بيىل جارتىعاسىرلىق بەلەسىنە اياق باستان جامبىل وبلىسىنداعى جاڭاتاس قالاسىنىڭ تاريحىندا ايرىقشا ساتتەر وتە كوپ. مىسالى، 1968 جىلى جاڭاتاسقا ۇلتىمىزدىڭ ءبىرتۋار پەرزەنتى، رەسپۋبليكامىزدىڭ ءبىرىنشى باسشىسى-دىنمۇحانبەت قونايەۆتىڭ كەلىپ، كوپتەگەن ءتۇيىندى ماسەلەلەردىڭ جەدەل شەشىلۋىنە پارمەندى ىقپال جاساۋى كونەكوز قاريالاردىڭ كۇنى بۇگىنگىدەي كوز الدىندا.

ءسويتىپ كەلەر جىلى، ياعني 1969 جىلى 25 ماۋسىمدا جاڭاتاس پوسەلكاسىنا قالا ستاتۋسى بەرىلگەندىگى جونىندە جارلىق شىقتى. بۇل كەزدە قالا حالقىنىڭ سانى-12 000 عا جەتكەن ەدى.

العا قاراي قارىشتى دامىعان "قاراتاۋ" كومبيناتى، كوپتەگەن قۇرىلىس مەكەمەلەرى جاس قالانىڭ قانات جايۋىنا ۇلكەن ىقپال ەتتى. جاڭا اۋرۋحانا، 8 مەكتەپ، 26 بالاباقشا، كينوتەاتر، مادەنيەت ءۇيى، بايلانىس ءۇيى سەكىلدى نىساندار ەل يگىلىگى ءۇشىن قىزمەت ەتتى. 1971 جىلى «قاراتاۋ» كومبيناتى ۇزدىك جەتىستىكتەرى ءۇشىن لەنين وردەنىمەن ماراپاتتالىپ، كوپتەگەن كەنشىلەر وردەن، مەدال الدى.

1989 جىلى قالا حالقىنىڭ سانى 57 مىڭعا جەتتى. سول جىلى جاڭاتاس قالاسى جەتىستىكتەرگە جەتكەنى ءۇشىن رەسپۋبليكا بويىنشا ءبىرىنشى ورىندى يەلەنىپ، اۋىسپالى قىزىل تۋ مەن ۇلكەن اقشالاي سىيلىققا يە بولدى.

توقسانىنشى جىلداردىڭ باسىنان باستالعان توقىراۋ شارپىنى قالامىزعا اۋىر اسەر ەتتى. الىپ وداقتىڭ ىدىراۋى ەلىمىزگە وڭاي تيگەن جوق. قالانى ۇستاپ تۇرعان كومبيناتتىڭ ءونىمى كۇرت تومەندەدى.

جالاقىلار ايلاپ بەرىلمەدى. كەنشىلەر ەرەۋىلى، اشتىق جاريالاۋ سەكىلدى نارازىلىقتار ەتەك الدى. رەسپۋبليكالىق دەڭگەيدەگى باسشىلار قالاعا بىرنەشە رەت كەلدى. كۇرمەۋى قيىن كۇردەلى ماسەلەلەردى شەشۋ جوعارى باسشىلىققا ءبىراز سالماق سالدى.

مۇنىڭ بارلىعى حالىققا وڭاي تيگەن جوق. قالا تۇرعىندارىنىڭ باسىم كوپشىلىگى وزگە ايماقتارعا قونىس اۋداردى. 2000 جىلى جاڭاتاس قالاسىندا 16100-دەي عانا حالىق قالدى. كوپ قاباتتى ۇيلەردىڭ باسىم كوپشىلىگى بوساپ قالدى. دەسەك تە، ۋاقىت وتە كەلە رەسپۋبليكا باسشىلىعى تاراپىنان قولداۋ كورسەتىلە باستادى. قالانىڭ العاشقى اكىمى-يتەن الىمتايەۆ، ودان كەيىن كەلگەن اۋدان باسشىلارى، كورنەكتى ءوندىرىس ۇيىمداستىرۋشىلارى اۋداننىڭ ەكونوميكالىق-الەۋمەتتىك ماسەلەلەرىن شەشۋگە بار كۇش-جىگەر، قايراتتارىن جۇمسادى.

سونىڭ ناتيجەسىندە جالپى حال-اقۋال وڭعا باستى. كاسىپكەرلىك سالا ءورىس الا باستادى. بوساپ قالعان كوپقاباتتى ۇيلەر قايتا جوندەۋدەن ءوتىپ، كەزەكتە تۇرعان ازاماتتارعا بەرىلدى. قالا ءىشىن اباتتاندىرۋ جۇمىستارى قارقىندى ءجۇردى. جابىلعان بالاباقشالاردىڭ ءبىرازى بۇلدىرشىندەرگە ەسىگىن قايتا اشتى. جىلۋ جۇيەلەرى كۇردەلى جوندەۋدەن ءوتتى.

تاۋەلسىزدىگىمىزدىڭ ارقاسىندا ەلىمىز ەڭسەلەنىپ، الەمدىك ارەنادا ەركىن كورىنە باستادى. وسىناۋ الىپ ەلىمىزدىڭ ءبىر بولشەگى سارىسۋ اۋدانى دا، ونىڭ ورتالىعى جاڭاتاس تا قازىرگى تاڭدا ۇلكەن دامۋ جولىندا. شەتەلدىك ينۆەستورلار كەلە باستادى. بۇگىندە «قاراتاۋ» تاۋ-كەن وڭدەۋ كەشەنى مەن «ەۆروحيم» كومپانيالارىنىڭ ىسكە اسىرىپ جاتقان ينۆەستيسيالىق جوبالارى الەۋمەتتىڭ الەۋەتىن ارتتىرىپ قانا قويماي، تۇتاس ايماقتىڭ ەكونوميكالىق تۇرعىدان ورلەۋىنە ءورىس اشىپ وتىر. بۇدان وزگە دە اۋىز تولتىرىپ ايتۋعا تۇرارلىق جەمىستى جۇمىستار جەتەرلىك. اسىرەسە، مونوقالالاردى دامىتۋدىڭ 2012-2020 جىلعا

دەيىنگى باعدارلاماسىنىڭ ناتيجەسىندە تىرلىگىن تىكتەپ جاتقان كاسىپكەرلەردىڭ دە باستامالارى كوپكە ۇلگى. بۇل، ارينە، اۋقىمدى جۇمىستاردىڭ ءبىر پاراسى عانا. الداعى ماقساتتار دا ايقىن.