الماتىداعى مارافون كەزىندە "شىندىقتان قاشىپ قۇتىلمايسىڭ" دەگەن جازۋى بار باننەر ىلگەنى ءۇشىن 15 كۇنگە قامالعان ءاسيا تولەسوۆا مەن بەيبارىس تولىمبەكوۆكە قاماۋ ورنىندا قوقان-لوقى جاساپ، كۇش كورسەتكەن دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. بۇل اقپاراتتى 4 مامىردا ءاسيا تولەسوۆانىڭ جاقىندارى حابارلاعان.

"ءقازىر ادۆوكاتى شىقتى. بەيبارىسقا دا، ءاسياعا دا قوقان-لوقى جاساپ جاتقانى انىقتالدى. ءاسيا وتىرعان كامەراعا تولعاناي ەسىمدى قىزدى كىرگىزگەن. ول پرەزيدەنتتىڭ جيەنى ەكەنىن، ولارعا (ءاسيا، بەيبارىس - جج.) قارسى ەكەنىن ايتىپ، ساياسي اڭگىمەگە تارتقان. جۇدىرىعىن كورسەتىپ، توبەلەسكە بەيىم ەكەنىن بىلدىرگەن. ءاسيانىڭ ىشىنەن ۇرعان. اشتىق اكسياسىن جالعاستىرىپ جاتقان ءاسيا وتە ءالسىز. ول كامەرادان شىعىپ، قايتا كىرگىسى كەلمەيتىنىن ايتقان. جاڭاعى قىز ۇنەمى ايقايلاپ سويلەپ، اگرەسسيا تانىتقان. ولار ءاسيانى قانداي دا ءبىر ءتارتىپ بۇزۋعا يتەرمەلەپ، تاعى دا سول جاقتا قالدىرعىسى كەلەدى. بۇل وتە ءقاۋىپتى" دەدى 4 مامىردا تۇستەن كەيىن ءاسيا تولەسوۆانىڭ اناسى جانار جاندوسوۆا ازاتىق تىلشىسىنە.

ول Facebook جەلىسىندە ءاسيانىڭ جازعان حاتىنىڭ سۋرەتىن دە جاريالاپ قويعان.

ول 4 مامىردا ءاسيا تولەسوۆانىڭ ادۆوكاتى جانار بالعابايەۆامەن بىرگە الماتى قالالىق پروكۋراتۋراسىنا بارىپ، شاعىم تۇسىرەتىنىن ايتتى.

"ەرتەڭ جەكسەنبى. جۇمىس كۇنى ەمەس. ولار كەز كەلگەن نارسەنى جاساي الادى" دەپ الاڭدايدى جانار جاندوسوۆا.

جانار جاندوسوۆانىڭ ايتۋىنشا، ءاسيا 4 مامىردا اكىمشىلىك جازاعا تارتىلعاندارعا ارنالعان ارنايى قابىلداۋ ورنىنىڭ باسشىسى قاحاروۆ ا.ا ەسىمدى ازاماتتىڭ اتىنا شاعىم ءتۇسىرىپ، اتالعان كامەرادا وتىرۋدىڭ ءقاۋىپتى ەكەنىن جازعان.

ارنايى قابىلداۋ ورىنعا حابارلاسقان كەزدە ءوزىن ارسەن مارات دەپ تانىستىرعان ارنايى قابىلداۋ ورنىنىڭ قىزمەتكەرى ءاسيا تولەسوۆانىڭ سول جەردە وتىرعانىن راستادى. ءبىراق ناقتى قانشا اداممەن وتىرعانى جايلى اقپاراتتى ايتا المايتىنىن جەتكىزدى. ول ءاسيانىڭ قابىلداۋ ورنى باسشىسىنا شاعىم تۇسىرگەنىن راستاپ، باسشىلىقتىڭ وعان بۇگىن جاۋاپ بەرگەنىن ايتتى. "نە دەپ جاۋاپ بەردى؟" دەگەن سۇراعىمىزعا ارسەن مارات "ايتا المايمىز" دەپ قىسقا قايىردى.

ءاسيا تولەسوۆانىڭ اشتىق اكسياسىن جالعاستىرىپ جاتقانىن ايتقان قىزمەتكەر "ونىڭ جاعدايى ءبىر قالىپتى" دەدى.

"كۇن سايىن پوليسيا دەپارتامەنتىنىڭ اۋرۋحاناسىنان تەراپيەۆت كەلىپ، كۇندە جاعدايىن قارايدى. جاعدايى ءبىر قالىپتى جاقسى. ءار ءۇش ساعات سايىن ونىڭ قىسىمىن تەكسەرەدى" دەدى ارسەن مارات.

ونىڭ ايتۋىنشا، بەيبارىس تولىمبەكوۆتەن ەشقانداي شاعىم تۇسپەگەن. "ونىڭ جاعدايى جاقسى" دەدى.

21 ساۋىردە الماتىدا مارافون كەزىندە "شىندىقتان قاشىپ قۇتىلمايسىڭ" دەگەن جازۋى بار باننەر ىلگەنى ءۇشىن بەلسەندى ءاسيا تولەسوۆا مەن بەيبارىس تولىمبەكوۆتى سوت 15 تاۋلىككە قاماعان ەدى.

تولەسوۆا مەن تولىمبەكوۆ قامالعان كۇننىڭ ەرتەسىنە الماتىدا وتىز شاقتى ادام قالالىق سوت عيماراتى الدىنا كەلىپ، قاماۋداعى بەلسەندىلەردى بوساتۋدى تالاپ ەتتى. الەۋمەتتىك جەلى قولدانۋشىلارى دا جاستاردىڭ ۇستالۋىن ايىپتاپ، ينتەرنەتتە قولداۋ كورسەتتى. ال قازاقستاننىڭ ىشكى ىستەر ءمينيسترى ەرلان تۇرعىمبايەۆ جاستاردىڭ "مارافون وتكىزۋگە كەدەرگى جاساعانىن" ايتتى.

ءساۋىر ايىنىڭ اياعىندا الەمنىڭ تۇكپىر-تۇكپىرىندە وقىپ جاتقان قازاقستان ستۋدەنتتەرى چەحيا، فرانسيا، ۇلىبريتانيا مەن ۆەنگرياداعى قازاقستان ەلشىلىكتەرى الدىندا قامالعان بەلسەندىلەردى قولداۋ اكسياسىن وتكىزدى. مۇنداي قولداۋ شارالارى كانادا، يتاليادا، رەسەي، اقش-دا ءوتتى.

حالىقارالىق قۇقىق قورعاۋ ۇيىمدارى - Freedom House، Amnesty International جانە بۇۇ-نىڭ ادام قۇقىعى بويىنشا ورتالىق ازياداعى كەڭسەسى قازاقستان بيلىگىن ءاسيا تولەسوۆا مەن بەيبارىس تولىمبەكوۆتى بوساتۋعا شاقىرعان.

ۇسىنعان: اسەل بولات قىزى