ءومىرى مەن ولەڭى قامشىداي قاتار ورىلگەن ۇلىقبەك ەسداۋلەتتىڭ جىر كەشى ءوتتى وسكەمەندە. بيىل كوكتەمدە مەرەيلى 65 جاسقا تولعان اقىنعا جەرلەستەرى ايرىقشا قۇرمەت كورسەتتى. ال قاسيەتتى زايسان توپىراعىنان تۇلەپ ۇشقان اقيىق ءوز جانىنان جىرسۇيەر قاۋىمدى التايداي اسقاق، ەرتىستەي تۇڭعيىق ولەڭدەرىمەن سۋسىنداتتى، – دەپ حابارلايدى Qamshy.kz اقپارات اگەنتتىگى.

قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ يەگەرى، قازاقستان جازۋشىلار وداعىنىڭ ءتوراعاسى، اقىن، جۋرناليست ۇلىقبەك ەسداۋلەتتىڭ جىر كەشى پۋشكين اتىنداعى وبلىستىق كىتاپحانادا كەزدەسۋمەن باستالدى. بۇل شاراعا وبلىس اكىمىنىڭ ورىنباسارى اسەم ءنۇسىپوۆا، مادەنيەت، مۇراعاتتار جانە قۇجاتتاما باسقارماسىنىڭ باسشىسى ازامات مۇحامەدچينوۆ جانە باسقا دا قۇرمەتتى قوناقتار ارنايى كەلىپ قاتىستى. ەمەن-جارقىن اڭگىمەلەسىپ، اشىق سۇحبات تۇرىندە وربىگەن كەزدەسۋدە ۇلىاعاڭ سوناۋ ەستەلىككە اينالعان بالا كۇندەرىن، "اقىندىق دەرتى" اسقىنعان جاستىق شاعىن، جۋرناليستىك قىزمەتىندەگى قىزىقتارىن ادەمى ازىلمەن تۇزدىقتاي وتىرىپ اسەرلى جەتكىزدى. ءوز تاراپىنان كەش قوناقتارى اراسىنان اقىننىڭ دوسى ءتۇسىپحان تۇسىپبەكوۆ وتكەن كۇندەردەن ەستەلىك ايتسا، اقساقال سوۆەتحان قاليعوجين ارناۋ ولەڭىن وقىپ، اق باتاسىن بەردى.

سونىمەن قوسا جينالعان قاۋىم بەلگىلى ءانشى روزا رىمبايەۆانىڭ ارنايى جولداعان بەينەسالەمىن تاماشالاپ، مايرا قالام قىزى مەن قايرات مايجاروۆتىڭ ورىنداۋىنداعى ۇلىاعاڭنىڭ سوزىنە جازىلعان "زامان-اي" ءانىن تىڭدادى. "تامشى" شىعارماشىلىق ورتالىعىنىڭ جاستارى اقىن ولەڭدەرىن وقىدى. مەرەيتوي يەسىنە قاتىستى سۇراقتار قويىلىپ، دۇرىس جاۋاپ بەرگەن ادامدارعا اقىننىڭ كىتابى تارتۋ ەتىلدى.

بۇدان كەيىن جىرسۇيەر جۇرت وبلىستىق دراما تەاترعا جينالدى. مۇندا اقىننىڭ "التىن ۇيام – التايىم" اتتى شىعارماشىلىق كەشىنىڭ شىمىلدىعى ءتۇرىلدى.

– بۇگىن مىنە جەرلەستەرىممەن قاۋىشىپ، كەرەمەت كەش ءوتىپ جاتىر. وسىنى ۇيىمداستىرعان وبلىستىڭ باسشىلىعىنا، كىتاپحانا باسشىلارىنا، جازدىق دەمالىسىن قيىپ كەلىپ وتىرعان وزدەرىڭىزگە شىن كوڭىلدەن العىسىمدى ايتامىن. جالپى كەيىنگى كجىلدارى شىعىستا رۋحاني مۇرامىزدى بايىتاتىن وڭدى ىستەر كوپتەپ اتقارىلىپ جاتىر. سونىڭ ءبىرى بەرەل، شىلىكتى، ەلەكە سازى سياقتى تاريحي جەرلەردە جۇرگىزىلىپ جاتقان ارحەولوگيالىق قازبا جۇمىستارى. بۇل ءبىزدىڭ سوناۋ ساقتار مەن تۇركىلەردەن قالعان قۇندى جادىگەرلەردى الەمگە جارقىراتىپ كورسەتۋگە مۇمكىندىك بەرەدى، – دەپ اتاپ وتكەن ۇلىقبەك ەسداۋلەت ساحنا تورىنەن تىڭدارمانعا ارناپ سياسى كەپپەگەن جاڭا ولەڭدەرىنىڭ ءبىر پاراسىن وقىدى.  

كوپشىلىك الدىنا شىعىپ، اقجارما تىلەگىن ارناعان وبلىس اكىمىنىڭ ورىنباسارى اسەم ءنۇسىپوۆا: – ءسىزدى ۇلى اقىن دەپ بىلەمىز. دەنىڭىزگە ساۋلىق، باسىڭىزعا اماندىق تىلەيمىن. 65 جاس مەرەيتويىڭىز قۇتتى بولسىن! – دەپ ىزگى تىلەگىن جەتكىزىپ، وبلىس اكىمى دانيال احمەتوۆتىڭ قۇتتىقتاۋ حاتىن وقىپ بەردى. ارتىنان اقىننىڭ يىعىنا شاپان جاپتى.

بۇدان كەيىنگى ساحنادا اقىننىڭ سوزىنە جازىلعان "زامان اي"، "توتى قۇس"، "گۇل باقتا"، "ءمولدىر مەكەن"، "ساعىنعان جوقپىن"، "اكەمە"، "اق جەلكەن"، "قۇس جولى" سىندى اندەر شىرقالدى. ءبىر ەرەكشەلىگى، ول اندەردى شىعىستىڭ ونەر جۇلدىزدارى ورىندادى.

سونداي-اق بۇل كەشتە قازاقستان جازۋشىلار وداعى ءتوراعاسىنىڭ ءبىرىنشى ورىنباسارى، اقىن اقبەرەن ەلكەزەك، بەلگىلى اقىن تىنىشتىقبەك ابدىكاكىموۆ جانە باسقالارى ءسوز الىپ، قالامداستارىنا اقجارما تىلەگىن جاۋدىرىپ، ءازىل ولەڭدەرىن وقىدى.

 – ۇلىاعاڭ تۋعان جەرىنە كەلىپ جاتقاندا قۋانىشتان شەت قالمايىق دەپ بىزدە جەتتىك. بۇل كىسى مەملەكەتتىك سىيلىقتى، "قۇرمەت" وردەنىن العاندا شىن قۋانعامىز. كىتاپتارى قانشاما شەتەل تىلدەرىنە اۋداىرىلدى. تەك ءبىزدىڭ عانا ەمەس قازاقتىڭ ماقتانىشى بۇل كىسى. سوندىقتان وسى ەلدەگى باۋىرلارى بىرگە كەلىپ قۇتتىقتايىق دەپ وتىرمىز، – دەپ اعىنان جارىلعان اتىمتاي جومارت ازامات قايرات مۋسين ۇلىاعاڭا تەمىر تۇلپاردىڭ كىلتىن ۇستاتتى.

ءسويتىپ التايداعى اعايىن-جۇرت اقىن ۇلىنا وسىلاي قۇرمەت كورسەتتى.