پاۆلودار وبلىسىنىڭ اكىمى بولات باقاۋوۆقا قاتىستى قىلمىستىق ءىس قوزعالىپ، تەرگەۋ جۇمىستارى جالعاسىپ جاتىر. بۇل تۋرالى بۇگىن، 16 قاڭتاردا قازاقستاننىڭ ۇلتتىق قاۋىپسىزدىك كوميتەتىنىڭ باسپا ءسوز قىزمەتى حابارلادى.
ۇقك حابارلاۋىنشا، باقاۋوۆقا لاۋازىمدىق "وكىلەتىن اسىرا پايدالانۋ" بابى بويىنشا ءىس قوزعالعان.
"ۇقك 15 قاڭتاردا قىلمىستىق كودەكستىڭ 362-باپ 2ء-بولىمىنىڭ 2-تارماعى بويىنشا تىركەلگەن قىلمىستىق ءىس - "قىزمەتتىك وكىلەتىن اسىرا پايدالانۋ" فاكتىسى بويىنشا پاۆلودار وبلىسىنىڭ اكىمى بولات باقاۋوۆقا قاتىستى جەدەل-تەرگەۋ شارالارىن جۇرگىزدى. قازىرگى ۋاقىتتا تەرگەۋ امالدارى جالعاسىپ جاتىر. وسى كەزەڭدە تولىق دەرەكتەردى تەرگەۋ مۇددەسىنە بايلانىستى جاريالاۋعا بولمايدى" دەلىنگەن ۇقك تاراتقان حابارلامادا.
كەشە كەشكە الەۋمەتتىك جەلىلەردە پاۆلودار وبلىسى اكىمى بولات باقاۋوۆتىڭ ۇستالعانى تۋرالى اقپارات تارادى. ارتىنشا، باقاۋوۆ ەمەس، ونىڭ ورىنباسارى ارىستان قابيكەنوۆتىڭ ۇستالعانى حابارلاندى. بۇگىن پاۆلودار وبلىسىنىڭ اكىمىنىڭ باسپا ءسوز حاتشىسى جۋرناليستەرگە بولات باقاۋوۆتىڭ جۇمىسقا شىققانىن ايتقان بولاتىن.
پىكىر قالدىرۋ