دوڭگەلەك ۇستەل باسىنا جينالعان ماماندار التايداعى تاريحي-مادەني كەشەندەردى يۋنەسكو-نىڭ مۇرالار تىزىمىنە ەنگىزۋ قاجەتتىگىن تىلگە تيەك ەتتى.
بۇل ورايدا د.سەرىكبايەۆ اتىنداعى شقمتۋ-دىڭ اتقارىپ جاتقان جۇمىستارى اۋىز تولتىرىپ ايتۋعا تۇرارلىق. اتالعان جوعارى وقۋ ورنى ر.سۇلەيمەنوۆ اتىنداعى شىعىستانۋ ينستيتۋتىمەن تىزە قوسىپ التايعا حالىقارالىق ەكسپەديسيا ۇيىمداستىرعان بولاتىن. ەكسپەديسيا بارىسىندا وتاندىق جانە شەتەلدىك عالىمدار قارت التايدىڭ قويناۋىنا بۇككەن تامىرلى تاريحىمەن تانىسىپ، عاجايىپ الەمىنە تەرەڭ بويلاپ قايتتى. وسى ساپار تۋرالى، سونداي-اق تارباعاتايداعى ەلەكە سازى، كاتونقاراعايداعى بەرەل قورىمدارىنان تابىلعان قۇندى جادىگەرلەر جونىندە وسكەمەندەگى باسقوسۋدا كەڭىنەن ءسوز بولدى.
– التايدى يۋنەسكو-نىڭ مۇرالار تىزىمىنە ەنگىزۋ شەتەلدىكتەرگە، حالىقارالىق قاۋىمداستىققا ەلىمىزدىڭ باي تاريحى مەن مۇراسىن ناسيحاتتاۋعا زور مۇمكىندىك بەرەدى. كەيىنگى تورت-بەس جىلدا وڭىرىمىزدە ارحەولوگيا سالاسىندا اۋقىمدى جۇمىستار اتقارىلۋدا. بۇل رەتتە د.سەرىكبايەۆ اتىنداعى شقمتۋ عىلىمي جانە تەحنولوگيالىق جاعىنان كوپ قولداۋ كورسەتىپ كەلەدى. اتالعان جۇمىستار الداعى ۋاقىتتا جالعاسىن تاباتىن بولادى، – دەدى جيىنعا قاتىسقان وبلىس اكىمىنىڭ ورىنباسارى اسەم ءنۇسىپوۆا.
پىكىر قالدىرۋ