سالتاناتتى ءراسىمدى اشقان ۇلتتىق سپورت قاۋىمداستىعىنىڭ قۇرمەتتى پرەزيدەنتى قايرات ساتىبالدى ۇلى ۇلتتىق سپورت ويىندارىن ناسيحاتتاۋعا ايرىقشا ۇلەس قوسقان بارلىق ۇزدىكتەر مەن جانكۇيەرلەرگە العىسىن ءبىلدىردى.

«بيىل ەلىمىزدە ۇلتتىق سپورت تۇرلەرىنەن الەم، ازيا چەمپيوناتتارى مەن رەسپۋبليكالىق تۋرنيرلەر، فەستيۆالدار جانە تاعى دا باسقا اۋقىمدى ءىس-شارالار وتكىزىلدى. مىڭداعان ادامدار ۇلتتىق سپورتپەن تۇراقتى تۇردە اينالىسادى. ەلىمىزدىڭ بارلىق وڭىرلەرىندە ۇلتتىق سپورت مەكتەپتەرى مەن كلۋبتار جۇمىس ىستەيدى. بۇرىن اۋىل اراسىنداعى توي-مەرەكەلەردەن عانا تاماشالايتىن ۇلتتىق سپورتىمىزدىڭ، بۇگىندە حالىقارالىق دەڭگەيگە كوتەرىلىپ، الەم نازارىن اۋدارا باستاعانى تاۋەلسىزدىك مەن بەيبىت كۇننىڭ ارقاسى»، - دەپ اتاپ ءوتتى قايرات ساتىبالدى ۇلى.

«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ءوزىنىڭ قۇتتىقتاۋ سوزىندە مەملەكەتتىك ءتىل، مادەنيەت جانە ءداستۇردى بارلىق ۇلتتىق قۇندىلىعىمىزدى ساقتاي وتىرىپ قانا دامىتا الاتىنىمىزدى تىلگە تيەك ەتتى.   

«تاۋەلسىزدىك العالى بەرى ەلباسى، «Nur Otan» پارتياسىنىڭ ءتوراعاسى نۇرسۇلتان نازاربايەۆ ەڭ باستى قۇندىلىعىمىز – تىلىمىزگە، مادەنيەتىمىزگە، رۋحانياتىمىزعا باسىمدىق بەردى. سونىڭ ارقاسىندا ءتىل مارتەبەسى كوتەرىلىپ كەلەدى. ەندىگى ۋاقىتتا جاستاردى بۇقارالىق سپورتقا باۋلۋىمىز قاجەت. ونىڭ ەڭ ماڭىزدىسى – ۇلتتىق سپورت. ويتكەنى ول – حالىقتىڭ رۋحىن كوتەرەتىن ماڭىزدى شارا. كوپشىلىك قولداعان حالىق پارتياسى رەتىندە «Nur Otan» وسى باستامانى قولداپ كەلەدى. پرەزيدەنت قاسىم-جومارت توقايەۆ جاقىندا ۇلتتىق سپورت تۇرلەرىن جاڭعىرتۋعا قاتىستى ناقتى تاپسىرمالار بەردى. وسىعان وراي پارتيانىڭ ساياسي دوكتريناسىندا كوزدەلگەن قۇندىلىقتار – قازاق ءتىلى، رۋحانياتىمىز بەن ءدىلىمىز باسىم باعىتتارىمىزدىڭ ءبىرى بولىپ قالا بەرەدى»، - دەدى باۋىرجان بايبەك.

بيىلعى جىلدىڭ كۇزىندە «Nur Otan» پارتياسىنىڭ قولداۋىمەن، ەلىمىزدىڭ ءبىرقاتار وڭىرىندە ايتىس فەستيۆالدەرى ۇيىمداستىرىلدى. ايتىس ونەرىنىڭ دوداسى 16-17 جەلتوقساندا ورال قالاسىندا وتەتىن «التىن دومبىرا» رەسپۋبليكالىق فەستيۆالىندە مارەسىنە جەتەدى. ەرتەڭ 7 جەلتوقساندا «استانا» كونسەرت زالىندا جىرشى-تەرمەشىلەردىڭ «JYR AMANAT» كونسەرتى وتەدى. «Nur Otan» پارتياسى جانىنداعى «ميراس» رەسپۋبليكالىق قوعامدىق كەڭەسى مۇشەلەرىنىڭ باستاماسىمەن مەملەكەتتىك ءتىلدى دامىتۋ تەتىكتەرىن پىسىقتاۋ ءۇشىن ارنايى كوميسسيا قۇرىلعان بولاتىن.