ۋكراينانىڭ بۇرىنعى پرەزيدەنتى پەتر پوروشەنكو ساياساتتان كەتپەيتىنىن جانە ەلدىڭ جاڭا پرەزيدەنتى ۆلاديمير زەلەنسكييگە كومەك كورسەتۋگە دايىن ەكەنىن جەتكىزدى دەپ حابارلايدى Qamshy.kz اقپارات اگەنتتىگى كوررەسپوندەنت.net سايتىنىڭ مالىمەتتەرىنە سۇيەنىپ. 

ول بۇل تۋرالى Die Welt باسىلىمىنا بەرگەن سۇحباتىندا مالىمدەگەن. ۋكراينانىڭ ەكس-پرەزيدەنتى ساياساتتى تاستاۋ ويىندا جوق ەكەنىن، 2024 جىلى بولاتىن كەلەسى پرەزيدەنت سايلاۋىنا مىندەتتى تۇردە قاتىساتىنىن ايتقان.

«ءيا، مەن ساياساتتا قالامىن جانە جاڭا باسشىعا كەڭەس بەرىپ، كومەكتەسۋگە دايىنمىن. ارينە ول مەنىڭ بۇل ۇسىنىسىمدى قابىل السا»، - دەدى بۇرىنعى پرەزيدەنت.

جانە ونىڭ كەلەسى 2024 جىلعى سايلاۋعا قاتىسۋداعى نەگىزگى ماقساتى بيلىكتى ۇستاپ قالۋ ەمەس ەكەندىگىن، كەرىسىنشە ۋكراينانىڭ جەتىستىگىن نىعايتۋعا بار كۇشىن سالاتىنىن اتاپ ءوتتى.

«مەن وسى كۇنگە دەيىن ەلىمىز قول جەتكىزگەن بەلەستەردى وسىدان 100 جىل بۇرىنعىداي جوعالتىپ الماس ءۇشىن  بارىمدى سالعىم كەلەدى. ءبىز سول كەزدە تاۋەلسىزدىگىمىزدى جوعالتىپ الدىق، 1932-33 جىلدارى بولعان اشتىقتان ۋكراينالىقتاردىڭ تەڭ جارتىسى كوز جۇمدى، ەكىنشى دۇنيەجۇزىلىك سوعىس كەزىندە دە قىرىلدىق، ۋكراينالىق ءپاتريوتيزمدى جويىپ جىبەرگىلەرى كەلدى. قۇدايدىڭ قولداۋىمەن، الداعى ۋاقىتتا ءبىز ونداي جاعدايلارعا جول بەرمەيتىن بولامىز»، - دەپ مالىمدەدى ەكس-پرەزيدەنت پوروشەنكو.

سونىمەن قاتار، پوروشەنكو پرەزيدەنت بولعان كەزدەگى جەتىستىكتەرىمەن ءبولىسىپ، ءوزىنىڭ پرەزيدەنت بولعانىنا ماقتاناتىنىن جەتكىزدى.

وقي وتىرىڭىز:

♦ ۇلىقتاۋ راسىمىندە زەلەنسكييدىڭ ءسوزىن ءبولدى

♦ زەلەنسكيي “كەت” دەدى. كەتتى!

♦زەلەنسكيي: سۋرەتىم ەش جەردە ىلىنبەۋى ءتيىس. پرەزيدەنت تابىناتىن يكونا ەمەس

دايىنداعان: مارجان سابەت