ۇلتتىق قوعامدىق سەنىم كەڭەسىنىڭ ءبىرىنشى وتىرىسى بولجام بويىنشا 28 تامىزدا وتەدى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

ول تۋرالى پرەزيدەنتتىڭ كەڭەسشىسى، ۇلتتىق كەڭەستىڭ حاتشىسى ەرلان قارين  الدىن الا مالىمەت بەردى. 

"ءقازىر ۇلتتىق كەڭەس قىزمەتىنىڭ مەحانيزمىنە قاتىستى ءبىرقاتار ماسەلە بار. قانداي جۇمىس توپتارى قۇرىلاتىنىن، ونىڭ قۇرامىنا كىمدەر كىرەتىنىن انىقتاپ الۋ كەرەك. قۇرىلعان توپتار ءوز وتىرىستارىن وتكىزىپ، باسىم باعىتتاردى بەلگىلەيدى دەگەن پايىمداۋ بار. كەزدەسۋدىڭ ناقتى كۇنى ءالى كەلىسىلىپ جاتىر، ازىرگە 28 تامىز دەپ وتىرمىز"، - دەدى قارين.

بۇعان دەيىن ۇكىمەت وتىرىسىندا حابارلانعانداي، ۇلتتىق قوعامدىق سەنىم كەڭەسى اۋىل شارۋاشىلىعى جەرلەرىن ساتۋ جانە جالعا بەرۋ ءموراتورييىن قارايدى. ەرلان قارين العاشقى جيىن جۇمىستى ۇيىمداستىرۋ سيپاتىندا وتەدى دەپ ءتۇسىندىردى.

كەڭەستىڭ ءتوراعاسى – پرەزيدەنت قاسىم-جومارت توقايەۆ. ءتوراعانىڭ ورىنباسارى – پرەزيدەنت اكىمشىلىگىنىڭ باسشىسى قىرىمبەك كوشەربايەۆ؛ حاتشى – پرەزيدەنت كەڭەسشىسى ەرلان قارين.

ۇلتتىق كەڭەستىڭ قۇرامىنا ءارتۇرلى سالانىڭ قىرىقتان استام ساراپشىسى ەندى.