الماتى وبلىسىنىڭ رايىمبەك اۋدانىندا قۇرىلىس جۇمىستارى قىزۋ ءجۇرىپ جاتىر، دەپ حابارلادى "حابار 24" سايتى.

باستاپقىدا جاڭا اۋداندى دامىتۋعا 2 ملرد تەڭگە بولىنسە، بۇگىندە بىرەۋىنىڭ عانا قۇنى وسىنشاما قارجىعا تەڭ كەلەتىن ۇلكەن عيماراتتار سالىنىپ، ءىرى جوبالار جۇزەگە اسا باستادى.

ارداق ايبار ۇلى، ءتىلشى:

– رايىمبەكتەي باتىر بابامىزدىڭ ەسىمىمەن اتالاتىن بۇل اۋداننىڭ ورتالىعى مارتەبەسى نارىنقولعا بەرىلگەلى بەرى اۋىلدىڭ كۇرەتامىرىنا قان جۇگىرە باستاعانداي. مۇندا ەسكى عيماراتتار مەن كوشەلەر قايتا جوندەلىپ، جاڭا الەۋمەتتىك نىساندار، جاڭا ۇيلەر سالىنىپ جاتىر. ەڭ باستىسى كەزىندە قالاعا ۇدەرە كوشكەن تۇرعىندار بىرتىندەپ اۋىلعا ورالۋدا. اۋدان ورتالىعىنداعى ەسكى الەۋمەتتىك نىساندارعا كۇردەلى جوندەۋ جاسالىپ، جاڭا سەرۆيستىك اكىمدىك، حالىققا قىزمەت كورسەتۋ ورتالىعى، دەنەشىنىقتىرۋ-ساۋىقتىرۋ كەشەندەرى سالىنىپ جاتىر. ءقازىر نارىنقولداعى بالالار وينايتىن الاڭقايلارعا كورشى اۋىلدىڭ تۇرعىندارى دا ءجيى كەلەتىن بولعان.

جازيرا قاتامبايەۆا، قاراتوعان اۋىلىنىڭ تۇرعىنى:

– اۋرۋحانامىز قايتادان سالىنىپ جاتىر. بۇرىن بىزدە بالالارعا مىنانداي مۇمكىندىكتەر بولماعان. ەگەر ۇلكەن كىسىلەر كەلىپ، جاتتىعامىز دەپ جاتسا، وعان دا مۇمكىندىك جاساپ قويعان. ءقازىر بۇرىنعىداي ەمەس، اۋدانىمىز شىن مانىندە جاقسى بولىپ كەلە جاتىر.

"جاعاتال وزەنىنىڭ ۇزىندىعى 2 شاقىرىمدىق جاعالاۋىن نىعايتىپ، ونىڭ ۇستىنەن وتەتىن ەكى كوپىرگە كۇردەلى جوندەۋ جاساپ جاتقان جايىمىز بار. مەكتەپتەرىمىز جاڭا وقۋ جىلىنا دايىن. قاقپاق اۋىلىندا اۋىزسۋ قۇبىرى جوندەلىپ، قىس تۇسكەنشە نارىنقولداعى كوشەلەردىڭ بارلىعىنا اسفالت توسەيمىز"، – دەيدى جەرگىلىكتى بيلىك وكىلدەرى.

عالىم جۋسانبايەۆ، رايىمبەك اۋدانى اكىمىنىڭ ورىنباسارى:

– نارىنقول اۋىلىنىڭ ءوزىنىڭ ىشكى جولدارى – 54 شاقىرىم. 54 شاقىرىم بيىلعى جىلدىڭ اياعىنا دەيىن 100 پايىز تۇگەل اسفالتتالىپ، جوندەۋ جۇمىستارى جۇرگىزىلۋدە. نارىنقولدا وتكەن جىلى مەملەكەتتىك قىزمەتشىلەر مەن بيۋدجەتتىك سالا قىزمەتكەرلەرىنە ارنالعان 20 ارەندالىق ءۇي سالىنىپ، پايدالانۋعا بەرىلدى. كۇزدە 83 كوممۋنالدىق ءۇيدىڭ قۇرىلىسى قولعا الىنباقشى.

ارداق ايبار ۇلى،

قۋانىش تۇرگەنبايەۆ