جيىندا ايماق باسشىسى قۇتتىقتاۋ لەبىزىن ءبىلدىرىپ، وڭىردە اتقارىلىپ جاتقان اۋقىمدى ىستەر تۋرالى ايتتى. سونىمەن قاتار، ەل دامۋىنا ۇلەس قوسىپ، ايانباي ەڭبەك ەتىپ جۇرگەن ازاماتتارعا ىستىق ىقىلاس تانىتىپ، العىس حاتتار مەن مەرەكەلىك توسبەلگىلەرىن تابىستادى.

–  ارداقتى اعايىن، بارشاڭىزدى 30 تامىز – ەلىمىزدىڭ ۇلىق مەرەكەسى كونستيتۋسيا كۇنىمەن شىن جۇرەكتەن قۇتتىقتايمىن! ۇلى دالانىڭ جازىلماعان زاڭدارىمەن بىرگە مايقى بي، تولە بي، قازىبەك بيلەردىڭ قارا قىلدى قاق جارعان شەشىمدەرىمەن بىرگە ەسىم حاننىڭ ەسكى جولى، قاسىم حاننىڭ قاسقا جولى، ءاز تاۋكەنىڭ جەتى جارعىسى سان عاسىرلار بويى ۇلى دالانى مەكەندەگەن حالقىمىز ءۇشىن شامشىراق ىسپەتتەس بولىپ، ەل اراسىنداعى تۇراقتىلىق پەن دامۋدىڭ كەپىلى بولدى. 1995 جىلى قابىلدانعان قازىرگى قولدانىستاعى كونستيتۋسيامىز بۇل – زاڭنامالىق نورما نەمەسە ەرەجەلەر جيناعى عانا ەمەس قوعامداعى بارلىق قارىم-قاتىناستاردى رەتتەيتىن زاڭداردان باستاۋ الاتىن اتا زاڭىمىز! بۇگىندە كونستيتۋسيامىزعا سۇيەنە وتىرىپ، ەلدىڭ دامۋى ءۇشىن ايانباي تەر توگىپ جۇرگەن ازاماتتارىمىز از ەمەس، – دەدى اتىراۋ وبلىسىنىڭ اكىمى نۇرلان نوعايەۆ.

ايتا كەتەيىك، مەرەكەلىك شارا ن.ءجانتورين اتىنداعى وبلىستىق فيلورمونيانىڭ "نارىن" وركەسترى مەن تانىمال تالانت يەلەرىنىڭ كونسەرتىنە ۇلاستى.