1933 جىلى پەرۋدىڭ تيكراپو اۋىلىندا تۇراتىن كەدەي وتباسىندا لينا مەدينا ەسىمدى قىز دۇنيگە كەلدى. ءبىراق ول كەزدە بۇل قىزدىڭ ارادا بەس جىل وتكەن سوڭ ەڭ جاس انا اتانىپ تاريحتا قالاتىنىن ەشكىم بىلگەن جوق دەپ جازادى Qamshy.kz اقپارات اگەنتتىگى.

مەدينا بەس جاسقا تولعاندا اناسى قىزىنىڭ ءىشى شىعىپ، تىم ۇلكەيىپ كەتكەنىن اڭعارادى، قىزى دا ءىشىنىڭ اۋىراتىنىن ايتىپ كوپ شاعىمداناتىن. قىزدارىنىڭ دەنساۋلىعىنا الاڭداعان اتا-انا جاقىن ماڭداعى اۋرۋحاناعا جەتكىزەدى. العاشىندا اڭ-تاڭ بولعان دارىگەرلەر قىزدىڭ ءىشىنىڭ ۇلكەندىگىن بەلگىسىز ىسىك دەپ جورامالدايدى. تەك ساراپتاما ناتيجەلەرى شىققان سوڭ عانا قىزدىڭ اياعى اۋىر ەكەنى انىقتالادى.

وسى وقيعادان ءبىر جارىم اي وتكەن سوڭ، 1939 جىلدىڭ 14-مامىرىندا مەدينا "كەسار تىلىگى" ءادىسى ارقىلى ۇل بالانى دۇنيگە اكەلەدى. ءبىر قىزىعى، بالانىڭ دەنساۋلىعى قالىپتى، سالماعى 2،7 كگ بولىپ دۇنيگە كەلەدى. مەدينا ۇلىنا ءوزىن بوساندىرعان دارىگەر جەراردو لوزادونىڭ ەسىمىن بەرەدى.

جەراردو 10 جاسقا تولعانشا، مەدينانى اپكەسى دەپ ويلاپ وسەدى. تەك 10 جاسقا تولعان كەزدە عانا بار شىندىقتى ەستيدى.

اكۋشەر حوسە ساندوۆالدىڭ 2002 جىلى جارىق كورگەن كىتابىندا، مەدينانىڭ پسيحولوگيالىق تۇرعىدان قالىپتى بالا بولعانى ايتىلعان. تىم ەرتە انا اتانۋ قىز بالانىڭ پسيحولوگياسىنا قاتتى اسەر ەتپەگەن. دارىگەردىڭ سوزىنشە، مەدينا بالاسىنا قاراعاننان گورى، قۋىرشاقتارمەن ويناعاندى جاقسى كورگەن.

سۋرەتتە سول جاقتا – 18 جاسار جەراردو، جانىندا – 23 جاسار اناسى مەدينا

مەدينا راۋل حۋرادو ەسىمدى ادامعا تۇرمىسقا شىعىپ، 1972 جىلى تاعى ءبىر ۇلدى دۇنيەگە اكەلەدى. لينا مەدينا 2015 جىلى 8-قاراشادا جۇرەك تالماسىنان قايتىس بولعان.

اۋدارعان: داۋرەن سىبانباي