مەملەكەت باسشىسى قاسىم-جومارت توقايەۆ جوعارى ەۋرازيالىق ەكونوميكالىق كەڭەستىڭ وتىرىسىنا قاتىسۋ ءۇشىن نۇر-سۇلتان قالاسىنا كەلگەن قىرعىز رەسپۋبليكاسىنىڭ پرەزيدەنتى سوورونباي جەەنبەكوۆپەن، بەلارۋس باسشىسى الەكساندر لۋكاشەنكومەن جانە مولدوۆا پرەزيدەنتى يگور دودونمەن كەزدەستى.

جەەنبەكوۆپەن كەزدەسۋدە ەكى ەل اراسىنداعى ىنتىماقتاستىق پەن حالىقارالىق ۇيىمدار اياسىنداعى بىرلەسكەن ءىس-قيمىل ماسەلەلەرى تالقىلاندى.

"ءبىزدىڭ ەلدەرىمىزدىڭ ىنتىماقتاستىعى ارتىپ كەلەدى. ۇكىمەتارالىق، پارلامەنتارالىق دەڭگەيدە جۇمىس ىستەپ كەلەمىز. الەمدىك جانە ايماقتىق ۇيىمداردا دا بىرگەمىز. تاۋەلسىزدىك جىلدارىندا قالىپتاسقان تىعىز قارىم-قاتىناستى مەن ودان ءارى دامىتۋعا بار كۇش جىگەرىمدى سالامىن"، – دەدى قازاقستان پرەزيدەنتى.

قىرعىز پرەزيدەنتى جىلى كەزدەسۋگە ريزاشىلىعىن ءبىلدىرىپ، مەملەكەتارالىق بايلانىستاردىڭ دوستىق سيپاتىن اتاپ ءوتتى.

"الىستاعى اعايىننان جاقىنداعى كورشىنى ارتىق كورەتىن ءبىز قازاقستانمەن اراداعى ىنتىماقتاستى ودان ءارى دامىتۋعا مۇددەلىمىز. بۇگىندە ۇكىمەتارالىق جول كارتاسى بويىنشا جۇمىستار اتقارىلۋدا. ءوزىڭىزدى قىرعىز رەسپۋبليكاسىنا ساپارمەن كەلۋگە شاقىرامىز"، – دەدى سوورونباي جەەنبەكوۆ.

توقايەۆ بەلارۋس پرەزيدەنتىمەن دە كەزدەستى. مەملەكەت باسشىسى الەكساندر لۋكاشەنكوعا ءىلتيپات ءبىلدىردى جانە ولاردىڭ بۇل كەزدەسۋى قازاقستاننىڭ استاناسى نۇر-سۇلتان دەپ اتالعاننان كەيىن، ءبىرىنشى رەت ءوتىپ وتىرعانىن ايتتى.

"ءبىز ءسىزدىڭ قىزمەتىڭىزدى مۇقيات باقىلاپ، ەلىڭىزدى دامىتۋداعى زور جەتىستىكتەرىڭىزدى ايتىپ وتىرامىز. ءسىز پرەزيدەنت لاۋازىمىندا ۇزاق جىلدان بەرى قىزمەت ەتىپ كەلەسىز جانە مەملەكەتىڭىزدىڭ بەدەلى مەن الەۋەتىن نىعايتۋ ءۇشىن بار مۇمكىندىكتى جاساپ جاتىرسىز"، – دەدى قاسىم-جومارت توقايەۆ.

الەكساندر لۋكاشەنكو ءداستۇرلى تۇردە جىلى قارسى العانى جانە كەزدەسۋگە مۇمكىندىك تۋعىزعانى ءۇشىن قاسىم-جومارت توقايەۆقا ريزاشىلىق ءبىلدىردى.

