تە اۋىز بەكىتىپ كورمەگەن بولساڭىز، ەندەشە، ءدال وسى اتالعان كۇندەرى اۋىز بەكىتىپ، اعزاڭىزدى دا، وي-ساناڭىزدى دا، «اۋىز بەكىتە الامىن با، الدە...» دەگەن سەنىمسىزدىك جاۋلاعان ەگوڭىزدى دا ۇيرەتە بەرىڭىز. ادام ىستەگەندى ادام ىستەيدى.
- ورازاعا دەيىن قۇنارلى تاماقتانۋ
كۇندەلىكتى راسيونىڭىزعا ءبىر ءمان بەرىپ قاراپ كورىڭىزشى؟ نە جەپ ءجۇرسىز؟ ۇندى، ءتاتتى، گازدى...تاعى قانداي؟ ودان دا سونىڭ ورنىنا كۇنىنە ءبىر تال الما، قيار، قىزاناق، ءتۇرلى سالاتتار، داندەر جەۋگە تىرىسساڭىز، سول سىزگە ءال بەرەدى. ءتاتتىقۇمار ادام بولساڭىز، ودان دا بىرتىندەپ تىيىلۋعا بولادى. ءتاتتىنىڭ ورنىنا كوكونىس، جەمىس، ءتۇرلى داندەر الىپ جەپ، بىرتىندەپ ويىڭىزدى دا، اعزاڭىزى دا ۇيرەتىڭىز. ناتيجەسى كوپ كۇتتىرمەدى.
ورازا كەزىندە كۇش-قۋات بەرەتىن تاعامدارمەن قورەكتەنۋدى، ءبىراق مولشەرىمەن جەۋدى، اعزاڭىزدى دا، ساناڭىزدى دا بىرەر ۋاقىت اش ءجۇرۋ قانداي پايدالى ەكەنىنە سەندىرىپ، داعدىلاندىرۋدى ءدال بۇگىننەن باستاڭىز.
جانە جوعارىدا ۇسىنعان كايدزەن ءادىسى ارقىلى ءبىر اي ورازاعا دايىندالساڭىز، پايداسى تيەرى انىق.
ماتەريال جازۋ بارىسىندا kaizen ورتالىعىنىڭ ترەنەرى ءمادي زانيگينوۆتىڭ ەكسپەرتتىك ويلارىنا جۇگىندىك
وقي وتىرىڭىز:
♦كايدزەننىڭ 6 قاعيداسى. جاپوندار ءومىرىن قالاي جەڭىلدەتتى؟
♦كايدزەن ورتالىعىنا كىردىڭ – عاجايىپقا ساپار شەكتىڭ (فوتورەپورتاج)
♦جەلدەتكىش زاۋىتىنداعى كايدزەن جۇيەسى: بونۋس بەرەتىن بەرەكەلى بيزنەس
