ىشكى ىستەر ءمينيسترى ەرلان تۇرعىمبايەۆ زارەچنىي تۇرمەسىندە بولعان جاعدايعا قاتىستى تۇسىنىكتەمە بەردى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

"26 شىلدەدە الەۋمەتتىك جەلىلەردە ۆيدەو تارالىپ كەتتى. وندا الماتى وبلىسىنىڭ زارەچنىي كەنتىندەگى تۇرمەدە سوتتالعاندارعا زورلىق-زومبىلىق كورسەتۋ فاكتىلەرى جاريالانعان. مەن بىردەن قىزمەتتىك تەكسەرىس جىبەردىم. كولونياعا ىشكى قاۋىپسىزدىك ماماندارى باردى"، - دەدى تۇرعىمبايەۆ.

ءمينيستردىڭ ايتۋىنشا، وسى ۋاقىتقا دەيىن 40 ۆيدەو مەن اۋديو جازبا زەردەلەنىپ، سوتتالعاندارعا زورلىق كورسەتۋ فاكتىلەرى راستالدى. كەشە تارتىپتىك كوميسسيانىڭ شەشىمىمەن 14 قىزمەتكەر تارتىپتىك جازاعا تارتىلدى. ولاردىڭ ىشىندە 7ء-ى ىشكى ىستەر ورگاندارىنان شىعارىلدى. تۇرمەنىڭ ەكى ورىنباسارى مەن مەكەمە باستىعى دا جۇمىستان بوساتىلدى.

"كەشە شۇعىل شارالار بارىسىندا مەكەمەنىڭ 5 قىزمەتكەرى ۇستالىپ، ەكى قىلمىستىق ءىس قوزعالدى. سول بەس ادامنىڭ ىشىندە تۇرمە باستىعىنىڭ ورىنباسارى دا بار. تەرگەۋ جالعاسۋدا، ەكى كۇننىڭ ىشىندە ءتيىستى شارا قابىلدانادى. شىنى كەرەك، ونداي فاكت قىلمىستىق اتقارۋ جۇيەسى ءۇشىن ماسقارا. ءبىز باسقا مەكەمەلەردى دە تەكسەرەتىن بولامىز"، - دەدى تۇرعىمبايەۆ.