جۋىردا ايتىسكەر اقىن رينات زايتوۆتىڭ "ءبىر ەلدە ءبىر مىرزا بار" دەپ باستالاتىن ولەڭى جەلىدە قىزۋ تالقىعا تۇسكەن بولاتىن. ايتىستا بيلىككە قاراتىپ ايتقان شىمىر شۋماقتارىمەن قالىڭ بۇقارانىڭ ىقىلاسىنا بولەنگەن اقىن ءوزىنىڭ Instagram جەلىسىندەگى پاراقشاسى ارقىلى وسى ولەڭىنە بايلانىستى پىكىر ءبىلدىردى دەپ جازادى Qamshy.kz اقپارات اگەنتتىگى. 

الدىمەن اقىننىڭ قىزۋ تالقىعا تۇسكەن ولەڭىن ۇسىنايىق:

"ءبىر ەلدە ءبىر "مىرزا" بار ۋايىمى جوق،
ءسوزىنىڭ شىندىعى از، ويىنى كوپ.
كوزىنىڭ دۇنيەگە تويىمى جوق،
ءوزىنىڭ قاۋىمىنا قايىرى جوق. 

ءبىر ەلدە ءبىر "مىرزا" بار تايراڭداعان،
ەلىنىڭ ەرتەڭى ءۇشىن ويلانباعان. 
تابانى تيگەن جەردى ويرانداعان، 
ەشقاشان ادىلدىكپەن سايلانباعان. 

ءبىر ەلدە ءبىر "مىرزا" بار قالا سالعىش، 
تاريحتى قولدان جاساپ الا سالعىش. 
جان بولسا اعات كەتكەن جەرىن ايتقان، 
اياماي اباقتىعا سالا سالعىش. 

ءبىر ەلدە ءبىر "مىرزا" بار توي تويلاعىش، 
وز-وزىنە تامسانىپ پاي-پايلاعىش. 
ورايى كەلمەسەدە ۇرانداتىپ، 
ماڭايى اتىن ايتىپ ايقايلاعىش. 

ءبىر ەلدە ءبىر "مىرزا" بار قاجىماعان، 
تۋىسى ۇرى-قارى، ءۋازىرى ارام. 
جۇلىپ جەۋدى جۇمىسقا اينالدىرعان، 
ۇلتىنا قۇداي بەرگەن قازىنادان. 

ءبىر ەلدە ءبىر "مىرزا" بار اقىن،باتىر، 
ەشكىمنىڭ ءداتى جەتپەس قاتۋعا ءتىل. 
پايداعا ولشەمى جوق باتىپ جاتىر، 
سەبەبى ەلىن جەرىن ساتىپ جاتىر. 

ءبىر ەلدە ءبىر "مىرزا" بار سارايى كوپ، 
سارايلاردا قول سۇيگىش مالايى كوپ. 
جالپىنىڭ سۇيىكتىسى كورىنگەنمەن، 
حالقىنىڭ وڭالاتىن ورايى جوق. 

ءبىر ەلدە ءبىر "مىرزا" بار توسەك قۇمار، 
الۋ مەن كوبەيتۋدەن ەسەپ قۇرار. 
ءوزىنىڭ قوراسىندا تۇرماسا ەگەر، 
ات تۇگىلى پىراقتىدا ەسەك قىلار. 

ءبىر ەلدە ءبىر "مىرزا" بار كوزى جۇيرىك، 
بارشاعا ءاربىر ايتقان ءسوزى بۇيرىق. 
ول كىسىنىڭ اتىمەن قاتار قويىپ،
اللانى اتاعاننىڭ ءوزى "شيرىك". 

مىرزا جوق ەشبىر ەلدە عاجاپ مۇنداي، 
مومىن جۇرتىن توزدىرعان قاجىپ تىنباي. 
جاراتقانىم سول ءبىر ەلدى مازاق قىلماي، 
مەيىرىمسىز مىرزاسىنان ازات قىلعاي"

اقىن جەلىدەگى جازباسىندا ءوزىنىڭ ءدال وسىنداي ساياسي نەمەسە انشىلەر تۋرالى ايتقان سوزدەرى عانا ءجيى تارايتىنىنا وكىنىش بىلدىرگەن. 

"بىرنەشە كۇننەن بەرى وسى شۋماقتار جايىندا سۇراق قويعىش ادامادار كوبەيىپ كەتتى. نەگە ەكەن؟... جالپى مەنىڭ ايتىلعان، جازىلعان سوزدەرىمنىڭ ىشىنەن ەڭ كوپ تارايتىنى نە ساياسي،نە انشى-بيشىلەر جايىنداعى سوزدەر. وكىنىشتى... تۋعان جەرىم، ۇلتىم، ادامدىق حاقىندا ايتىلعان سوزدەرىمدى قىستىرىپ جاتقان قازاق جوق. ءبارىنىڭ اڭدىعانى ينتريگا. سوسىن كەلىپ جانى اشيتىن ادامنىڭ ماسكاسىن كيىپ: "قىسىم كورسەتىپ جاتقان جوق پا؟"، "بايقاشى ايتەۋىر " دەپ ايتقىشتار تاعى بار. شىنتۋايتىنا كەلگەندە ماعان بىردەڭە بولسا، "زايتوۆقا ءبۇيتىپتى"، "ءوزى ايتتى" دەگەن وسەكتى العاشقى بولىپ تاراتۋعا دەگەن قۇلشىنىس. ايتپەسە، وسىنداي سوزدەردى تاۋىپ الىپ، سىقيتىپ سۋرەتىڭدى قويىپ، جانتالاسا تاراتۋعا نە تۇرتكى دەيسىڭ؟!

ءتىپتى، كوشەدە كورە سالا سۋرەتكە تۇسەيىكشى، سەنى جاقسى كورەمىن دەگىشتەرگە سۋرەتكە تۇسەتىن كۇيدە ەمەسپىن دەپ قالساڭ، قارعاپ-سىلەپ، ايتپاعاندى ايتىپ كەتەتىن جانداردىكى ماحاببات قوي دەيمىسىڭ؟! امال نەشىك كونەمىن. جانىمدى قىنجىلتاتىنى ءبىزدىڭ قازاقتىڭ ايتقانىڭدى توقىماي جاتىپ تاراتىپ، ءوزى ماقتانۋ ءۇشىن سەنى وتىرىك جاقسى كورەمىن دەپ الداۋعا قۇمارتىپ كەتكەنى. قايران قازاعىم-اي... سوندا دا سۇيەمىن سەنى"، - دەپ نازىن ايتقان اقىن جازباسىن مىناداي ولەڭمەن تۇيىندەپتى:

"ۇل بول دەسەڭ، ۇلىڭمىن،

قۇل بول دەسەڭ، قۇلىڭمىن!     

اڭدىعاندار ارىسى مەن بەرىسىن.

التىندادى جاعا تۇگىل جەڭ ۇشىن.

تالتاڭدايمىن ەسە بەرمەي سولارعا

كەدەيلىكتىڭ كيىپ الىپ كەبىسىن.

جەرىگەندەر ءبىرجولاتا جەرىسىن

ابىرويىم ارتسىن، مەيلى كەمىسىن

سايقال دۇنيە ءۇشىن ءبىراق ەشقاشان،

سايتانمەنەن جاسامايمىن كەلىسىم.

كوڭىل-كوكتەم جىردان توكسە جەمىسىن

ءاربىر ءسوزىم اللا بەرگەن جەڭىسىم.

مەن ومىرگە كەلگەن جوقپىن جەم ءۇشىن،

مەنى شەشەم تۋىپ بەرگەن ەل ءۇشىن"