ارىس قالاسىندا توتەنشە جاعدايلار ورىن العان كۇننىڭ ەرتەسىنە-اق ءوڭىر باسشىسى اسقار مىرزاحمەتوۆتىڭ تاپسىرماسىمەن جامبىل وبلىسىنان ءبىر توپ ازاماتتار وقيعا ورىن العان اۋماققا كەلىپ جەتكەن بولاتىن دەپ جازادى Qamshy.kz اقپارات اگەنتتىگى. اق جول اۋىلىنداعى شتابتا قىزۋ جۇمىس باستالىپ، وبلىسقا تيەسىلى 3- سەكتور بويىنشا تۇگەندەۋ شارالارى بىردەن قولعا الىنعان. جالپى، 3-سەكتوردا 327 جەكە تۇرعىن ءۇي، 13 كوممەرسيالىق باعىتتاعى نىسان بار.

بۇگىندە قالاداعى شيپاجاي اۋماعىندا جامبىل وبلىسىنىڭ شتابى ورنالاسقان. وندا كەرەكتى قۇرال-سايماندار، پالاتكالار قامتىلعان. 200 ادام قۇرىلىسقا ساقاداي-ساي.

ودان بولەك بۇگىن تاڭعى ساعات 8:00-دەن باستاپ قالاعا ورالىپ جاتقان ارىستىقتاردى قابىلداۋعا 100 ادام ءبولىندى. ولار وزىمىزگە قاراستى 9 كوشە بويىنشا ارنايى توپتارعا توپتاسىپ، تۇرعىنداردى قابىلداپ، جايعاستىرۋمەن، ۇيلەرىندەگى قاۋىپسىزدىكتى قامتاماسىز ەتۋمەن اينالىسۋدا. بولىنگەن توپتاردىڭ قۇرامىندا جەرگىلىكتى پوليسيا، پروكۋراتۋرا ورگاندارىنىڭ قىزمەتكەرلەرى، ساپەرلار جانە وزگە دە ماماندار بار. جەرگىلىكتى جەردەگى اقساقالدار دا ءتۇسىندىرۋ جۇمىستارىنا جۇمىلدىرىلۋدا.

سونداي-اق،  ءدال قازىرگى ۋاقىتتا بولىنىسىمىزدەگى اۋماقتا زەرتتەپ-زەردەلەۋ شارالارى اتقارىلىپ، قاجەتتىلىكتەر انىقتالۋدا. ناقتى قاجەتتىلىكتەردىڭ كولەمى انىقتالعان سوڭ، جوبالىق سمەتالىق قۇجاتتار جاسالىپ، تيەسىلى قاراجات ءبولىنىپ، قالپىنا كەلتىرۋ ءۇشىن قۇرىلىس جۇمىستارى بىردەن باستالماق.

جامبىل وبلىسىنا تيەسىلى 3-سەكتور جارىلىس وشاعىنا وتە تاياۋ ورنالاسقاندىقتان، مۇنداعى تۇرعىن ۇيلەر مەن نىسانداردىڭ باسىم بولىگىندە اقاۋلاردىڭ بارى انىقتالعان. ەكى جەكە تۇرعىن ءۇي مۇلدە جارامسىز جاعدايدا. الايدا، ءتيىستى ەسەپتەۋلەر جۇرگىزىلگەننەن سوڭ، بارلىعى تولىعىمەن قالىپقا كەلتىرىلەدى.

ايتا كەتەيىك، جاپا شەككەن ارىستىقتارعا قولداۋ كورسەتۋ ماقساتىندا بارشا جامبىلدىقتاردىڭ اتسالىسۋىمەن بۇگىنگە دەيىن 75 توننا ازىق-تۇلىك، تۇرمىسقا قاجەتتى بۇيىمدار جەتكىزىلدى. وڭىردەگى «نۇر وتان» پارتياسىنىڭ وبلىستىق جانە اۋداندىق فيليالدارىندا قابىلداۋ پۋنكتەرى ۇزدىكسىز جۇمىس ىستەپ تۇر. الداعى ۋاقىتتا جينالعان زاتتار تاعى دا جىبەرىلەتىن بولادى.