كانن كينوفەستيۆالىنىڭ "التىن پالما بۇتاعى" اتاعى "پارازيتى" كارتيناسىنىڭ رەجيسسەرى پون چجۋن حوعا بۇيىردى دەپ حابارلايدى Qamshy.kz اقپارات اگەنتتىگى ريا نوۆوستي سايتىنا سىلتەمە جاساپ.
باي وتباسىعا جالدانىپ جۇمىس جاسايتىن كەدەي شاڭىراقتىڭ جاي-كۇيى سۋرەتتەلەتىن كومەديانىڭ سوڭى ناعىز دراماعا اينالعان. وسى جانرلىق بۇرىلىس كوپتەگەن كورەرمەندەردى وزىنە تارتتى بۇل فيلمدە.
ال فەستيۆالدىڭ گران-پري جۇلدەسى ماتي ديوپتىڭ "اتلانتيكا" اتتى دەبيۋتتىك تۋىندىسىنا بۇيىرعان. جۇلدەنى سيلۆەستر ستاللونە تابىستادى.
فەستيۆالداعى "ۇزدىك رەجيسسەرلار" ماراپاتى "مولودوي احمەد" اتتى فيلم تۇسىرگەن قوس بەلگيالىقتىڭ، جان-پەر مەن ليۋك داردەننىڭ قانجىعاسىنا بايلاندى.
ەميلي بيچەم "مالىش دجو" فيلمىندەگى ءرولى ءۇشىن "ەڭ ۇزدىك ايەل ءرولى" اتاعىن السا، "ەڭ ۇزدىك ەر ادام ءرولى" ماراپاتىنا بول ي سلاۆا» تۋىندىسىنداعى ءرولى ءۇشىن انتونيو باندەراس لايىق دەپ تابىلدى.
"ەڭ ۇزدىك سەناريي" اتاعى فرانسۋزدىق سەلين سكيامماعا "پورترەت ديەۆۋشكي ۆ وگنە" كارتيناسى ءۇشىن تابىستالدى.
تاعى دا ءبىر "التىن پالما بۇتاعى" ماراپاتى قىسقامەتراجدى فيلمدەر قاتارىندا بايگەگە تۇسكەن "پروسترانستۆو مەجدۋ نامي ي نەبوم" كارتيناسىنىڭ رەجيسسەرى ۆاسيليس كيكاتوسقا بۇيىردى.
ال "ناشي ماتەري" اتتى دەبيۋتتىك ءفيلمىن تۇسىرگەن رەجيسسەر سەزار دياس "التىن كامەرانى" جەڭىپ الدى.
لادجا ءليدىڭ "وتۆەرجەننىە" ءفيلمى مەن كىشى كلەبارا مەندوستىڭ "باكۋراۋ" ءفيلمى قازىلاردىڭ ارنايى جۇلدەسىنە يە بولدى.
حالىقارالىق كانن فەستيۆالى 14-مامىردان باستاپ لازۋر جاعالاۋىندا ءوتتى. سەنبى كۇنى ءداستۇر بويىنشا ەڭ ۇزدىك تۋىندىلاردى سالتاناتتى تۇردە ماراپاتتاۋ شاراسى بولىپ، فەستيۆال ءوز مارەسىنە جەتتى.
اۋدارعان: ادىلەت مادەنيەت
