94 جاستاعى ۇوس ارداگەرى – يۆان سۋركوۆ وسىدان ءبىر اي بۇرىن تۋىسقانىن ولتىرگەنى ءۇشىن ءتورت جىلعا سوتتالعان ەدى. سوعىس ارداگەرىمەن بىرگە جازاسىن وتەپ جاتقان قىلمىسكەرلەر ونى الدا كەلە جاتقان جەڭىس كۇنىمەن قۇتتىقتاعان. ارنايى جابدىقتالعان ساحنا، ءان ايتقان تاعدىرلاستارى قارتتىڭ كوزىنە جاس الۋىنا سەبەپ بولدى دەپ حابارلايدى Qamshy.kz اقپارات اگەنتتىگى alau.kz سايتىنا سىلتەمە جاساپ.

ءتۇرلى رۋحتى ۇراندار جازىلعان پلاكاتتار ساحنا تورىنە ءىلىنىپ، جازا وتەۋشىلەر سولداتتاردىڭ قالايى ىدىسىنان "ماڭگىلىك الاۋ" جاسادى.

ءتۇرلى ماراپاتتاردىڭ يەسى يۆان ۆلاديميروۆيچ كەۋدەسى سىڭعىرلاعان وردەنگە تولى كوستيۋمىن ۇيدە قالدىرعان. ەندى ونىڭ ۇستىندە تۇرمەدەگى كادىمگى ءبىرىڭعاي فورما. ونىڭ قك 161/2 بولىمىندە جازاسىن وتەپ جاتقانىنا ءبىر ايدان اسا ۋاقىت بولدى. ارداگەر ءۇشىن ەڭ قىمباتتى مەرەكەلەردىڭ ءبىرى ەندى تۇرمەدە تويلانىپ جاتىر. ءبىر جەردە جاتاتىن تاعدىرلاستار ىشىندە يۆان سۋركوۆتىڭ ورىنى ەرەكشە. ول – اتالمىش نىسانداعى ەڭ قارتاڭ قىلمىسكەر.

"جازاسىن وتەۋشىلەردىڭ ەركى بويىنشا جانە باسشىلىقتىڭ قولداۋىمەن جالعىز ارداگەر ءۇشىن ءبىز وسى كونسەرتتى ۇيىمداستىرىپ وتىرمىز"، - دەيدى قك 161/2 ءبولىمىنىڭ وترياد باسشىسى باۋىرجان كەڭەسبايەۆ.

باسشىنىڭ ايتۋىنشا، قازىرگى ۋاقىتتا سوعىس كۋاگەرى ساناتوريالىق بولىمدە. ونىڭ دەنساۋلىعى ءۇشىن كەلگەن كۇننەن باستاپ شەنى بار دارىگەرلەر جاۋاپتى. پسيحولوگ تۇراقتى تۇردە جۇمىس جاساپ جاتىر ەكەن.

"ءبىز وعان ەشقانداي قىسىم كورسەتىپ جاتقان جوقپىز. ول قالاۋىنشا تەلەديدار قاراپ، كىتاپ وقىپ جانە كروسسۆورد شەشە الادى"، - دەدى كەڭەسبايەۆ.

يۆان ۆلاديميروۆيچ بيىل 94 جاسقا تولادى. ونى مايدانعا 1943 جىلى قوستاناي اۋدانىنان شاقىرعان. ەڭ قىزىعى – يۆان سۋركوۆ مايدانعا شاقىرىلعان ۋاقىتتا 10-سىنىپتىڭ وقۋشىسى ەدى. العاش رەت ۇرىسقا كۋرسك-ورلوۆ اۋماعىندا قاتىستى. 4ء-شى ۋكراينا فرونتىندا شايقاسىپ، دونباسستى، زاپوروجەنى، ەۆپاتوريۋ قالاسىن، سيەۆاستوپولدى بوساتۋعا بەلسەنە قىزمەت ەتكەن.

3ء-شى بەلارۋس جانە بالتىق جاعالاۋى مايداندارىن باسىپ ءوتىپ، ريگا مەن ءتالليندى جاۋدان ازات ەتكەن جاۋىنگەر ەكى رەت باسىنان جاراقات العان. وسى ەرلىكتەرىن ەسكەرە وتىرىپ، جازاسىن وتەۋشى تاعدىرلاستارى ونى قۇتتىقتاۋعا بەل بۋعان ەكەن.

"ءبىز ارداگەر يۆان سۋركوۆتىڭ قۇرمەتىنە مەرەكەلىك كونسەرت ۇيىمداستىردىق. جازاسىن وتەۋشىلەر مەن نىسان اكىمشىلىگىنىڭ اتىنان ءبىز اقساقالدى مەرەكەسىمەن شىن جۇرەكتەن قۇتتىقتايمىز"، - دەيدى جازاسىن وتەۋشىلەردىڭ ءبىرى ۆيتاليي ۆولكوۆ.

ارنايى ارداگەردىڭ قۇرمەتىنە سوعىس ۋاقىتىنداعى اندەر ورىندالىپ، ولەڭدەر وقىلىپ، كونسەرت ۇيىمداستىرىلدى.

يۆان سۋركوۆ بۇگىندە جازاسىن وتەپ، بوستاندىققا شىعۋدى ارماندايدى. ال جازا وتەۋشىلەر ۇيىمداستىرعان كونسەرت ونىڭ كوزىنە ەرىكسىز جاس ءۇيىردى.

اۋدارعان: ادىلەت مادەنيەت