2019 جىلدىڭ 1 تامىزىنا دەيىن جۇمىسپەن قامتۋ ورتالىعىنا 14 420 ادام حابارلاسىپ، ونىڭ 10 009 ادامى تۇراقتى جۇمىسپەن قامتىلدى، دەپ حابارلايدى اتىراۋ وبلىسىنىڭ وڭىرلىك كوممۋنيكاسيالار قىزمەتى.

بۇل تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ جۇمىسپەن قامتۋ ءبولىمىنىڭ باسشىسى گۇلبولات امانعالييەۆا مالىمدەدى.

– الەۋمەتتىك جۇمىس ورىندارىنا 372 ادام جانە ۆاكانتتىق جۇمىس ورىندارىنا 3 748 ادام تۇراقتى جۇمىسقا ورنالاستىرىلدى. جۇمىس تاجىريبەسىن جيناقتاۋ ماقساتىندا، جوعارى جانە ورتا-كاسىپتىك وقۋ ورىندارىن بىتىرگەن 714 تۇلەك جاستار تاجىريبەسىنە جىبەرىلدى. كاسىبي وقۋعا 846 ادام، «باستاۋ-بيزنەس» جوباسىمەن كاسىپكەرلىك نەگىزدەرىنە وقۋعا 784 ادام جىبەرىلىپ، 121 ادامعا نەسيە جانە 45 ادامعا مەملەكەتتىك گرانت بەرىلدى. سونداي-اق وڭىردە بوس جۇمىس ورىندارى جارمەڭكەسى وتۋدە. 30-دان استام جارمەڭكەگە 3 700 ادام قاتىسىپ، ناتيجەسىندە 1 808 ادام جۇمىسپەن قامتىلدى. تاعى 5 175 جۇمىسسىز اقىلى قوعامدىق جۇمىستارعا جىبەرىلدى، – دەيدى گۇلبولات امانعالييەۆا.

ايتا كەتەيىك، جۇمىسپەن قامتۋ شارالارى «ەلەكتروندىق ەڭبەك بيرجاسى» اقپاراتتىق جۇيەسى ارقىلى (www.enbek.kz) جۇزەگە اسىرىلۋدا. بۇگىنگى كۇنى دەيىن بۇل جەرگە 415 بوس جۇمىس ورنى جانە 13 908 تۇيىندەمە جاريالانعان. بيىلعى جىلى ەلەكتروندىق ەڭبەك بيرجاسى ارقىلى 2 260 ادام جۇمىسقا ورنالاستىرىلدى.