9-ماۋسىمدا وتەتىن كەزەكتەن تىس پرەزيدەنت سايلاۋىنا مەملەكەتتىك بيۋدجەتتەن بولىنەتىن قاراجات مولشەرى بەلگىلى بولدى دەپ حابارلايدى Qamshy.kz اقپارات اگەنتتىگى وسك سايتىنا سىلتەمە جاساپ. 

جوعارىدا باياندالعاننىڭ نەگىزىندە ورتالىق سايلاۋ كوميسسياسىنىڭ "2019 جىلعى 9 ماۋسىمعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا رەسپۋبليكالىق بيۋدجەت قاراجاتىنان وتەلەتىن قازاقستان رەسپۋبليكاسى پرەزيدەنتتىگىنە كانديدات شىعىستارىنىڭ مولشەرىن بەلگىلەۋ تۋرالى" قاۋلىسى قابىلداندى.

قاۋلىدا قازاقستان رەسپۋبليكاسى پرەزيدەنتتىگىنە كانديدات شىعىستارىنىڭ مولشەرى 7 331 200 (جەتى ميلليون ءۇش ءجۇز وتىز ءبىر مىڭ ەكى ءجۇز) تەڭگە كولەمىندە بەلگىلەندى.

بايانداما كەزىندە سپيكەر كانديداتتاردىڭ سايلاۋ قورلارى تۋرالى ايتىپ ءوتتى.

پرەزيدەنتتىككە كانديداتتىڭ سايلاۋ قورى:

1) كانديداتتىڭ ءوز قاراجاتى جانە ونى ۇسىنعان رەسپۋبليكالىق قوعامدىق بىرلەستىك كانديداتقا بولىنگەن قاراجاتتىڭ جالپى سوماسى زاڭنامادا بەلگىلەنگەن ەڭ تومەنگى جالاقىنىڭ ون ەكى مىڭ ەسە مولشەرىنەن اسپايدى، بۇل 510 000 000 (بەس ءجۇز ون ميلليون) تەڭگەنى قۇرايدى.؛

2) رەسپۋبليكانىڭ ازاماتتارى مەن ۇيىمدارىنىڭ ەرىكتى قايىرمالدىقتارىنىڭ جالپى سوماسى زاڭنامادا بەلگىلەنگەن ەڭ تومەنگى جالاقى مولشەرىنەن ون بەس مىڭ ەسەدەن اسپايدى، بۇل 637 500 000 (التى ءجۇز وتىز جەتى ميلليون بەس ءجۇز مىڭ) تەڭگەنى قۇرايدى.

بەلگىلەنگەن مولشەردەن تىس ارتىق تۇسكەن اقشا قاراجاتى سايلاۋ قورلارىنا ەسەپتەلۋگە جاتپايدى جانە ولاردى ەنگىزگەن ازاماتتار مەن ۇيىمدارعا قايتارىلادى.

ءانونيمدى قايىرمالدىقتار رەسپۋبليكالىق بيۋدجەت كىرىسىنە اۋدارىلادى.

سايلاۋ قورلارىنا تەك زاڭدى جولمەن الىنعان قاراجات عانا جىبەرىلۋى مۇمكىن.

سايلاۋ قورىنىڭ قاراجاتىنا بيلىك ەتۋ قۇقىعى قازاقستان رەسپۋبليكاسىنىڭ پرەزيدەنتتىگىنە كانديداتتارعا عانا تيەسىلى.

كانديدات ءوز كانديداتۋراسىن العان نەمەسە كانديداتتى تىركەۋ تۋرالى شەشىمنىڭ كۇشى جويىلعان جاعدايدا سايلاۋ قورىنا تۇسكەن اقشا ولاردى ەنگىزگەن ازاماتتار مەن ۇيىمدارعا قايتارىلادى. بۇل رەتتە كورسەتىلگەن قاراجاتتى قايتارۋعا بايلانىستى شىعىستار ولاردى ەنگىزگەن ازاماتتار مەن ۇيىمداردىڭ ەسەبىنەن وتەلەدى.

سايلاۋ قورىتىندىلارى انىقتالعاننان كەيىن كۇنتىزبەلىك بەس كۇننەن كەشىكتىرمەي كانديدات ورتالىق سايلاۋ كوميسسياسىنا سايلاۋ قورىنا اقشا تۇسىمدەرىنىڭ كوزدەرى جانە بارلىق جۇمسالعان شىعىندار كورسەتىلەتىن ءوز سايلاۋ قورىنىڭ قاراجاتىن پايدالانۋ تۋرالى ەسەپ بەرۋى قاجەت.

ۇسىنعان: ادىلەت مادەنيەت