بەلگىلى جۋرناليست رىسبەك سارسەنباي ۇلى الدا كەلە جاتقان كەزەكتەن تىس پرەزيدەنت سايلاۋىن قازاقستاندا مونارحيالىق بيلىك ورناتۋداعى ارەكەتتەردىڭ ءبىرى سانايدى دەپ جازادى Qamshy.kz اقپارات اگەنتتىگى.
بۇل تۋرالى رىسبەك سارسەنباي ۇلى ءوزى جاريالاعان ۆيدەو ۇندەۋ بارىسىندا ايتتى. ونىڭ پىكىرىنشە، سايلاۋعا توقايەۆتى قاتىستىرۋ – سەناريدىڭ العاشقى قادامى. سارسەنباي ۇلى ودان كەيىن بيلىك مونارحيالىق جۇيەمەن تاپسىرىلادى دەپ ەسەپتەيدى.
رىسبەك سارسەنبايدىڭ ايتۋىنشا، بويكوت – حالىق ءۇشىن قازىرگى جاعدايدا ەڭ ءتيىمدى نارسە.
"ءبىز پرەزيدەنتتىك سايلاۋعا بويكوت جاريالاۋ ارقىلى بيلىككە تالاپ قويامىز. زاڭداردى وزگەرتۋدى، زاڭدارداعى ازاماتتىق قۇقىقتى شەكتەيتىن باپتاردى الىپ تاستاۋدى تالاپ ەتەمىز. پرەزيدەنتتىك، پارلامەنتتىك، ءتىپتى، ءماسليحات سايلاۋى بولسىن، قانداي سايلاۋ وتكىزسە دە، حالىقتى قاتىستىرۋ كەرەك دەگەن تالاپ قويامىز. سوندا عانا حالىق مەملەكەتتىك بيلىكتىڭ قاينار كوزى بولادى"، – دەگەن سارسەنباي ۇلى حالىقتى 1 ماۋسىم كۇنى نۇر-سۇلتان قالاسىندا وتەتىن حالىق قۇرىلتايىنا قاتىسۋعا شاقىرىپ وتىر.
"1 ماۋسىم استانا قالاسىندا (ءبىز ونى نۇر-سۇلتان دەپ اتاۋعا قارسىمىز) حالىق ءوزىنىڭ قۇرىلتاي -جيىنىن وتكىزەدى. بۇل كۇنى ەلدەگى قازىرگى جاعدايدى تالقىعا سالادى. ەلدىڭ ەرتەڭگى جاعدايى قانداي بولماق، بيلىكتىڭ ۇستانىپ وتىرعان ساياساتى قانشالىقتى دۇرىس، سوعان تالداۋ جاسالىنادى جانە ادىلەتتى باعا بەرىلەدى"، – دەدى رىسبەك سارسەنباي ۇلى.
سونىمەن قاتار ول ۆيدەو ۇندەۋىندە الدا كەلە جاتقان سايلاۋدا "ۇلت تاعدىرى" قوزعالىسى ۇسىنعان كانديدات ءامىرجان قوسانوۆ تۋرالى دا ءوز ويىن ءبىلدىردى. رىسبەك سارسەنبايدىڭ ويىنشا، قوسانوۆ سايلاۋعا ءتۇسۋ ارقىلى حالىقتى بيلىككە جىعىپ بەرىپ وتىر.
"ەگەر قوسانوۆ "مەن قالايدا جەڭىسكە جەتەم، ماعان داۋىس بەرگەن حالىق جەڭىسكە جەتەدى جانە ءبىز سول جەڭىسىمىزدى قورعاي الامىز، داۋىستى ۇرلاعان جاعدايدا ۇرىلاردى قولىنان ۇستاپ ۇرلىعىن بەتىنە باسامىز، بيلىك سايلاۋدى بۇرمالاعان جاعدايدا قايتادان ونى تۇزەتتىرۋدى تالاپ ەتىپ، ءبىز جەڭىسكە جەتە الامىز" دەپ ايتا الاتىن بولسا، ءبىز دە ونى قولدار ەدىك. وكىنىشكە قاراي ءبىز ونىڭ سىرىن بىلگەندىكتەن ءھام ونىڭ قانداي ىس-ارەكەتكە بارا الاتىنىن باعامداعاندىقتان دا ءبىز ونى قولداي الماي وتىرمىز"، - دەدى رىسبەك سارسەنباي ۇلى.
ۆيدەو Youtube-تان الىندى
دايىنداعان: ميات كاشىباي
