ماقتاارال اۋدانىندا "مۇگەدەكتىككە شىعارىپ بەرەمىن" دەگەن جەلەۋمەن بىرنەشە ادامنان اقشا العان الاياق ۇستالدى، دەپ حابارلايدى Qamshy.kz اقپارات اگەنتتىگى Almaty.tv سايتىنا سىلتەمە جاساي وتىرىپ.

تەرگەۋ بارىسىندا كۇدىكتىنىڭ ماقتاارال تۇرعىنىنىڭ ۇيىنە قوناققا بارعاندا ونىڭ ۇلى ورتالىق اۋرۋحانانىڭ ەسەبىندە تۇراتىنىن ءبىلىپ، "مۇگەدەكتىككە شىعارىپ بەرەمىن" دەپ الداپ، قۇجاتتارىمەن بىرگە 140 000 تەڭگە اقشاسىن الىپ كەتكەنى انىقتالدى. اتالعان ءىس بويىنشا تەكسەرۋ بارىسىندا جابىرلەنۋشىنىڭ جالعىز بۇل عانا ەمەس، كۇدىكتىنىڭ تۋرا وسىنداي ۋادەمەن تاعى بىرنەشە ادامنان بىردە 130 000 تەڭگە، كەلەسى بىرىندە 170 000 تەڭگەدەن الىپ وتىرعانى بەلگىلى بولدى.

اتالعان جايتتار بويىنشا ق ر قك-نىڭ 190-بابىمەن سوتقا دەيىنگى تەرگەپ-تەكسەرۋ جۇمىستارى جۇرگىزىلگەن. اۋداندىق پوليسيا قىزمەتكەرلەرىنىڭ 3 بىردەي جابىرلەنۋشىنىڭ ارىزىنا قاتىستى شۇعىل ارەكەت ەتكەنىنىڭ ارقاسىندا، ءبىر اپتا كولەمىندە كۇدىكتى قولعا تۇسكەن. الايدا، الاياقتىقپەن اينالىسقان ازامات 3 جابىرلەنۋشىگە دە كەلتىرگەن شىعىنىن تولىق وتەپ، ارىزدانۋشىلاردىڭ كەشىرۋىنە بايلانىستى، قىلمىستىق ءىس توقتاتىلعان.

قىلمىستىق ءىستى تەرگەۋ بارىسىندا بەلگىلى بولعانى، الاياقتىققا جەرگىلىكتى تۇرعىنداردىڭ زامانعا ساي دامىعان تەحنيكانىڭ ءتىلىن تولىق بىلمەگەنى، جاقسى تانىمايتىن ادامعا سەنە سالعانى جول بەرگەن.  

سوندىقتان، تۇركىستان وبلىسى پوليسەيلەرى تۇرعىندارعا الاياقتاردىڭ ارباۋىنا ەرمەي، كەز-كەلگەن ماسەلەنى زاڭ جۇزىندە شەشۋدى ەسكەرتەدى. ەگەردە وسىنداي الاياقتاردىڭ قىلمىسىنا كۋا نەمەسە قۇربانى بولساڭىز، "102" شۇعىل نومىرىنە حابار بەرىڭىزدەر، ويتكەنى دەر كەزىندە بەرىلگەن اقپارات قىلمىستىڭ تەز اشىلۋىنا ىقپال ەتەدى دەيدى ولار.