دۇكەن سورەلەرىندە قۇرامىندا قۋاتتاندىرعىشى بار مۇز كونفەتتەر پايدا بولدى دەپ حابارلايدى Qamshy.kz اقپارات اگەنتتىگى.
بۇل تۋرالى «ساپا» تۇتىنۋشى قۇقىعىن قورعاۋ ۇلتتىق قوعامى حابارلادى.
"قاشاننان بەرى ەكەنىن ناقتى بىلمەيمىز، ءبىراق دۇكەن سورەلەرىندە قۇرامىندا energy، redbul اتاۋلى قۋاتتاندىرعىشى بار چۋپا-چۋپس اتاۋلاتىن مۇز كونفەتتەر پايدا بولدى. بالام ءتاتتىنى ساتىپ الىپ بەر دەدى. سىرتىنداعى جازۋدى وقىپ، شوشىپ كەتتىم. سىرتى قارا ءتۇستى بولعاندىقتان، نازارىم بىردەن اۋدى. بالالارعا ارنالعان ءتاتتىنىڭ قۇرامىندا دەنساۋلىعىنا اسا ءقاۋىپتى نارسەنىڭ بار ەكەنى اشۋىما ءتيدى" - دەگەن ماتىندە حات جازدى تۇتىنۋشىلاردىڭ ءبىرى.
راسىمەن دە، نارىقتا سپورتشىلار مەن اۋىر فيزيكالىق ەڭبەكپەن اينالىساتىن ادامدارعا ارنالعان قۋاتتاندىرعىش كونفەتتەر پايدا بولدى. سىرتقى فورماسى بالالاردىڭ مۇز كونفەتىنە ۇقسايدى. مىسالى، Spring Energy كونفەتى - كولەمى كىشكەنتاي ءارى سۇيكىمدى. ءبىراق قۇرامىندا كوپشىلىك بىلەتىن زياندى قوسپا كوفەين مەن تاۋرين بار. ءوندىرۋشى - "مالۆيك" (رەسەي، ماسكەۋ قالاسى) كونديتەر فابريكاسى. وندىرۋشىلەر بۇل ءونىمدى بالالارعا تۇتىنۋعا بولمايتىنىن ەسكەرتەدى.
قۇرامىندا گۋارانا سىعىندىسى بار رەسەيدىڭ «Magnum» نەمەسە «ENERGON" اتتى باتارەيا تۇرىندەگى كونفەتتەرى دە بالالاردىڭ نازارىن اۋدارۋى مۇمكىن. بۇل قۇرامىندا كوفەينى كوپ تابيعي ءونىم. ءبىر كونفەتتىڭ قۇرامىندا كوفەيننىڭ تاۋلىكتىك دوزاسىنىڭ جارتىسى بار. بەس كونفەتتى تۇتىنساڭىز (ءبىر قوراپتا بەس تال بولادى)، ول قۋاتتاندىرعىش سۋسىننىڭ بەسەۋىن الماستىرا الادى. بۇل كونفەتتەر 18 جاسقا تولماعان بالالارعا ارنالماعان! ول تۋرالى تاۋاردىڭ قاپتاماسىندا جازىلعان.
تىيىم سالىنعان نارسەنىڭ قاشان دا ءتاتتى ەكەنىن ءبارى بىلەدى. كەيدە وندىرۋشىلەر مۇنى ماركەتينگتىك ءتاسىل رەتىندە پايدالانادى. دۇكەن سورەلەرىنەن "ياگۋار" اتاۋلى قۋاتتاندىرعىش ءدامى بار «چۋپا-چۋپس XXL تريو» كونفەتىن دە تابا الادى. ءتىپتى قاپتاماسىندا سۋرەتى دە كورسەتىلگەن. الايدا، مۇز كونفەتتىڭ قۇرامى: نەگىزىنەن قانتتان، گليۋكوزا ءشارباتىنان، جەمىس-جيدەكتى ەزبەدەن، بوياعىشتاردان، حوش يىستەندىرگىشتەن تۇرادى دەلىنگەن. قۇرامىنان ەشقانداي دا اسا ءقاۋىپتى كوفەيندى تابا المايسىز. ءبىراق قوسىمشا وندىرۋشىلەر قوسپا رەتىندە اسا ءقاۋىپتى ە 320 انتيوكسيدانتىن پايدالانادى. بۇل زات نيتراتپەن وپ-وڭاي ارەكەتتەسىپ، ناتيجەسى قان قۇرامىندا پاتولوگيالىق وزگەرىستەرگە الىپ كەلەدى.
«ساپا» تۇتىنۋشى قۇقىعىن قورعاۋ ۇلتتىق قوعامى اتا-انالاردى بارىنشا مۇقيات بولۋعا شاقىرادى. نارىقتاعى ءتاتتىنىڭ ءبارى دەرلىك بالالارعا ارنالماعانىن ەسكەرتەدى!
ۇسىنعان: ماقپال سەمباي
