شەرەمەتيەۆو اۋەجايىنداعى ۇشاق اپاتىنان قايتىس بولعان 41 ادامنىڭ قاتارىندا بورت قىزمەتكەرى ماكسيم مويسەيەۆ تە بار. ول اقتىق دەمى قالعانشا جولاۋشىلاردى قۇتقارعان. اەروفلوت اۆياكومپانياسىنىڭ قىزمەتكەرى ماكسيمنىڭ ادامداردى ءقاۋىپسىز جەرگە كوشىرۋ بارىسىندا تۇتىنگە ۋلانىپ قايتىس بولعانىن ايتتى. 

ماكسيم مويۆەيەۆ نەبارى 22 جاستا ەدى. ونىڭ تۋعان تۋىستارى بولعان وقيعاعا ءالى سەنە الار ەمەس. ول بالا كەزىنەن اسپانعا ۇشۋدى ارمانداعان. كەيىن ارمانىن شىندىققا اينالدىرۋ ءۇشىن ول مونيندەگى باستاپقى ۇشۋ جاتتىعۋلارى بار اسكەريلەندىرىلگەن ماسكەۋ وبلىستىق مەكتەپ-ينتەرناتىندا وقىدى. ءوز ماماندىعى بويىنشا 1 جىل 3 اي جۇمىس ىستەگەن. 

— جاۋاپكەرشىلىگى بار، سەنىمدى جىگىت ەدى. ول ۇنەمى باسقالارعا كومەكتەسىپ جۇرەتىن. باتىرلىق پەن جانكەشتىلىك ۇنەمى ماكسيمنىڭ بويىنان تابىلاتىن، - دەپ ەسكە الادى ماكسيمنىڭ دوسى الەكساندر.

— تەك وتە جاقسى ادام بولعانىن ايتا الامىن. ادال ءارى جاۋاپتى جىگىت ەدى. قيىندىقتان قورىقپايتىن جانە ءوز باسىنىڭ قامى ءۇشىن وزگەلەردى قيىن كەزدە تاستاپ كەتپەيتىن، - دەيدى دوسى اندرەي. 

رەسەيلىك باق-تىڭ دەرەگىنە سۇيەنسەك، ماكسيم اپات بولعان ۇشاقتىڭ ارتقى جاعىندا ءورت شىققان جەرگە جاقىن وتىرعان.  ماكسيمنىڭ ارىپتەستەرى جولاۋشىلاردى الدىڭعى ەسىكتەن شىعارىپ جاتقان كەزدە، ماكسيم تاعى ءبىر شىعاتىن جەردى اشپاق بولادى. 

— ونىڭ قولىنان كەلمەدى. بولمادى. كەيىن ول جولاۋشىلاردى سىرتقا شىعارۋعا كومەكتەستى. سوڭىنا دەيىن كومەكتەستى. ءبىراق ءوزىنىڭ ءومىرىن پيدا ەتتى، - دەيدى ارىپتەسى. 

 اۋدارعان: اسەل بولات قىزى