الماتى وبلىسىنىڭ تالعار اۋدانىندا جارىلعىش زات قويىلدى دەپ حابارلاعان 42 جاستاعى ازامات ۇستالدى دەپ حابارلايدى Qamshy.kz اقپارات اگەنتتىگى Hola News سايتىنا سىلتەمە جاساپ.
كۇدىكتى 26 مامىر كۇنى پوليسياعا قوڭىراۋ شالىپ، جالعامىس اۋىلى ماڭىنداعى سۋ سورعىش ستانساسىنا مينا قويىلعانىن ايتقان.
ايتىلعان ورىندى پوليسيا قىزمەتكەرلەرى قورشاۋعا الىپ، جارىلعىش زاتتى زالالسىزداندىراتىن ماماندار ءيىسشىل يتتەرمەن تەكسەرۋگە كىرىسكەن. نىسان اۋماعىندا ەشقانداي جارىلعىش زات تابىلماعان.
جەدەل ىزدەستىرۋ جۇمىستارى باستالىپ، ساناۋلى ساعاتتا قوڭىراۋ شالعان 42 جاستاعى ەر ازامات ۇستالدى. قازىرگى تاڭدا تەرروريزم اكتىسى تۋرالى جالعان حابارلاما بەرۋ دەرەگى بويىنشا قىلمىستىق ءىس قوزعالدى. تەرگەۋ جۇمىستارى تالعار اۋداندىق پوليسيا ءبولىمىنىڭ قىزمەتكەرلەرىنە تاپسىرىلعان.
الماتى وبلىستىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، كۇدىكتى ۋاقىتشا ۇستاۋ وقشاۋلاعىشىنا قاماۋعا الىنعان.
ۇسىنعان: مارجان سابەت
