قازاقستان رەسپۋبليكاسىنىڭ كونستيتۋسيا كۇنىنە وراي اقتاۋدا مەرەكەلىك شارا ءوتتى. اتا زاڭىمىزعا بيىل 24 جىل تولىپ وتىر. وسى جىلدار ىشىندە ەلىمىز وركەندەدى، دامىدى، ەلدە جاڭا رەفورمالار جاسالدى. ماڭعىستاۋ وبلىسىنىڭ اكىمى سەرىكباي ترۇموۆ سول جىلدارى ەلىمىزدىڭ باسىنان وتكەن وقيعالار مەن اتقارىلعان جۇمىستار تۋرالى بايانداپ، تۇرعىنداردى مەملەكەتتىك مەرەكەمەن قۇتتىقتادى.
- كونستيتۋسيا – ساياسي تۇراقتىلىق پەن قوعامدىق كەلىسىمنىڭ كەپىلى! اتا زاڭىمىزدىڭ بۇلجىتپاي ورىندالۋىنىڭ ارقاسىندا ەلىمىزدىڭ ىرگەسى بەكىدى، حالقىمىزدىڭ تاتۋلىعى مەن تۇراقتىلىعى نىعايدى، بەيبىتشىلىك پەن كەلىسىمنىڭ ۇلگىسىن كورسەتىپ، قازاقستان جۇزدەن اسا ۇلت وكىلدەرىنىڭ اياۋلى اتامەكەنىنە اينالدى. «باعالاي بىلمەگەنگە ب ا ق قونبايدى، قۋانا بىلمەگەنگە قۇت قونبايدى» - دەپ زامانىمىزدىڭ زاڭعارى، ابىز ءابىش اعامىز ايتقانداي، بارىمىزدى باعالاپ، ەگەمەن ەلىمىزدىڭ بىرلىگى مەن ىنتىماعى ءۇشىن جاساپ جۇرگەن يگى ىسىمىزگە بەرەكە تىلەيمىن، - دەپ ايماق باسشىسى ءوزىنىڭ جىلى لەبىزىن ءبىلدىردى.
سونىمەن بىرگە، سالتاناتتى جيىن كەزىندە قازاقستان رەسپۋبليكاسى كونستيتۋسياسىنىڭ ۇلىقتىعىن قامتاماسىز ەتۋگە، كونستيتۋسيالىق نەگىزدەرىنىڭ قالىپتاسۋى مەن دامۋىنا، ازاماتتاردىڭ كونستيتۋسيالىق قۇقىقتارىن قورعاۋعا ەلەۋلى ۇلەس قوسقانى ءۇشىن بىرنەشە ازاماتتار ماراپاتتالدى. اتاپ ايتساق، ماڭىستاۋ وبلىسى پروكۋرورىنىڭ ورىنباسارى ەرجان تۇرماعانبەتوۆكە، ماڭعىستاۋ وبلىسى پروكۋرورىنىڭ اعا كومەكشىسى يۋليا كارتاشوۆاعا، باسقارما باسشىسى جۇماباي قۋانوۆقا، جەدەل ۋاكىل نۇرجان تالاسوۆقا، پوليسيا پولكوۆنيگى اسقار دجايلاۋبايەۆقا، پوليسيا مايورى ەركەبۇلان قىدىربايەۆقا ماڭعىستاۋ وبلىسى اكىمىنىڭ قۇرمەت گراموتاسى، سوتتار اكىمشىسىنىڭ باس مامانى اسەم ارالبايەۆا مەن گۇلباقىت يبرايموۆاعا، جاڭاوزەن قالاسىنىڭ اۋماقتىق ءبولىم فيليالى باسشىسى ساعيرا ەسەتوۆاعا، ماڭعىستاۋ وبلىسى ادىلەت دەپارتامەنتىنىڭ زاڭدى تۇلعالاردى تىركەۋ جۇمىسىن ۇيىمداستىرۋ ءبولىمىنىڭ باسشىسى اقمارال ماحسۇتقا، كىشى ادىلەت كەڭەسشىسى التىنگۇل تۇرعانبايعا، وبلىستىق ادۆوكاتتار القاسىنىڭ ادۆوكاتى راديك ومىربولاتوۆكە ماڭعىستاۋ وبلىسى اكىمىنىڭ العىس حاتتارى تابىستالدى.