بەلارۋس باسشىسى تاۋەلسىز قازاقستاننىڭ قالىپتاسۋ جولىنداعى ەلباسى نۇرسۇلتان نازاربايەۆ پەن پرەزيدەنت قاسىم-جومارت توقايەۆتىڭ ءرولىن ەرەكشە اتاپ ءوتىپ، ەلىمىزدە بولىپ جاتقان ىشكى ساياسي ۇدەرىستەرگە وڭ باعا بەردى.

"ءبىزدىڭ قارىم-قاتىناستارىمىزعا كەلەر بولساق، ول ءاردايىم جاقسى بولادى. سىزدەرمەن بىرگە ىنتىماقتاستىعىمىز ناقتى باعىتتار بويىنشا ىلگەرىلەي بەرەتىنىنە كۇمانىم جوق"، – دەدى ا.لۋكاشەنكو.

تاراپتار ەكىجاقتى قارىم-قاتىناستارداعى، وڭىرلىك جانە حالىقارالىق كۇن تارتىبىندەگى وزەكتى ماسەلەلەردى تالقىلادى.

سونداي-اق قازاقستان باسشىسى مەن مولدوۆا پرەزيدەنتى يگور دودون كەزدەسىپ، ەكىجاقتى بايلانىستاردى جانە حالىقارالىق ۇيىمدار اياسىنداعى ءوزارا ءىس-قيمىلداردى تالقىلادى.

"ءبىز مولدوۆامەن ىنتىماقتاستىقتى نىعايتۋعا جانە ساۋدا-ەكونوميكالىق سەرىكتەستىكتى ودان ءارى كەڭەيتۋگە نيەتتىمىز. ءوزارا قارىم-قاتىناستارىمىزدى دامىتۋ ءۇشىن بىزدە بارلىق مۇمكىندىك بار دەپ ويلايمىن"، – دەدى قاسىم-جومارت توقايەۆ.

مولدوۆا رەسپۋبليكاسىنىڭ پرەزيدەنتى جىلى قابىلداعانى ءۇشىن ريزاشىلىق ءبىلدىرىپ، مەملەكەتارالىق ديالوگتىڭ جەمىستى سيپاتىن ايتتى.

"ەلدەرىمىز اراسىندا دوستىق قاتىناستار ورناعان. 30-دان استام ەكىجاقتى كەلىسىمدەرگە قول قويىلدى. 12 قۇجات قارالۋدا. مولدوۆا ءۇشىن ەۋرازيالىق ەكونوميكالىق وداقپەن ينتەگراسيالىق ۇدەرىس ماڭىزدى سانالادى. بۇل باعىتتا ءبىزدىڭ الدىمىزدا اۋقىمدى جۇمىس تۇر"، – دەدى يگور دودون.

جوعارى ەۋرازيالىق ەكونوميكالىق كەڭەستىڭ وتىرىسىنا كىمدەر قاتىسادى

29 مامىردا نۇر-سۇلتاندا جوعارى ەۋرازيالىق ەكونوميكالىق كەڭەستىڭ وتىرىسى وتەدى، ول ەكى مەرەيتويلىق داتا – قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ ەۋرازيالىق ينتەگراسيا تۋرالى يدەياسىنا 25 جىل جانە ەۋرازيالىق ەكونوميكالىق وداق تۋرالى شارتقا قول قويىلعانىنا 5 جىل تولۋىنا ورايلاستىرىلماق.

ءىس-شاراعا ەلباسى نۇرسۇلتان نازاربايەۆ، مەملەكەت باسشىسى قاسىم-جومارت توقايەۆ، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سوورونباي جەەنبەكوۆ، رەسەي پرەزيدەنتى ۆلاديمير پۋتين، ارمەنيا پرەمەر-مينيسترى نيكول پاشينيان قاتىسادى.

مولدوۆا پرەزيدەنتى يگور دودون ەاەو جانىنداعى باقىلاۋشى - مەملەكەت باسشىسى، تاجىكستان پرەزيدەنتى ەمومالي راحمون مەن تمد اتقارۋ كوميتەتىنىڭ ءتوراعاسى سەرگەي لەبەديەۆ قۇرمەتتى قوناق رەتىندە قاتىسادى.