قازاقستاندا 9 ماۋسىمعا جوسپارلانعان پرەزيدەنت سايلاۋىنا "ۇلت تاعدىرى" قوزعالىسى ۇسىنعان كانديدات ءامىرجان قوسانوۆ Youtube جەلىسىندەگى QaJet ارناسىنا سۇحبات بەردى دەپ جازادى Qamshy.kz اقپارات اگەنتتىگى.

سۇحبات بارىسىندا قوسانوۆ ءوزىن "بيلىكتىڭ ادامى" دەپ سىناپ جۇرگەن وپپوزيسيا وكىلدەرىنە جاۋاپ بەردى. ونىڭ ايتۋىنشا، سايلاۋاعا تۇسپەي تۇرىپ ءوز ءبىر مۇددە جولىندا جۇرگەن ارىپتەستەرىنىڭ كانديدات رەتىندە تىركەلگەننەن كەيىن تەرىس اينالۋى - ولاردىڭ پەندەلىك پيعىلدارىمەن بايلانىستى. 

"قازاقتا "وتىرساڭ وپاق،، تۇرساڭ سوپاق" دەگەن ءسوز بار. مەن وسى سايلاۋعا تۇسپەسەم دە، مەنى ءقازىر سىناپ جۇرگەندەر ءدال وسى اڭگىمەلەرىن ايتاتىن ەدى. "قوسانوۆ قورىقتى"، "بيلىك ونىڭ اۋزىن جاپتى"، "مۇمكىندىگى بولا تۇرا سايلاۋعا تۇسپەدى" دەپ جازار ەدى. سوندىقتان مەن وپاقپىن با، سوپاقپىن با ءبىر قۇدايدىڭ ءوزى بىلەدى. مەنى سىناپ جۇرگەندەرگە ايتارىم، نەگە ولار مەنى سىناپ جۇرگەندەي بيلىكتى سىنامايدى؟ كەز كەلگەن ساياساتكەردى سىناۋ ءۇشىن ءبىر عانا سەبەپ بولۋ كەرەك. ەگەر ول باسىندا ايتقان سوزىنەن اينىسا سىناۋعا بولادى. مەن وسىدان 22 جىل بۇرىن بيلىككە ايتقان سوزدەرىمنەن اينىعان ەمەسپىن. سوندىقتان مەنى بيلىكتىڭ ادامى دەگەندى دوعارىڭىزدار"، - دەدى ءامىرجان قوسانوۆ. 

سونىمەن قاتار ول سۇحبات بارىسىندا ءوزىنىڭ شتابىنىڭ سايلاۋ الدى ۇگىت-ناسيحات جۇمىستارىن نەلىكتەن سىلبىر جۇرگىزىپ جاتقانىن ايتتى. ونىڭ ايتۋىنشا، باستى كەدەرگى - قارجى تاپشىلىعى مەن مۇمكىندىكتىڭ ازدىعى.

قوسانوۆ ەگەر سايلاۋ ءادىل وتپەسە، وزىنە داۋىس بەرگەن حالىقپەن بىرگە بيلىكتەن ادىلدىك تالاپ ەتۋگە دايىن ەكەنىن ايتتى. سونىمەن قاتار ول سۇحباتتا شەتەلدەگى قازاقتار ماسەلەسى، سايلاۋ بارىسى، سايلاۋدا جەڭىسكە جەتسە ورىن الاتىن وزگەرىستەر تۋرالى ءسوز قوزعالدى.

ۇسىنعان: ميات كاشىباي