بۇل وقيعا تاجىك-وزبەك شەكاراسىندا ورىن الدى. بۇل تۋرالى تاجىكستان ۇلتتىق قاۋىپسىزدىك  كوميتەتىنىڭ دەرەگىنە سۇيەنە وتىرىپ، ريا نوۆوستي اقپارات اگەنتتىگى حابارلادى.

تۇنگى ساعات 3: 23 مينۋت وتكەندە، تاجىك-وزبەك شەكاراسىنداعى №4 «يشكوبود»  زاستاۆاسىنا اسكەري قارۋلانعان بەلگىسىز بىرەۋلەر شابۋىل جاساعان. ىشكى ىستەر جانە شەكارالىق وتريادتىڭ جاۋىنگەرلەرىنىڭ ەرلىگىنىڭ ناتيجەسىندە 15 سودىر جەر جاستانىپ، تاعى بەسەۋى قولعا تۇسكەن. تاجىكستان ۇلتتىق قاۋىپسىزدىك  كوميتەتىنىڭ باسپا ءسوز قىزمەتى حاباردار ەتكەندەي، قازىرگى ۋاقىتتا ولاردىڭ كىم ەكەندىگى ناقتىلانۋدا. بەتپەردە كيگەن سودىرلارمەن اتىستىڭ سالدارىنان ءبىر شەكاراشى سارباز بەن ىشكى ىستەر قىزمەتىنىڭ ءبىر وكىلى قازا تاپتى. بۇل وقيعا دۋشانبەدەن 60 شاقىرىم قاشىقتىقتاعى تاجىك-وزبەك شەكاراسىندا ورىن العان. ءتورت اسكەري كولىكپەن كەلگەن سودىرلار ءسويتىپ قولعا ءتۇستى. ولاردىڭ كولىكتەرى دە تاركىلەندى. قازىرگى ۋاقىتتا جەدەل تەرگەۋ توبى قۇرىلىپ، جۇمىس ىستەۋدە.

ەسكەرتە كەتەيىك، تاجىك-اۋعان شەكاراسى 1300 شاقىرىمعا سوزىلىپ جاتىر. كەڭەس وداعى تاراعاننان كەيىن ەكى ەل اراسىنداعى شەكارا سىزىعى كەشەگى كۇنگە دەيىن  ناقتىلانباي كەلدى. وتكەن جىلدىڭ ناۋرىز ايىندا عانا ەكى ەلدىڭ پرەزيدەنتتەرى كەزدەسىپ،  شەكارانى ناقتىلاۋ تۋرالى ناقتى كەلىسىمگە كەلگەنى بەلگىلى.