كەشىرىلەر كەمشىلىك

"ەگەمەن قازاقستان" اق-نىڭ بۇرىنعى پرەزيدەنتى، جۋرناليست ساۋىتبەك ءابدراحمانوۆ كەزىندە سىر بويىنداعى ءبىر ءىس ساپارى بارىسىندا شيەلىدەگى "ءقازاتاوموندىرىسى" اق-نا قاتىستى №6 كەن باسقارماسىنا سوعادى. جەرگىلىكتى اكىمدەر مەن كەن باسقارماسىنىڭ باسشىلارى قۇراق ۇشا كۇتىپ، جۇمىس جاعدايىمەن تانىستىرادى. سوڭىنان قورىتىندى جيىن وتەدى. سوڭىنان ءسوز العان قالامگەر ءوز تۇجىرىمدارىن ايتا كەلىپ: "نەگىزىنەن جۇمىستارىڭىز دۇرىس سەكىلدى. دەگەندە، ءبىر كەمشىلىكتەرىڭىز بار ەكەن..،" دەپ باسشىلارعا سىناي قارايدى. لاۋازىمدى ادامنىڭ اۋزىنان كەمشىلىك دەگەن ءسوز شىققانان "ويپىرماي، قاي جاعىمىزدان قۇداي ۇرىپ قالار ەكەن" جەرگىلىكتى باسشىلار قىپىلىقتاي باستايدى. "كەمشىلىكتەرىڭىز سول..، رۋعا بولىنەدى ەكەنسىزدەر.."، دەيدى ساۋىتبەك. باسشىلاردىڭ ءبىرى: "جوق، ءا، بىزدە بولىنۋشىلىك جوق"، دەسە، ەكىنشىسى مويىنداعانداي: "قازاق بولعان سوڭ، ونداي-ونداي كەزدەسىپ قالۋى مۇمكىن..." دەپ كۇمىلجيدى. شامالى ءۇزىلىس جاساپ العان دەپۋتات: "جانە دە ولارىڭىزدى ءار جەرگە جازىپ قويادى ەكەنسىزدەر" دەپ قادالا تۇسەدى. "ولاي ەمەس دەسەڭىزدەر، رۋ-6، رۋ-4، رۋ-3" دەگەن جازۋى بار كورنەكىلىكتى قالاي تۇسىنەمىز؟" دەيدى كۇلمەستەن. وسى كەزدە الدىڭعى ءسوزدىڭ زىلىنەن ساسقالاقتاعان باسشىلار ءابدراحمانوۆتىڭ ازىلدەپ وتىرعانىن ەندى اڭعارعانداي جامىراي سويلەي جونەلىسىپتى: "ويباي-اۋ، ول مەكەمەنىڭ اتى ەمەس پە، رۋ-دەگەن "رۋدا ۋپراۆلەنيە" دەگەنىمىز عوي...

 ءدىرىل مەن ءدۇرىل

بەلگىلى جۋرناليست اقايدار ىسىموۆ 67 جاسىندا ەكىنشى نەكەلى ايەلىنەن ۇلدى بولىپ، قۋانىشىن ءوزى تۋعان اۋىلى – تەلىكولدە دە اتاپ وتەدى. بۇل جيىنعا نەگىزىنەن ينستيتۋتتا بىرگە وقىعان جاقىن دوستارى، سىيلاس جورا-جولداستارى قاتىسادى. كوڭىلدى داستارحان باسىندا اتاقتى تەلەجۋرناليست تىلەۋقابىل مىڭجاساروۆ داۋسىن مىڭ قۇبىلتا دىرىلدەتىپ، ارتىستىك مانەرمەن جۇرتتىڭ ىشەك-سىلەسىن قاتىرىپ وتىرسا كەرەك. كوپشىلىكپەن بىرگە جادىراپ وتىرعان ساۋىتبەك تە ءازىلدى ارى قاراي جالعاستىرىپ: "دەگەندە جاسى الپىستان اسقان كىسىنىڭ دىرىلدەن اۋلاق بولعانى ءجون. اسىرەسە، سەن..، اقايدار بايقا!"، دەيدى استارلاي سويلەپ. سول كەزدە اقاڭ ساسپاستان: "ءا، مىنا قىزىقتىڭ ءبارى – سول ءدىرىل مەن ءدۇرىلدىڭ ارقاسى شىعار..." دەپتى.

ءار جازۋشىنىڭ ءوز ءستيلى بار

سىقاقشى جازۋشىلار عابباس قابىشيەۆ پەن ەسەنجول دومبايەۆ ادەبيەت تۋرالى اڭگىمەلەسىپ وتىرعاندارىندا: "ءار ءيۋموريستىڭ ءوزىنىڭ ءستيلى بار، مەنىڭ ءستيلىم، مىسالى، سادىقبەكتىڭ، وسپانحاننىڭ، ءوسپانالىنىڭ ستيلىنەن بولەك، ۇقسامايدى، ۇقساماۋى كەرەك. ايتپەسە، ءبارى بىردەي بولسا، سوندا نە بولادى؟" – دەپ بەتىنە سۇراۋلى جۇزبەن قاراعان ەسەنجولعا عابباس: "وندا لەكسيا بولادى"، – دەيدى ىلە-شالا. بۇعان دومبايەۆ ريزا بولىپ قالسا كەرەك، كۇلىپ جىبەرىپتى.

ەمگە تاپپايسىڭ

كەڭەس وداعى كەزىندە، سوناۋ جەتپىسىنشى جىلداردىڭ باس كەزى بولسا كەرەك، سەناريىن جاس تالانت جازۋشى دۋلات يسابەكوۆ جازعان "گاۋھارتاس" ءفيلمى  ءتۇسىرىلىپ، ماسكەۋگە بەكىتۋگە گوسكينونىڭ باستىعى قالتاي مۇقامەدجانوۆ الىپ بارادى. تالقىلاۋدان سوڭ وداقتىق كوميسسيا ءفيلمدى نەگىزىنەن ەكرانعا جىبەرۋگە كەلىسەدى دە، يدەولوگيا جاعىنان ءبىر ەسكەرتپە جاسايدى. "ءبارى جاقسى، دەگەندە فيلمدە ورىس ۇلتىنىڭ بىردە-بىر وكىلى جوق ەكەن"، دەيدى. قاشاندا قالجىڭى دايىن قالتاي اعامىز سوندا: "سيىر باعاتىن، شوشقا باعاتىن ورىستار قازاقستاندا بار، ال قوي باعاتىن ءبىر ورىستى ەمگە تاپپادىق"، – دەپ ازىلگە سۇيەنگەن ءۋاج ايتىپ تاپقىرلىق تانىتقان ەكەن.

جيناعان نۇرماحان ەلتاي،

قىزىلوردا وبلىسى