وبلىس ورتالىعىندا "سامال" ساياباعى قولدانىسقا بەرىلدى. وندا قىسقا ۋاقىتتىڭ ىشىندە Street workout، روللەردروم الاڭدارى مەن سكەيتبورديستەرگە ارنالعان الاڭقاي، فۋتبول، ۆولەيبول، باسكەتبول الاڭدارى، سونداي-اق جاعاجاي سالىندى. ەندى بۇل ساياباق قالا تۇرعىندارى مەن قوناقتارىنىڭ سۇيىكتى دەمالىس ورىندارىنىڭ بىرىنە اينالدى، – دەپ حابارلايدى شقو اقپارات ورتالىعى.

سونداي-اق مەرەكە اياسىندا وبلىس اكىمى دانيال احمەتوۆ 10 ءمۇعالىم مەن 15 مەديسينا قىزمەتكەرىنە وسكەمەن مەن سەمەي قالالارىنداعى جاڭا ىقشاماۋدانداردا بوي كوتەرگەن ۇيلەردىڭ كىلتتەرىن تابىس ەتتى.

سونىمەن قاتار ارنايى الاڭداردا جوعارى زاڭ شىعارۋشى ورگاندار مەن تۇرعىنداردىڭ قۇقىقتىق ساۋاتتىلىعى تۋرالى كەڭىنەن تالقىلاندى.

س.امانجولوۆ اتىنداعى شقمۋ-دا "قازاقستان رەسپۋبليكاسىنىڭ كونستيتۋسياسى – جەكە تۇلعانىڭ، قوعام مەن مەملەكەت دامۋىنىڭ باعدارى" تاقىرىبىندا دوڭگەلەك ۇستەل ۇيىمداستىرىلدى. وعان ۋسكيۋدار (ستامبۋل/تۇركيا) ۋنيۆەرسيتەتىندەگى الەۋمەتتانۋ كافەدراسىنىڭ مەڭگەرۋشىسى، الەۋمەتتانۋ عىلىمدارىنىڭ دوكتورى، پروفەسسور ابۋلفاز داۆۋدوگلى سۇلەيمەنوۆ قاتىستى. ءدال وسىنداي دوڭگەلەك ۇستەل شاكارىم ۋنيۆەرسيتەتىن دە ءوتتى. وندا عالىمدار، شىعارماشىلىق قاۋىم وكىلدەرى مەن ستۋدەنتتەر باس قوستى.

قوعام قايراتكەرلەرى، عالىمدار مەن ستۋدەنتتەر تاۋەلسىز قازاقستان مەن اتا زاڭنىڭ قابىلدانۋى تۋرالى ماسەلەلەردى ورتاعا سالىپ، پىكىرلەرىن ءبىلدىردى. قازاقستان رەسپۋبليكاسىنىڭ كونستيتۋتسياسىنىڭ دامۋ جولىن ەسكەرە وتىرىپ قاتىسۋشىلار قازىرگى كونستيتۋتسيانىڭ ۇلكەن كۇشكە يە ەكەنىن، ءار ازاماتقا باعىت-باعدار بەرەتىنىن، قوعام مەن مەملەكەت ءۇشىن ماڭىزىن جوعالتپايتىنىن اتاپ ءوتتى.

بۇدان بولەك، شىعىس قازاقستانداعى كىتاپحانالار مەن مۋزەيلەردە كىتاپ كورمەلەرى، دوڭگەلەك ۇستەلدەر، پاتريوتتىق ساعاتتار، "اتا زاڭ – قازاقستان تۇراقتىلىعى"، "اردىڭ شىڭى – اتا زاڭ"، "اتا زاڭ – ەلدىگىمنىڭ ەڭسەسى" اتتى ەلەكتروندى ۆيكتورينا جۇرگىزىلدى. ۇلان، گلۋبوكوە، تارباعاتاي اۋداندارىندا مەملەكەتتىك قىزمەتكە قابىلدانعان قىزمەتكەرلەر سالتاناتتى تۇردە انت قابىلدادى.

سونداي-اق دوستىق ۇيىندە، ساياباقتار مەن الاڭداردا وڭىردەگى شىعارماشىلىق ۇجىمداردىڭ قاتىسۋىمەن مەرەكەلىك كونسەرتتەر وتەدى. جالپى ايتقاندا وبلىس كولەمىندە 350-دەن استام تاقىرىپتىق ءىس شارالار ۇيىمداستىرىلادى.