تۇركىستان اكىمدىگى جەلىدە تاراپ جاتقان ۆيدەوعا قاتىستى پىكىر ءبىلدىردى، دەپ جازادى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ. 

WatsApp، Instagram الەۋمەتتىك جەلىلەرىندە جۇمىسشىلاردىڭ اياق جول توسەنىشىن جيناپ جاتقان ساتىنەن ۆيدەو تاراعان. ۆيدەو اۆتورى قالاعا جوعارى قازاقستاننىڭ پرەمەر-مينيسترى اسقار مامين كەلگەندە توسەلىپ، كەتكەندە جول تاستارى قايتا الىنىپ جاتىر دەپ مالىمدەگەن.

ال قالا اكىمدىگىنىڭ وكىلدەرى ۆيدەودا تۇسىرىلگەن اۋماق - تۇركىستان قالاسى تاۋكە حان داڭىلى مەن كەنەسارى حان كوشەسىنىڭ قيىلىسى ەكەنىن ايتادى.

"قازىرگى تاڭدا تۇركىستان قالاسىنىڭ تاۋكە حان داڭعىلىندا ورتاشا جوندەۋ جۇمىستارى جۇرگىزىلىپ جاتىر. جالپى قالا اۋماعىندا نىساندار سالۋمەن قاتار جولداردىڭ جوندەلىپ جاتقانىن دا ەل بىلەدى. اتالعان نىسانعا ق ر پرەمەر-مينيسترى اسقار مامين تۇركىستان قالاسىنا جۇمىس ساپارى بارىسىندا بارماعان. ياعني، پرەمەر-مينيستردىڭ ساپارىنا ارنايى سالىندى دەگەن دەرەك - جالعان"، - دەپ مالىمدەدى اكىمدىك وكىلدەرى.

نەگىزىندە اۆتور ۆيدەوعا ءتۇسىرىپ جاتقان ساتتە مەردىگەر مەكەمەنىڭ جۇمىسشىلارى وزدەرى ساپاسىز ورىنداعان 30 شارشى مەتر جۋىق اۋماق اياق جولدى قايتا توسەۋ ماقساتىندا جيناپ جاتقان ەكەن.

"ياعني تاۋكە حان داڭعىلىنىڭ كەنەسارى حان، ىبرايەۆ كوشەلەرى ارالىعىنداعى 30 شارشى مەتر جۋىق اياق جول توسەنىشى (برۋسچاتكا) جينالىپ جاتقان ءسات جۇرتشىلىققا تاراپ وتىر. بۇگىندە جينالعان قۇرىلىس ماتەريالدارى تالاپقا ساي رەتتەلىپ، (برۋسچاتكا) اياق جولدىڭ اقاۋلارى تۇزەتىلىپ، ورنىنا قايتا ورناتىلدى"، - دەگەن اكىمدىك وكىلدەرى جالعان مالىمەت تاراتقانداردىڭ ق ر قىلمىستىق كودەكسىنىڭ 274-بابى بويىنشا جاۋاپكەرشىلىك ارقالايتىنىن ەسكەرتتى.

ۇسىنعان: ميات كاشىباي