باننەر ءۇشىن 15 كۇنگە سوتتالعان بەيبارىس تولىمبەكوۆ اسكەرگە كەتتى دەپ جازادى Qamshy.kz اقپارات اگەنتتىگى Vlast.kz سايتىنا سىلتەمە جاساي وتىرىپ.
Vlast.kz سايتىنىڭ تىلشىسىنە سۇحبات بەرگەن بەيبارىس تولىمبەكوۆ اسكەري بورىشىن جامبىل وبلىسىنداعى وتار اسكەري گارنيزونىندا وتەيتىنىن ايتقان.
"وتارعا اپارا جاتىر، فورما كيگىزدى. سىزدەردى كىرگىزبەگەن سياقتى؟ قاي اسكەري بولىمگە باراتىنىمنان بەيحابارمىن. سەرجانتتاردى دايارلايتىن بولىمشە دەپ جاتىر" - دەگەن تولىمبەكوۆ.
ەستەرىڭىزگە سالا كەتەيىك، 21 ساۋىردە الماتى مارافونىندا ءاسيا تۋلەسوۆا مەن بەيبارىس تولىمبەكوۆ كوشەگە "شىندىقتان قاشىپ قۇتىلا المايسىڭ»، "ءادىل سايلاۋ ءۇشىن" جانە "مەنىڭ ءوز تاڭداۋىم بار" دەگەن باننەرمەن شىققان. ولاردى پوليسيا قىزمەتكەرلەرى جەدەل ۇستاپ، 15 كۇنگە سوتتالعان بولاتىن. 14 كۇننەن كەيىن ءاسيا مەن بەيبارىس دەنساۋلىعىنا بايلانىستى مەرزىمىنەن بۇرىن بوساتىلعان. بۇل جاعداي جەلىدە كوپتەگەن قازاقستاندىقتاردىڭ نارازىلىعىن تۋدىرىپ، الەۋمەتتىك جەلى قولدانۋشىلارى بانەر ءۇشىن اباقتىعا جابىلعان جاستارعا قولداۋ كورسەتكەن ەدى.
ۇسىنعان: ميات كاشىباي
